Read Tzotzil Eclesiastés 10 Bible Online

Eclesiastés 10 - Tzotzil bible

Eclesiastés 10

¹Stuil ti jcot chamem vove ta soc smuil yu'un ti lequil muil poxile. Ti c'usiuc no'ox ta sbol pas ta anil ti buch'u oy sbijil ta alele, ta stsul sc'oplal ti ich'bil to ox ta muq'ue.

²Ti buch'u oy sbijile yac'ojbe yipal ta spasel ti c'usi leque, ja'uc ti buch'u pimunebe, me'inem xa'i ta spasel ti chopole.

³Scotol ti c'usi ta spas ti buch'u pimunebe, xvinaj lec ti mu xtojob ti c'usi ta snope, ac'o mi ta xal ti c'otem ta yan ti pimubele.

⁴Mi ilin ta atojol ti jventainvanej ajvalile, mu soc ajol yu'un, stac' tuq'uibtasel ti c'usi toj chopol ta xc'ot ta pasele.

⁵Xi laj quil ma' ti oy c'usi chopol ta xc'ot ta pasel li' ta banomile, ti ta xlic talel ta stojol ti jventainvanej ajvaliletique:

⁶ta xac'beic yich' tsots yabtel ti buch'u pimuneb xa'i sbae, ja'uc ti bu sc'otebal yich'uc tsots yabtele, peq'uel bu ta x'ac'bat ti yabtelique.

⁷Quiloj xtoc ti xcajet xa ta ca' ta xanavic ti mosoviletique, ti co'ol s'elan junuc mosovil ta xanav ta yacanic ti banquilal jpas-mantaletique.

⁸C'ot ta xch'enal stuc, ti bu yacal ta sjoq'uele. Ta xti'e yu'un chon, ti buch'u yacal ta sjomel ti moque.

⁹Ta syayijes sba, ti buch'u yacal ta xan ti tonetique. Ti buch'u ta sjav ti si'e, xu' ta xc'ot ta pasel ta sboj sba stuc.

¹⁰Mi ch'abal xa ye ti eq'uele, mi mu xa xich' juxbele, sjunul xa yipal sc'an jimel. Xloc' venta ti lecuc c'otuc ta loq'uel ti c'usi ta xich' pasel ta sventa ti bijilile.

¹¹¿C'usi xa ta xtun o ti j'alubtasej chone, mi ti'e no'ox ta anil yu'un ti chon c'alal mu to ta x'alub yu'une?

¹²Ti c'usi ta xloc' ta ye ta sti' ti buch'u oy sbijile, ta sta ti ich'bil ta muc' ta xc'ote, ja'uc sc'op ti buch'u pimuneb xa'i sba, xi s'elan ta xac'be sba ti svocole:

¹³naca yalel no'ox yu'un ti c'usi mu'yuc smelole, ta xc'ot ta tsutsel yu'un un ti mu xa bisbiluc ti c'usi xloc' ta alel yu'une.

¹⁴Ti buch'u pimuneb xa'i sbae, naca xtal no'ox ta sjol ti c'usi ta xale. ¿Mi yu'un la oy buch'u xu' ta scaj'al ti c'usi ta xc'ot ta pasele, c'alal mu'yuc buch'u sna' junuc ti c'usi ta xc'ot ta pasel le' ech'ele?

¹⁵Smiloj sba ta abtel ti buch'u pimuneb xa'i sbae, ti mu xojtiquin bu sbelel ti jteclume.

¹⁶Mu xa ono'ox cha'bel un, ma' ti jun jteclum ochem ta ajvalil yu'unic jun uni quereme, ti yich'ojic ta sacub ti yaj'opisialtac ti naca ve'el uch' vo' ta spasique.

¹⁷Mu no'ox c'usi sna' ta j'ech'el ma' ti jun jteclum ti ochem ta ajvalil yu'unic ti buch'u lec sc'oplale, ti ta xve'ic ti yaj'opisialtac ti tsots sc'oplale, yo' oy yipic, ma'uc yacubel ta spasic.

¹⁸Ti buch'u ch'aje sq'ueloj no'ox ta xlilij ti yaxibal snae; ta xlilij scotol sna, ti buch'u mu'yuc c'usi ta spas jutebuque.

¹⁹Yo' x'ech' no'ox ta eal ti c'usi stac' tunel lajesele, xchi'uc ti xq'uixet no'ox banomil yu'un ti uch'bajele, sc'an oyuc xcuchemal ta yuni jelobil.

²⁰Mu xalaban ta slo'iltael ti ajvalile, mi ja'uc xnopnun ajol yu'un. Mu xachopol-c'opta ti jc'uleje, mi ja'uc xavalbe aba atuc, yu'un oy mutetic ta xvil ti yich'oj batel ti lo'il a'yej ti ta xchapbe ya'ie.