Read Tzotzil Cantares 6 Bible Online

Cantares 6 - Tzotzil bible

Cantares 6

¹¿Bu bat ti snup avuni ch'ulele, ti atuc xa no'ox c'upil aba ta scotol ti antsetique? ¿Bu laj stam batel xana'? Ta xbat jchi'inotcutic talel ta sa'el.

²Ti snup cuni ch'ulele bat ta smalq'uinel yuni chij, ta xtuch'el yuni roxatac ta sts'unobil yuni nichim, ti bu xpaq'uet no'ox smuil ti nichimetic yu'un ta yavile.

³Yu'unun xa ti snup cuni ch'ulele, cu'un ec ti stuque. Ta smalq'uin yuni chijtac ta yut roxatic.

⁴Snup cuni ch'ulel, mu ta vocoluc ta xlo'laj ti o'ntonal avu'une, ti c'upil aba ta j'ech'el jech c'u cha'al ti jteclumetic yu'un ti Tirsae xchi'uc ti Jerusalene. Lajemun xa avu'un ya'yel jech c'u cha'al ta xtal yaq'uic ti epal soldadoetique.

⁵Mu xa loq'ueluc xaq'uelun un, yu'un ta sc'ac'al no'ox avuni sat tsalbil lic'ot yu'un ta j'ech'el. Yu'un ti stsotsil avuni jole, co'ol s'elan jtentsunetic ti xq'uiet ta vitsetic yu'un ti Galaade.

⁶Yu'un ti stanaltac avee, chapal lec scotol, co'ol s'elan epal chij ti naca to laj yich' atintasel ti chapal xa ta xich' loc'bel ti yuni stsotsile.

⁷Ti avuni chovtaque, co'ol s'elan cha'jep sc'ob granada te' ti macbil ta uni chaj-chaj poq'ue.

⁸Oy oxvinic (60) ta vo' ma' ti me' ajvaliletique, chanvinic (80) ta vo' ti ts'acal antsetique, mu no'ox albajuc ti tojol tsebetique.

⁹Yan ma' ti cuni tsebal palomae, yo' jun no'ox une, ja' no'ox jun ma' ti antsil olal ti lec yox ora voq'uesat yu'un ti sme'e. C'alal ta xilic ti jva'lej tsebetique, ta stoyesbeic sc'oplal. Ta xlequil-c'optaat xtoc yu'un ti me' ajvaliletique, xchi'uc ti ts'acal antsetique.

¹⁰¿Buch'u ya'yel le'e, ti ta xac' sba iluc jech c'u cha'al xcajet vulel ti c'ac'al ta sob ic'lumane? Jun yutsil ta j'ech'el jech c'u cha'al ti ue, ti lajemotic xa yu'un ya'yel jech c'u cha'al ta xtal yaq'uic ti epal soldadoetique.

¹¹Li' ay ta te'tic ti bu tec'ajtic ti nueze, ay jch'ay co'nton ta sq'uelel ti yaxtic'an no'ox ste'tical ti ti' uc'ume, ta jq'uel ti umajtic xa sq'uelom ti uvaetique xchi'uc ti ts'o'ol ta xnich ti granadae.

¹²Ts'acal to un, mu jna' c'usi c'ot ta pasel, ja' to laj quil ti tiq'uiluncutic ta jun carreta xchi'uc ti banquilal cu'une.

¹³Sutan talel, Sulamita, sutan talel. Sutan talel, yu'un ta jc'an ta jq'uelcutic ti asat avelove. ¿C'usi oy ta avo'ntonic ti ta xac'an xaq'uel ava'iic ti Sulamitae? Ac'otajel jech c'u cha'al ta xich' pasel ti bu lamal ti axibal naetique.