Read Tzotzil Proverbios 7 Bible Online

Proverbios 7 - Tzotzil bible

Proverbios 7

¹Cuni nich'on, tac'aluc c'otuc avu'un ti va'i s'elan laj cal ava'ie; bejluc comuc ta ajol ti jmantaltaque.

²Tac'aluc c'otuc avu'un ti jmantaltaque, ti chanubtasele; jechuc xatuc'ulan jech c'u cha'al ti yuninal asate, ta xacuxi unbi.

³Xojoluc ta sni' ac'ob; bejano ta ajol avo'nton.

⁴Biso ta junuc achi'il ta voq'uel ti bijilile; c'otuc ta junuc buch'u lec xavil aba xchi'uc ti snopobile.

⁵Mu sq'uelojucot ta xu'ninot ti jovil antse, ti vo' xa ya'yel yutsil ti ye sti'e.

⁶Oy jun c'ac'al laj jq'uel loq'uel ta sjaptac ti jventanae.

⁷Laj quil, oy jun chib querem viniquetic ti mu xa'i sbae, laj jq'uel lec un, oy jun yu'unic ti ch'abal ti snopobil yu'une.

⁸C'alal c'ot ta xuc'av nae, laj xtuch' jelavel ti bee, ti tuc' xa stamoj batel sbelel sna ti ants taje.

⁹Bat xa talel ti c'ac'al une, xyabet xa talel ti osile.

¹⁰Ta jech yepal un, tal nupatuc ta be yu'un ti antse, ti smeltsanoj sba ta j'ech'el jech c'u cha'al stalel ti jovil antse.

¹¹Jun ants ti lec xyal oe, ti cajal xa'i sbae, ti mu jutebuc xchoti ta snae,

¹²ti xva'vunet no'ox ta bebetique, ti bu xvolet ti jxanviletique, ti xquiquet ta jujun xuc'av na ta smalael buch'u ba'yel ta x'ech'e.

¹³Ti ants une mey buts' xut ti querem vinique, ti mu'yuc xa xq'uexlalil xi laj yalbee:

¹⁴“Le' xa talele, cac'oj que ta yaq'uel milbil matanal ta sventa ti lajesobil o'ntonale, ti c'ot ta pasel cu'un tana li' une.

¹⁵Jech o xal tal jnupot ta be; jc'an xa ta jq'uelot ca'i, li' laj jnupot ta be une.

¹⁶Jq'uioj xa jun yutsil pimil c'u'il ta jtem ti liquem talel ta Egiptoe.

¹⁷Xmuet ta muil poxil, ta smuil ti xuch'al te'e, ta smuil ti canelae.

¹⁸Ba quet'es co'ntontic ta sc'upinel jbatic un, ti bu xa c'alal xu' quich'ojtic ta sacub ti osile,

¹⁹yu'un xi c'ot ta pasele: mu'yuc tey oy ta jna ti jmalale, loc' batel ta nom.

²⁰Jun to vorxa yich'oj batel ti staq'uine; ta sut talel ta syijil to u.”

²¹Ti jun xa yutsil ti ye sti' xvulvun ta j'ech'ele, ta jech to yepal, vos yo'nton yu'un ma' ti querem vinic une.

²²Xi s'elan ta xc'ot ta stojol ti nabal ech'el ta spat une: co'ol s'elan vacax ti ic'bil batel ta smilobile, co'ol s'elan te'tical chij ti tsacbil ta xc'ot yu'un ti pets'e,

²³ta jech yepal un, ts'apal ta xc'ot ta yo'nton ti sni' yolobe; co'ol s'elan jcot mut yacal ta xc'ot ta syacobil, ti mu sna' ti ta xac' o ti sjol sbaquil xchi'uque.

²⁴Va'i un, cuni nich'on, ts'etanbun ava'i achiquin; tuc'ulano ava'i ti jc'op laj cal une.

²⁵Mu xbat ajol avo'nton yu'un ti jech ants taje; ta xach'ay ta be yu'un ti xats'acts'un xa ech'el ta spate.

²⁶Yepal xa cham o xchi'uquic ti syayijemalic laj staan yu'une; yepal xa laj yac' ta lum ach'el.

²⁷Lajebal xa ono'ox xal o ma' ti tambil ech'el ti sbelel snae.