Read Tzotzil Eclesiastés 4 Bible Online

Eclesiastés 4 - Tzotzil bible

Eclesiastés 4

¹Ts'ijil licom yu'un c'alal laj quil ti ilbajinel ta xc'ot ta pasel li' ta banomile. Laj quil ti x'oc' x'avanic no'ox ti buch'utic ta x'ilbajinatique, ti mu'yuc buch'u ta xpatbun yo'ntonic ti ilbajinbilic yu'un ti buch'u cajal ye sti' xa'i sbaique. Laj to c'op ma' ti oy buch'u ta xpatbun yo'ntonic une.

²Jech o xal un, c'ot ta nopel cu'un ti mu'yuc xa c'usi sna' ti buch'u chamem xae. Ti buch'utic cuxulic toe oyic ta vocol.

³Ti buch'u mu'yuc to voq'uemique, lec oyic le'e. Mu'yuc to c'otem ta stojolic ti c'usi chopol li' ta banomile, ja' mu sta sc'oplal ma' ti chib taje.

⁴Ti buch'u yac'ojbe yipal abtel ta stael ti caj tsacal ta xc'ote, laj quil ti oy jti' o'nton ta stojole. Naca pich' o'ntonal ta xac' ma' taj une. Co'ol s'elan ti ic' ti mu xjav ta tsaquele.

⁵“Ti buch'u pimunebe smeyoj yoc sc'ob ta xilbajin sba stuc un”, xi ta xalic ti jnaclejetique.

⁶“Xloc' venta ti xcuxuc liqueluc ti yoc sc'obe. Ch'ayel xa ma' ti xlub xcham xchibal ti yoc sc'obe. Co'ol s'elan ti buch'u ta stsac ya'i ti iq'ue”, xichi ma' ti vu'un ec une.

⁷C'alal laj joybin jba ta sq'uelel batele, xi laj quil ti naca pich' o'ntonal ta xaq'ue:

⁸Oy jun vinic xch'ulel tuc. Mu'yuc yuts' yalal. Mu'yuc xnich'nab. Mi ja'uc oy xchi'iltac ta voq'uel. Mi jutebuc ta spajes sba ta sa'el ti sc'ulejale. Mi jutebuc oy bu ti xi ta sjac'be sbae: “¿Buch'u ta xquictabe comel ta stojol ti jmiloj jba ta abtele? ¿C'u cha'al jaltaoj jba ta slajesel ti c'usi oy cu'une?” Taje, naca pich' o'ntonal ta xac', naca vocol xal o.

⁹Yepal no'ox ta xich' tael abtel ti cha'vo' yajvale. Mi jun no'oxe, mu stabe yipal.

¹⁰Mi oy buch'u yal ta lum junuc yu'unique, ta xtoyvan liquel ti june. Teque' no'ox xch'a un, mi xch'ul tuc yal ta lume, mu'yuc buch'u xtoyun liquel.

¹¹Yan mi jmoj ta xmuch sbaic ta vayel ti xchibalique, ta xlic stsacbe sba xq'uixnalic. Ti cuni tuctic no'ox une, ¿c'u ono'ox xi ta xq'uixnaj?

¹²Mu vocoluc ta xquich'tic tsalel mi jch'ul tuctic no'oxe. Ti ta cha'vo'e, ta to xcuch cu'untic ta spaquel ti jc'oplaltic unbi. Mi oxbej syomoj sba ti ch'ojone, mu to xtuch'.

¹³Ja' xi to smuc'ul ti me'un querem ti oy sbijile, ja' mu sta ma' ti jun mol ajvalil ti pimuneb xa'i sbae, ti mu xa xchiquinta ti bijubtasele.

¹⁴Ac'o mi naca jloq'uel ech'el ta chuquel ti quereme, xu' ta xchoti ta pas mantal ta q'uexolil yu'un ti ajvalil taje, nom to c'ot yu'un ti me'un mu'natil ti c'alal chotol xa ta ajvalile.

¹⁵Yu'un oy bu quiloj ti xvoletic no'ox ti jteclum ta stoybel ti sc'oplale.

¹⁶Manchuc mi mu albajuc yepal ti jteclum bu ta sventaine, mi ja'uc ta sta xmuyubaj ta xcom ti stuquique, xchi'uc ti snitilultaque. Taje, naca no'ox ta xac' pich' o'ntonal, co'ol s'elan ti ic' ti mu xjav ta tsaquele.