Read Tzotzil Cantares 3 Bible Online

Cantares 3 - Tzotzil bible

Cantares 3

¹Ti snup cuni ch'ulele, jsa'ilan xa ta x'ech' cu'un jujun ac'ubal ti ta jvayebe. Mu'yuc laj jta un

²Va'i un, liloc' ta sa'el, laj jxani sjunul ti jteclum ta sa'el ti cuni c'upile, ta jujun beetic, xchi'uc ta yamaq'uil ti jteclume. Laj jsa'ilan ta j'ech'el, mi ja'uc oy bu laj jta.

³Xichi laj jac'be ti buch'u va'anbil ta xchabiel ti jteclume: “¿Mi mu'yuc xavilic ti cuni c'upile?”

⁴Naca xi snatil liloc' batel ti bu oyique, c'alal jnupoj c'ot ta be ti cuni c'upile. Laj jnitbe ti sc'obe, mi ja'uc laj jcolta, laj quic' batel ta sna ti jme'e.

⁵Antsetic yu'un Jerusalén, albeicun ta jamal ta sventa ti muc' ta yaxal te'tical chije, xchi'uc ti uni tsajal me' te'tical chije, mu xatijbeic svayel ti snup cuni ch'ulele. Ch'an utic ja' to ti c'uxi ta xjulav stuque.

⁶¿C'usi ti vi s'elan le' xtal ta sbajtical banomil ti volibil talel ta jun muc' ta tometel ch'aile, ti capal talel ta xch'ailal ti mirrae, ti pome, xchi'uc ta scotol ti ep ta tos ti muil poxiletique?

⁷Le'e, ja' xcuchobil ti Salomone. Ti svoc'ol voc' xa chabibil talel yu'unic ta oxvinic (60) ta vo' soldado yu'un Israel ti mu sna' xi'ique.

⁸Scotolic lec sna' xc'abajic ta espada. yilojic lec ti ac'-letoe; xchuquinoj yespadaic ti jujunique, yo' jech oy yip yo'ntonic ti xi'bal sba ta x'ech' ti ac'ubale.

⁹Ti ajvalil Salomone laj yac' ta meltsanel jun cuchobbail ti naca ta c'upil sba te'etic ti liquem talel ta Libanoe.

¹⁰Naca plata ti yoyaltaque, meltsanbil ta oro ti sc'atlomaltaque; sputspun no'ox yax'elan stsajal meltsanbil ti xchotlebale, ti yut xchi'uc ti smac sjole, naca lequil poq'uetic yich'oj ti loc' ayan ta yo'nton laj yaq'uic ti antsetic yu'un ti Jerusalene.

¹¹Antsetic yu'un jteclum Sión, loc'anic talel, la' q'uelo avil ti ajvalil Salomone. Slapoj xa talel sronail sjol ti meltsanbil yu'un sme' ti ta xtun yo' ta xnupune, sc'ac'alil ti mu'yuc xa c'usi sna' liquel ta j'ech'ele.