Read Tzotzil Cantares 5 Bible Online

Cantares 5 - Tzotzil bible

Cantares 5

¹Uni tseb, cuni lecom, li'och xa batel ta yavil cuni ts'unubal. Laj jtic' jc'ob ta stunesel ti cuni mirrae, xchi'uc ti uni muil poxiletic cu'une; laj xa ca'i c'u yutsil yuni pomal sc'olol c'ol ti cuni ajapome, laj xa jc'upin ta yuch'el ti cuni vinoe, xchi'uc ti cuni chu' vacaxe. Jchi'iltac ti lec xquil jbatique, ve'anic, uch'obajanic. ¡Uch'ic scotol ti c'usi xa xal ti avo'ntonique!

²Vayemun xa ox, le' une jtijoj ti jch'ulele. Laj ca'i xi ta xiyalbun talel ta ti'na ti snup cuni ch'ulele: “Uni jch'iel paloma tseb, snup cuni ch'ulel, jambun ti ti'nae. Ti jol une, lanuneb yu'un ti job ac'ubale. Sts'ujuc xa yalel ma' ti job ac'ubal ta sbabatac jol une.”

³“Jloc'oj xa ox ti jc'u'e, tsots sc'oplal ta xlic jlap ta anil. Jpocoj xa ox ti cacantaque, ta xlic no'ox yac'beic xcuch pucuc xtoc un.”

⁴Ti snup cuni ch'ulele laj xch'op ta jamel ti ti'nae. Ti jech taj une, mu xa c'usi jech o laj ca'i ec un.

⁵Jambe xch'a ti'na ma' ti snup cuni ch'ulel une, ja' to ca'i ta sts'uj talel ta jc'ob xchi'uc ta sni'ni'tac jc'ob ti mirrae, ti sts'ujlajet chlaj bajuc talel yu'un sc'atc'atul smac ti ti'nae.

⁶Xicham o xa ca'i ma' ti c'alal xvulvun une. C'alal laj jambe ti'na ti snup cuni ch'ulele, ch'abal tey va'al un. Laj jsa'ilan, mi ja'uc laj jta. Xi'avet yu'un, mi ja'uc laj stac'bun.

⁷Laj yilicun ti buch'utic sbainoj ta sq'uelel ti ti'naetique, ti xvalc'uj sutbijic ta sq'uelel sjunul ti jteclume. Laj smajicun, laj syayijesicun, ¡ja'uc ti jchabiej ochebal ti'naetic yu'un ti jteclume, ta yilal yo'ntonic, laj xch'i'ic ta jatel ti chaj-chaj poc' ti smacobil jsate!

⁸Antsetic ti nacaloxuc ta Jerusalene, ti mi oy bu laj sta asatic ti snup cuni ch'ulele, albun ta jamal ti ta xavalbeic ya'i ti juteb xa ta co'nton ti ta jq'uelbe ca'i ti yuni sate.

⁹¿Mi yu'un oy c'usi lec ta xata o yu'un ti snup avuni ch'ulele, ti atuc no'ox t'ujomot ta scotol ti antsetique? ¿Mi yu'un oy c'usi lec ta xata o yu'un ti snup avuni ch'ulele, ti ta xatsatsal c'anbuncutic ti cac'uc quecutic ta spasbelot ti c'usi ta xac'ane?

¹⁰Ti snup cuni ch'ulele, saquil vinic, c'an xican yuni jol, mu xcapij xchi'uc ti ep ta mil viniquetique.

¹¹Ti sjole, co'ol s'elan bats'i oro, co'ol s'elan ic'al joj ic'-quetsan no'ox ti stsatsal sjole.

¹²Ti sbec'tac yuni sate, co'ol s'elan cha'cot paloma ti t'uxubtasbil ta chu' vacax ti cotajtic ta xcux yo'nton ta sts'el ti macbil vo'e.

¹³Ti xchoviltac yuni sate, c'otem ta jun jamal ts'unubil nichim, ti xpaq'uet no'ox smuil ti xnichtaque. Roxaetic xa ti yuni ee, mirra xa yutsil ti bu chlaj ts'ujuc yalele.

¹⁴Ti sc'obtaque, co'ol s'elan xot-xot oro, ti nichimtasbil ta bax-ton ti c'on-c'ontic sba xlablun ta q'uelele. Ti sbec'tal stacopale, co'ol jun saquil bax ton ti ch'ulbil leque, ti nichimtasbil ta yax'elan bax-tone.

¹⁵Ti yoctaque, co'ol s'elan balajtic bax-ton ti tsacanbil liquel ta sba ti pimil pech-pech oroe. Ti c'u s'elan ta q'uelele, ja' xa yilel ti ch'ut te' ti oy ta Libanoe.

¹⁶Chi' xa yutsil ma' ti spac'ove. Ti sjunul ta q'uelele, xch'ay xa ch'ulelal yu'un. Ja' jech s'elan ti snup cuni ch'ulele, ja' jech stalel ti snup cuni ch'ulele, antsetic yu'un Jerusalén.