Read Tzotzil Eclesiastés 3 Bible Online

Eclesiastés 3 - Tzotzil bible

Eclesiastés 3

¹Ti c'usitic ta xc'ot ta pasel li' ta banomile, naca oy yorail scotol ti xi yelan ta xc'ot ta pasel ti jujuliquele:

²Oy yorail ti voq'uel ayanele; oy yorail ti chamel lajele. Oy yorail ta xich' ts'unel, oy yorail ta xich' tsobel ti c'usi ts'unbile.

³Oy yorail ti milbaile; oy yorail ti poxtaele. Oy yorail ti c'usi ta xich' lilinele; oy yorail ti c'usi ta xich' va'anele.

⁴Oy yorail ti oq'uel avanele; oy yorail ti tse'inele. Oy yorail ti ic'al me'inale; oy yorail ti muyubajel ta q'uine.

⁵Oy yorail ta sjipel loq'uel ti tone. oy yorail ta tsobel talel. Oy yorail ti mey baile; oy yorail ti ch'ac baile.

⁶Oy yorail ti ac'bil yipal ta sa'ele; oy yorail ti jech comuc oe. Oy yorail ti sc'an naq'uele; oy yorail ti ten xi batele.

⁷Oy yorail ti ch'i' xi ta jatele. oy yorail ti ts'is xie. Oy yorail ti ts'ij xi no'oxe; oy yorail ti c'opojel ta spaquel ti c'ope.

⁸Oy yorail ti syail xc'uxul o'ntonale; oy yorail ti sti'emal jolile. Oy yorail ti letovajele; oy yorail ti lajem ti c'ope.

⁹¿C'usi xloc' venta ta xa'i ti vinic smiloj sba ta abtel unbi?

¹⁰Avi tana une, ti Diose, laj jna' lec ti laj sbusanbe ta sba ti vinic ta spasel yo' jech ta xbat yo'nton xchi'uc.

¹¹Toj jun yutsiquil laj smeltsan scotol ti ta yorail xae. Yu'un laj stic' ta jol o'ntonal ti mu'yuc spajeb xtal no'ox sjolilal ti c'usi stac' alel yu'unique. Ac'o mi jech un, ja' no'ox mu'yuc buch'u stabe spajeb ta sna'el ti c'usi spasoj ti Diose, xchi'uc ti c'usi yacal ta spasele.

¹²Jna' lec ti oy buch'u c'usi xch'i o xa'i ta spasele, ti x'ech' jelav no'ox c'ac'al ta sc'upinel ti xch'iel sc'opojel ta ve'el uch' vo'e.

¹³Ti jech xijve' xcuch'tic no'ox vo' ta sc'upinel stunesel slubel xchamel ti coc jc'obtique, loc' ayan ta yo'nton ti Dios laj yac'botique.

¹⁴Jna' lec xtoc un, ti c'usitic laj smeltsan ti Diose, j'ech'el com o. Mi ja'uc stac' ac'bel xchi'il, mi ja'uc stac' loq'uesel. C'ot ta pasel yu'un ti Diose yo' xi'tabil ta xc'ot.

¹⁵Ti c'usi laj c'otuc ta pasele, ech' xa un. Ti c'usi nopbil ta xc'ot ta pasele, vinaj xa un. Yu'un tey ono'ox xlic xcaj ta xc'ot ta pasel yu'un ti Diose.

¹⁶Ti oy sc'oplal ti tuq'uilale, ti tuq'uil chapanele, naca soquem scotol. Mu stac' alel ti c'usitic ta xc'ot ta pasel li' ta banomil laj quile.

¹⁷Ta xcal ma' ti cuni c'op ec une ti naca oy yorail scotole. Mi tuq'uil vinic, mi mu'yuc xch'ulel xa'i sba, ta xchapanatic yu'un Dios ti c'usitic ta xc'ot ta pasel yu'unique.

¹⁸Ti c'u s'elan stalel cuxul ti lum ach'ele, ta x'ac'bat sna'ic yu'un Dios ti yojtiquinicuc sbaic ti mu yanuc xcuxlejalic jech c'u cha'al ti chon bolome, xi ma' ti cuni c'op ta xcal une.

¹⁹Melel ono'ox un, ti viniquetique, ti chon bolometique, mu yanuc ti xi s'elan ta xc'ot ta stojolique: co'ol sna' xcham xlajic jujuvoc'. Mu yanuc c'u s'elan ta xich'ic ic' scotolic. Xi s'elan ti mu yu'unuc stuc c'u s'elan staoj ti vinique, mi ja'uc ti chon bolometique: naca pich' o'ntonal ta xac'.

²⁰Jun yavil ti bu talique. Ta lum ach'el meltsaj talel. Ta lum ach'el ta xjoybij sutel.

²¹¿Mi oy la buch'u sna' xana' ta xbat ta cajal toyol vinajel xch'ulel ti vinique, ti ta xyal batel ta snatil banomil xch'ulel ti chon bolometique?

²²Laj quil un, ti c'usi stac' spas ti vinique, ja' ti stunuc slajesuc ti slubel xchamel ti yoc sc'obe, ja' jech yepal laj sta. Mu'yuc xa buch'u ta x'ac'bun yil ti c'usi ta to xc'ot ta pasele.