Read Tzotzil Proverbios 4 Bible Online

Proverbios 4 - Tzotzil bible

Proverbios 4

¹Nich'nabiletic, ich'beic ta muc' c'u s'elan ta xchanubtasvan ti atotique; ts'eteluc achiquin ta ya'yiel yo' oy stuq'uil ti snopbenal avu'une.

²Laj xa cac' ana'ic ti lequil tojobtasele, mu xabaj xaten ti chanubtasel laj calbot ava'ie.

³Xi s'elan laj jta ma' ti nich'onilun to oxe: ti jtot jme'e oy slequil, mu tuch'bajun ta yo'ntonic.

⁴Xi s'elan laj stojobtasun ti jtote: “Bejano lec ta ajol ti jlo'il ca'yeje; tamo ta spasel ti c'u s'elan laj calbote, ta xavil ti ach'iel ac'opojel unbi.

⁵Tao ti abijile, oyuc lec snopbenal avu'un; ma'ucuc ti x'ech' xjelav no'ox avu'un ti jc'ope.

⁶Tsotsuc sc'oplal xava'i ti abijile, mu xajip xaten, mu'yuc c'usi xanuptan unbi.

⁷Ti tsots sc'oplal ta scotole, tao ti abijile, xchi'uc ti lec snopbenal avu'une.

⁸Jutebuc ta avo'nton, cajal ta xc'ot ac'oplal yu'un; cuxlejino, ich'bil ta xac'ot ta muc' yu'un.

⁹Ta xayac'bot amoton ti c'upil sba nichim ti guirnalda sbie, ti ta xc'ot ta sronail ajole.”

¹⁰Cuni nich'on, ts'etano achiquin yu'un ti c'usi ta xcale, c'otuc ta avo'nton un, ta xnatij ti ach'iel ac'opojele.

¹¹Xi s'elan ta xatam batel cu'un ti bijilile: ta xic'ot ech'el ta lequil be,

¹²mu'yuc c'usi ta xasmacot ta be un, mu xabosi avoc c'alal yacalot ta anilajele.

¹³Tsinano aba yu'un ti c'u s'elan laj jtojobtasote, mu xajip xaten; liqueso ta yabtelanel, yu'un ja' ach'iel ac'opojel un.

¹⁴Mu xatam ta spasel jech c'u cha'al ta spasic ti buch'u mu'yuc xch'ulel xa'i sbaique, mu xachanbe ti yan o stalelique.

¹⁵Tsatsajan, mu xa'ech' ti bu ta xanavique; ch'aco aba batel, tamo ech'el abe.

¹⁶Mu xlaetuc ta xa'iic mi mu spasic ti c'usi chopole; mu x'och svayelic mi mu sloc'obinic junuque.

¹⁷Sve'el yuch'ob xa ta xa'iic ta spasel ti chopole, ta ilbajinvaneje.

¹⁸Xi s'elan stamojic batel ma' ti buch'u oy stuq'uil yutsile, co'ol s'elan jech c'u cha'al ta xvul ta loq'uel ti xojobal c'ac'ale: ti xtixet no'ox yutsilal ta j'ech'el ja' to c'uxi tixil ti xojobale.

¹⁹Yan ti bu stamojic batel ti buch'u mu'yuc xch'ulel xa'i sbaique, ic'uneb ta j'ech'el ti banomile, mi jutebuc ta xilic c'usi ta sbosi ti yoquic xchi'uquique.

²⁰C'otuc ta avo'nton un ti jc'op ca'yeje, cuni nich'on, ts'etano lec achiquin ta ya'yiel.

²¹J'ech'eluc mu xch'ay ta asat, bejluc ta avo'nton.

²²Scotol ti buch'u ta staique, ta x'ac'bat xch'iel sc'opojelic.

²³Ti li' ta banomile, tuc'ulano ti snopbenal avu'une, yu'un ja' ach'iel ac'opojel.

²⁴Q'uelo aba ta yalel ti c'usi mu'yuc stuq'uile, ta sjutilanel ti c'ope.

²⁵Tuc' xaq'uel batel, tamo batel ti bu ta xabate.

²⁶Tuc'ulano bu ta xatec'an ti avacane, mu'yuc c'usi xana' unbi.

²⁷Mu xatam batel yan be, mi ja'uc xatam ta xaniel ti bu chopole.