Read Tzotzil Cantares 2 Bible Online

Cantares 2 - Tzotzil bible

Cantares 2

¹Xnichimalun yosilal ti Sarone, sroxailun stenlejal.

²Ta scotol ti antsetique, ti snup cuni ch'ulele, co'ol s'elan jech c'u cha'al junuc roxa ti volibil ta ch'ixe.

³Ta scotol ti viniquetique, ti snup cuni ch'ulele, co'ol s'elan jech c'u cha'al jbej mantsana xbejet ta vitstic. Ta jc'ol xa banomil ta xca'i yu'un ma' ti chotolun ta yolon squeovale, lec chi' ta j'ech'el laj ca'i ma' ti sat une.

⁴Laj yic'un batel ta jc'ol na bu oy ti jve'eletique, mu tuch'bajun ta xa'i ti sat laj spas c'alal laj sq'uelune.

⁵Yac'bucun to quip ti pimil pan meltsanbil ta taquin sat uvae, quipanuc to ti mantsanae, yu'un vos xa co'nton ti mu tuch'baj ta xaca'ie.

⁶Yac'uc jelavel ti sts'et c'ob ta yolon ti jole, ti mey yutucun xchi'uc ti sbats'i c'obe.

⁷Alic no'ox xch'a ta jamal antsetic yu'un Jerusalén, ta sventa ti yaxal te'tical jchijetique xchi'uc ti uni tsajal chijetic ti oyic ta abnaltique, ti mu xatijbeic svayel ti snup cuni ch'ulele. Vayuc ya'i ja' to ti c'uxi ta xjulav stuque.

⁸Tal xa ta xca'i ti snup cuni ch'ulele. Mu ch'ayaluc ti yuni c'opojel ta xca'ie. Xbitomaj xa talel ta vitstic. Xbitomaj xa talel ta stselejtic.

⁹Ti snup cuni ch'ulele, te'tical chij ti xi yuni elanele: co'ol s'elan uni nene' te'tical chij. Li' xa oy ta spat ti ti'nae, xvinaj xa ta ventana ti batem xa xch'ulel ta xnach'tavan ochel ti bu cayajtique.

¹⁰Xi laj yalbun ti snup cuni ch'ulele: “Va'lan un, snup cuni ch'ulel, batic cuni c'upil, la' xch'a un.

¹¹A'yio ava'i, ech' xa yorail ti xchic'chun ti corixmae, ech' xa yorail ti vo' xtoque.

¹²Laj xa tucuc ma' ti nichimetic ta osil banomile, sta xa yorail ma' ti q'uejimol une, xvinaj xa ta cosilaltic ti xcujcun ti tortolaetique.

¹³Xcuchojan sat ma' ti icuxetique, xvinaj xpaq'uet smuil ta xta'aj ma' ti uvaetique. “Va'lan batic un, snup cuni ch'ulel, batic la xch'a un, cuni c'upil.

¹⁴“Jq'ueltic ti avuni sate, ca'itic ti avuni c'opojele, cuni paloma, ti alac' avuni ba ta q'uelele, ti xich'i xa yu'un ti avuni c'opojele, ti ta xanac'olan aba ta c'al tontique, ti xnach'nun asat ta toyole.”

¹⁵Tsaquic ya'i ti vetetique, ti ch'aj vetetique, ti ta soquesic ti jts'unubal uvaetique, ti ta soquesic c'alal nich xa ti j'uvatique.

¹⁶Laj xa cu'nin ti snup cuni ch'ulele, lic'ot xa ta yu'un ec. Ta sq'uel yuni chij ti lamal ta yut roxatique.

¹⁷Sc'an to sacub talel ti osile, yo' to ac'ubaltic, snup cuni ch'ulel, sutan talel ti co'ol a'elan jech c'u cha'al ti muc' ta te'tical chije, ti ch'aj te'tical chije naq'uetan ta pimilal te'tic ta toyol vitstic.