Read Tzotzil Eclesiastés 12 Bible Online

Eclesiastés 12 - Tzotzil bible

Eclesiastés 12

¹Ti jch'iel jc'opojelot to tana le'e, vuleso ta avo'nton ti Buch'u laj yac' ach'ulel avanimae yo' to mu ta xc'ot ta atojol ti c'usitic tsots ta xvul ta loq'uele, ti ta xc'ot sjabilal ta xachie: “Laj to sc'oplal ma' ti oy lequil cuxlejal une.”

²Yorail to chac'upin scotol yo' to mu ta xch'ay batel xojobal ti c'ac'ale, xojobal ti ue, xojobinel ti c'anale, ti xvolet to ti toc c'alal mi x'ech' ti vo'e.

³Ta xc'ot sc'ac'alil ta xniquic ti jchabiej muc' ta nae, ti ta xvujq'uij ti buch'u tsots xa'i sbaic yalojique. Jun chib xa no'ox ta xcom ti juch'nejetique, mu xa yepaluc ta xjuch'najic. Toj ic'ubel banomil ta xa'i ti buch'u ta xq'uelvan loq'uel ta ventanae.

⁴C'alal ta xc'ot sc'ac'alil taje, mac xi ma' ti ti'naetic oy ta yeloval bee. C'un c'un ta sts'iji batel ti xjinlajan no'ox ti juch'nejetique. Sts'ij xi ti mutetic ta xq'uejinique. Mu xa xvinaj ta a'yiel ti jq'uejimoletique.

⁵Ti buch'u xcajet batel ti c'ac'al ta xa'ie, oy xi'el ta xa'i, buyuc no'ox oy xi'el ta be. Sac batan no'ox liquel ta nich ma' ti almendro te' une. volol no'ox ma' ti c'ulubetic ta sbae; mu'yuc c'usi xtun o ma' ti alcaparra te'e. Ti vinic une, sbatel osil xbat sta sna, xvinaj to ta be ta xich' oq'uitael ti jech chame.

⁶Vuleso ta avo'nton ti Buch'u laj yac' ach'ulel avanimae yo' to mu ta xtuch' scarinail ti platae, yo' to mu ta xlilij ti oro bine, yo' to mu ta xvoc' ti q'uib tana le'e ti bu ta xtuc talel ti vo'e, yo' to mu ta xet' scaruchal ti joq'ue.

⁷Mi laj taj une, ti lum ach'ele ta xlic joybijuc ta lum jech c'u cha'al ta ba'yele. Ti ch'ulelil une ta sut batel ta stojol Dios, yu'un ja' ono'ox laj yac' talel.

⁸Ti jvolvanejune xi ta jcha'ale: Naca pich' o'ntonal ta xac', pich' o'ntonal ta xac'. Scotol naca pich' o'ntonal ta xac'.

⁹Ti yepal laj sta sbijil ti jvolvaneje, yepal laj yac' ta na'el ta stojol yan ti c'usi s'elan laj sta ta ojtiquinele. Ja' jech xtoc, laj yipal ta yo'ntoninel ta xchanel yepal ti oy xi x'ale ti c'ope, ti scojol cojol laj xchapan leque.

¹⁰Laj yac'be yipal ta stabel smelol bu sc'oteb ti jujubel c'ope yo' ta sts'iba ti ja' melel ti oy xi x'ale ti c'ope.

¹¹Ti c'usitic laj yalilanic ti buch'u oy sbijilique, xbajlij to ta xc'ot ta jol o'ntonal. J'ech'el volol lec staoj yav ti stec'obtaque, co'ol s'elan jun pajob-te' tsinil lec, yac'oj ti jun jq'uel-chije.

¹²Yepal tojobtasel ta xich' tael yu'un ma' taj une. Mu'yuc spajeb mi yepal ta xich' meltsanel ti ep ta poc vunetique. Yepal no'ox ta xac' lubel mi avac'ojbe yipal ta xchanele.

¹³Tsuts xa yalel ma' ti lo'il a'yeje. Laj xa yich' alel scotol. Xi'tao ti Diose. C'otuc ta pasel avu'un ti smantaltaque, yu'un yac'ojanbe xch'ulel yanima scotol ti jnaclejetique.

¹⁴Yu'un ti c'u s'elan laj xa jpastic ta jujune, ta xich' quetic ti Diose, mi lec, mi chopol, mi ta mucul laj yich' pasel.