Read Tzotzil Eclesiastés 2 Bible Online

Eclesiastés 2 - Tzotzil bible

Eclesiastés 2

¹“Ta jloq'ues co'nton ta sc'upinel jba, ta yac'bel jba ti bu xa c'alal xal ti co'ntone”, xichi laj calbe jbae. Le' une, c'ajomal laj jta ti naca pich' o'nton ta xaq'ue.

²Laj jta ma' ti xitse'in no'oxe, ti muyubajele; mu'yuc c'usi laj jta yu'un ti laj cac'be jba scotol ti c'usi ta sc'an ti o'ntonale.

³Ti jtaoj xa ti bijilil caloje, och ta co'nton ta yuch'el ti vinoe. Lic cuch'ilan un yo' ta xca'i mi xloc' venta yu'un ti vinic jech ta spas ti c'u sjalil ta xch'i xc'opoj li' ta banomile.

⁴Laj jliques muc'tiquil abteletic. Laj jva'anan muc'tiquil naetic. Laj jts'unan j'uvatac.

⁵Lic cabtelan yav jts'unubaltac xchi'uc yav jnichimtac. Lic jts'un ep ta tos lo'bolal te'etic.

⁶Li'och ta smacanel yoc vo' yo' ta jmalta ti te'etic bu laj jts'une.

⁷Laj jman jmosov vinic antsetic. Mosovetic laj voc'uc ti ta jnae. Epaj ti jvacaxtaque, xchi'uc ti jchijtaque. Mu'yuc buch'u jech laj sta ti ba'yel ech'ic ta tunel ta Jerusalene.

⁸Yepal no'ox oro xchi'uc ti plata laj jtsobe, ti c'ulejal q'uejbil com yu'un ti ajvaliletic laj ech'icuque, xchi'uc ti lic talel ta yan bic'tal jteclumetique. Yepal no'ox oy jq'uejimol vinic ants ti laj cac'be jba bu xa c'alal xal ti lum ach'ele. Yepal no'ox ta j'ech'el ti cajniltaque, ti jts'acal ajniltaque.

⁹Cajal jc'oplal c'ot ta j'ech'el. Xjelav to laj jta. Mu jechuc laj staic ti buch'utic ba'yel laj ech'icuc ta tunel ta Jerusalene. Ti jech taj une, mu'yuc sjip stenun comel ti bijilile.

¹⁰J'ech'el mu'yuc c'usi laj jmacbe jba jtosuc ti c'usi ta jc'ane. Mu'yuc laj jmacbe c'usi xal ti lum ach'ele. Ximuyubaj no'ox laj jc'upin scotol ti jlubel jchamele. Ja' jech yepal laj jta un.

¹¹Lic jnopilan ti cabteltac ti laj quich' jvocol xchi'uc c'alal lic talel cu'une. Lic quil un ti c'ajomal pich' o'ntonal ta xaq'ue, co'ol s'elan jun ic' ti ta jmactic ca'itic ta tsaquele. Vinaj ti naca no'ox ta x'ech' ta jba ta jsatic ti c'usitic ta jtatic li' ta banomile.

¹²Ts'acal to un, xi lic jt'un ti c'usi ta xac' ti bijilile, ti c'usi ta xac' ti bolile xchi'uc ti pimubele: ¿C'usi stac' to spas ti buch'u ta xich' comel ti cabtele? Mu'yuc, yu'un ja' no'ox ta xcha'pas ti c'usi pasbil ono'oxe.

¹³Laj jta ta ilel un, tsots sc'oplal ti bijilile, ja' mu sta sc'oplal ti pimubele, jech c'u cha'al tsots sc'oplal ti saquilal osile, ja' mu sta sc'oplal ti ic'al osile.

¹⁴Ti buch'u oy sbijile, lec ti bu st'unoj batele; ja'uc ti buch'u pimunebe, ic'uneb ti osil banomil ta xanave. Manchuc mi jech un, laj quil lec ti mu jeleluc ti c'usi ta xc'ot ta stojolique.

¹⁵Xichi laj calbe jba une: “Ti c'u s'elan ta xc'ot ta stojol ti buch'u pimunebe, jech ta xc'ot ta jtojol ec un. Altic ma' ti yepal no'ox ti jbijil un cha'e. Naca pich' o'ntonal no'ox ta xac' un.

¹⁶J'ech'el mi ja'uc xa ta xvulesat ta o'ntonal ti buch'u oy sbijile, xchi'uc ti buch'u pimunebe. Ta xch'ay ta o'ntonal scotol mi ech' batele; ti buch'u oy sbijile, xchi'uc ti buch'u pimunebe, co'ol ta xcham xlajic.”

¹⁷C'ot ta pasel un, mu tsotsuc sc'oplal laj ca'i ti ch'iel c'opojele. Scotol ti c'usi xlic ta lum ta xich' pasel li' ta banomile, laj jta ti mu lecuc xi'ile yu'une. Melel ono'ox un, naca pich' o'nton ta xac' scotol, co'ol s'elan jun ic' ta jmactic ca'itic ta tsaquel.

¹⁸C'ot ta pasel ti mu tsotsuc sc'oplal scotol ti cabtel laj jliques ta yabtelanel li' ta banomile. Scotol taje, ta xlic stunes ti jq'uexole.

¹⁹Ma' ti bu tac'al c'ot ta co'ntone, xi laj cale: Buch'uuc no'ox ta xlic yich' ta sventa, mi oy lec sbijil, mi pimuneb, ta ono'ox xc'ot ta yu'un scotol c'alal vocol chapaj ta sventa ta jbijil ti c'u yepal laj jta li' ta banomile. Naca pich' o'nton ta xac' un.

²⁰C'alal lic jtuc'ulan c'u s'elan ti cabtel li' ta banomile, mu xa c'usi x'ech' o laj ca'i ti jeche' no'ox ta x'ech' ti jvocol ta abtele.

²¹Oy buch'u ta sbijil, ta snopbenal, laj yac' sjolilal ta abtel ti c'ajomal no'ox ta sbusanbe comel scotol ta sventainel ti ma'uc ta yabtel laj stae. Naca no'ox ta xac' pich' o'nton un, mu'yuc stuq'uil ta j'ech'el.

²²Ja' yu'un un, ¿c'usi ta sta o ti vinic ti smiloj sba ta abtele, ti batem ta yo'nton ta snopilanel sventa no'ox ti sba banomile?

²³Ti c'u sjalil cuxule, naca svocol, co'ol s'elan jun icatsil c'otem ta stojol ti mu xac' jun o'ntonale. Mi jutebuc ts'ijil ta snopilanel ti c'alal ta xcux ta ac'ubale. Naca no'ox pich' o'ntonal ta xac' un.

²⁴Ti c'usi xch'i o ta xa'i ti vinique, ve'uc yuch'uc no'ox vo', ech'uc ta ye ta sti' ti slubel xchamele. Laj ca'ibe smelol ti liquem talel ta stojol ti Dios une.

²⁵Ti manchucuc une, ¿buch'u ono'ox la xmuyubaj ta xve', ta xuch' vo', mi ma'uc liquem talel ta stojol ti Dios une?

²⁶Le' une, ti Diose ta xac'be sbijil snopobenal smuyubajel ti buch'u lec ta xil ta sba ta sate. Ti buch'u ta sa' ti smul une, ta xac' ye ti epajuc ti yabtele, ti busul no'ox ta j'ech'el ti sc'ulejal ta stae. Ta jech yepal un, ta xac'be ta yoc ta sc'ob ti buch'u lec ta xil ta sba ta sate. Naca no'ox pich' o'ntonal ta xac', co'ol s'elan ti ic' ti mu xjav ta tsaquele.