Read Tzotzil Eclesiastés 6 Bible Online

Eclesiastés 6 - Tzotzil bible

Eclesiastés 6

¹Oy to yan xi s'elan quiloj ti naca vul o'ntonal ta xac' li' ta banomil ti ojtiquinbil lec yu'un ti jnaclejetique:

²Oy buch'u yepal no'ox ac'bilic sc'ulejalic slequilalic yu'un ti Diose, ti oy ta ye ta sti'ic scotol ti c'usi ta sc'anique. Le' une, mu xilbeic stsutseb ta sc'upinel scotol. Yan xa ti buch'u ta sc'upin ta stunesel stsutsele. Taje, naca pich' o'ntonal ta xac', jcha'na'tic xa ta j'ech'el un.

³Xu' nan ta xil vo'vinic (100) ta vo' xnich'nab ti vinique, ti jal jabil ta xch'i xc'opoje. Manchuc mi jal ta xch'i xc'opoj un, ¿c'usi xa ono'ox bal o un, mi mu'yuc ta xet'es yo'nton ta sc'upinel ti c'usi leque, mi mu'yuc ta xich' lequil muquel une? Ta jva'an jba ta yalel ti stac' to ti c'usi ta xc'ot ta pasel ta stojol ti jyalel olole, ti ja' mu sta ta xc'ot ta stojol ti vinic taje.

⁴Ti olol taj une, ta jech yepal, ts'ij xi ti sc'oplal ti palch'uj batel ta ic'al osile, mu'yuc xna'un ti buch'ue.

⁵Mu'yuc laj yil yutsilal ti saquilal osil une, ipaluc laj sta ti xcuxobil yo'ntone, ja' mu sta ma' ti vinic taj une.

⁶Manchuc mi ta xil xch'iel sc'opojel cha'miluc (2,000) jabil, mi mu'yuc ta xilbe stsutseb ta sc'upinel ti c'usi oy yu'un une, laj c'op un, ¡palch'uj batel ti bu yavil scotolique!

⁷Sbel no'ox xch'ut ma' ti smiloj sba ta abtel ti vinic ta x'ech' yu'un ti jujun c'ac'ale, mi ja'uc ta stabe spajeb c'usi ta sc'an ti yo'nton une.

⁸Mi xac' no'ox sjol c'usi xut sba xchi'uc xcuxlej ti buch'u bij xa'i sbae, ¿mi yepal no'ox oy yu'un, mi ja' mu sta ti buch'u pimuneb xa'i sbae?

⁹Ja' stac' to ma' ti quilojtic ta jsatic ti c'usi jtaojtique, ja' mu sta ma' ti co'ol xa s'elan c'otem ta pasel ya'yele. Le' une, naca pich' o'ntonal ta xac', co'ol s'elan ic' ta jtsac ca'itic.

¹⁰Ti c'usi yacal ta xvinaj tana li'e, le' xa talel ta vo'ne ti albil talel yuni c'oplale, ti na'bil lec yu'unic ti c'usi jtosucale. Mu stac' tsalel un ma' ti oy jtos jelavem xu' yu'un une.

¹¹Oy no'ox jtos ma' ti xi s'elan ja' melel une: ti bu xlic xcaj no'ox ti c'opetique, epajem ti c'usitic mu'yuc smelol stuq'uil ta alele; mu'yuc c'usi ta jtatic yu'un ma' taj une.

¹²Ta j'ech'el mu'yuc buch'u sna' c'usi lec ta sta ti vinic c'u sjalil ti xch'iel sc'opojel ta x'ech'e. Naca pich' o'ntonal ta sta. Yu'un ti xch'iel sc'opojele, xtemet no'ox jelavel jech c'u cha'al ti queove. ¿Mi yu'un oy la buch'u ta x'albun c'usi ta xc'ot ta pasel li' ta banomil c'alal mi cham xa oxe?