Read Tzotzil Cantares 1 Bible Online

Cantares 1 - Tzotzil bible

Cantares 1

¹Ti c'upil sba nichimal c'opetic yu'un ti Salomone.

²Mu xa ono'ox c'usi jech o ma' ti ta xabuts'un une. Ti xameselete, xcom ta be yutsil xchi'il ma' ti vinoe.

³Ta sa'van smuil ti muil poxil avu'une, malbil muil poxil c'otem ti ac'oplale. Jech o xal un, mu xastuch' ta yo'nton ti antsetique.

⁴Nabanun xch'a batel ta apat un. Ta lec no'ox un, ajvalil, ic'un xch'a batel ti bu ep ta c'ol naetic avu'une. Ximuyubajcutic ma' ta atojol une. Mu xch'ay ta yalel sc'oplal ma' ti xameselete, mu sta yutsil xchi'il ti vinoe. ¡Yu'un ca jech ta xa'i ti antsetic ti mu xastuch' ta yo'ntone!

⁵Antsetic yu'un Jerusalén, yamal ants no'ox xca'i jba, c'upil jba ta j'ech'el, co'ol j'elan jech c'u cha'al axibal naetic yu'un Cedar ti yamal antsune, c'upil jba ta j'ech'el jech c'u cha'al ti joc'lej poq'uetic yu'un ti Salomone.

⁶Mu xat'ojan asatic yu'un ma' ti yamalun une, mi ja'uc ti ic'yamanun yu'un ti c'ac'ale. Laj yiltaicun ma' ti jchi'iltac ta voq'uele, li'och ta jchabiej uva yu'unic, mu'yuc xa laj jtuc'ulan ta sq'uelel ti cuni uva jtuque.

⁷Albun ca'i un, cuni c'anbil, ¿bu ta xc'ot amalq'uin ti avuni chijtaque? ¿Bu ta xavic' batel ta xcuxel yo'nton ti ta o'lol c'ac'ale? ¿C'u cha'al co'ol s'elan jcotcovilun xicapet jmoj xchi'uc xchijtac ti achi'iltaque?

⁸Mi mu xac' avuni jol ti bu ta xatam batel ti atuc no'ox jelavem avutsil ta scotol ti yan antsetique, t'uno batel yav yoc ti avuni chijtaque, malq'uino ti avuni tentsuntac ta sts'el xvacax-natac ti jq'uel-chijetique.

⁹Snup cuni ch'ulel, x'ech' to avutsil c'otemot cu'un jech c'u cha'al c'upil sba yevax ta sventa scarreta ti faraone.

¹⁰C'upil sba xc'ot o ti avuni chovtac ti joc'ajtic xa yuni nichimaltac ta jujujote. C'upil sba ti avuni nuc' xchi'uc ti yuni nats'ile.

¹¹Ti c'usi ta xavich' tsoyanbele, naca ta oro ta jmeltsancutic ti nichimtasbil lec ta platae.

¹²Ti jmuil nichime, ta sa'van ech'el smuil ti bu chotol ti ajvalil ta sts'el ti mexae.

¹³Ti snup cuni ch'ulele, co'ol s'elan jchuc uni muil nichim ti q'uechel xa ta sti' co'ntone.

¹⁴Ti snup cuni ch'ulele, co'ol s'elan xnich alheña ta sts'unubal uvaetic ti oy ta En-gadie.

¹⁵Snup cuni ch'ulel, c'upil avuni ba, c'upil aba ta j'ech'el. Co'ol s'elan cha'cot paloma ts'ililic no'ox yutsil ti asate.

¹⁶Snup cuni ch'ulel, c'upil avuni ba, c'upil aba ta j'ech'el. Ti bu ta jsoman jbatique, ta yaxju'an momol un.

¹⁷Naca ch'ut-te' ta xc'ot ta sts'amte'al jnatic, ti yaxibal sjole, naca oq'uil te'.