Read Tzotzil Isaías 10 Bible Online

Isaías 10 - Tzotzil bible

Isaías 10

¹Mu xa ono'ox cha'bel un, ti yanijem xa smelol avu'unic ta yalel ti oy c'usi jbel tsots albile, ti ta xapuquic ta yalel ti mantal ti c'ot ta chapel avu'unic ti mu ts'icbaj ti yipe,

²ti mu ja'uc xatic' abaic ta spacbel sc'oplal ti buch'utic mu xpac yu'un ti sc'oplalique, mi ja'uc xa xavac'beic ta venta sc'opic ti buch'utic abol sbaic ti oy ta jlumale, ti ta xavilbeic svocol ti me'unal antsetique, ti naca yelc'anbe no'ox ti c'usitic yu'unic ti buch'u mu'yuc buch'u x'ayan yu'unique.

³¿C'usi ta xavut abaic un, ti c'alal ta xa'ich'bat ave'ique, ti c'alal ta xavilic ti le' xa xtal ti tsitsele? ¿Buch'u ta xbat atijbeic sjol ta sc'anel ti pojele? ¿Bu ta xavaq'uic comel ti ac'ulejalic une?

⁴Ti mi mu'yuc ta xa'aq'ueic ta xq'uexlale, mi mu'yuc chucbil ta xabatique, ta xc'ot ta atojolic jech c'u cha'al ti buch'utic ta xlajic ta milele. Jech ec ti Diose mu'yuc to lamajem ti sc'ac'al yo'ntone, staoj to yav ta sibtasvan.

⁵Xi laj yal ti Diose: “Ma' ti ajvalil yu'un Asiriae ta xc'ot ta jte' ti ta jtunes ta tsitsvanej ti c'alal capem ti jole, ti c'otem ta jvach' ti c'alal soquem ti jole.

⁶Ta jtac ech'el ta svoliel ta yilbajinel ti chopol lume, jun muc' ta lum ti ta soquesbun ti co'ntone, yo' jech ta xc'ot ta pasel ti pojbaticuc ti elc'anbaticuc ech'el ti sc'ulejalique, yo' jech yich'icuc pech'el ta teq'uel jech c'u cha'al ti ach'el ta bee.

⁷“Ti ajvalil yu'un Asiriae, mi ja'uc jech ta snop, mi ja'uc jech ta xac' sjol, mi jutebuc jech ma' ti snopoj ta spase. C'ajomal no'ox oy ta yo'nton ta stsutses ya'ie, ti ta xilbe svocol ti ep ta chop ti muc'tiquil lumetique.

⁸Xi ta xalbe sbae: ‘Scotol ma' ti ajvaliletique c'otemic ta banquilaletic cu'un ta sventa ti jmantale.

⁹Co'ol c'otemic ta xca'i ma' ti lumetic ta jventae jech c'u cha'al ti lum Calnoe xchi'uc ti Carquemise, ti Hamate jech c'u cha'al ti Arfade, ti Samariae jech c'u cha'al ti lum Damascoe.

¹⁰Laj jta muc'tiquil lumetic ti mu albajuc ta j'ech'el ti sdiosique, ti ep ta j'ech'el ti c'usitic loc'tabil yu'unique, ti ja' mu sta oy sdiosic ti Jerusalene xchi'uc ti Samariae.

¹¹Ja' yu'un un cha'e, ti c'u s'elan laj jpasbe ti Samaria xchi'uc ti sdiosique, ¿mi mu van xu' jech ta jpasbe ec ti Jerusalén xchi'uc ti c'usitic loc'tabil yu'unique?’ ”

¹²C'alal c'ot ta pasel yu'un Dios ti c'u s'elan sc'an ta spas ta vits Sione xchi'uc ti ta Jerusalene, ta stsits ti ajvalil yu'un ti Asiriae ti stoyoj sba xchi'uc ti yabtele, ti ech'em cajal xa'i sbae.

¹³Ti ajvalil yu'un ti Asiriae xi ta xalbe sbae: “Ta yipal ta jtsatsal, c'ot ta pasel cu'un, bijbijun xca'i jba, xitojob ta snopel. Laj jtenbe loq'uel sts'aquil yosil ti muc' ta lumetique. Laj cu'ninbe ti sc'ulejalique jech c'u cha'al junuc tsatsal vinicun xca'i jba ti laj jvalc'unan ti ajvaliletique.

¹⁴Laj jtic' coc jc'ob ta yu'ninbel sc'ulejal ti lumetique. Laj cu'nin scotol ti osil banomile jech c'u cha'al oy buch'u ta sta ton mut ti tenbil xa comele, ti mu'yuc xa jcotuc mut laj to xlich'olan ti xiq'ue, ti mu'yuc xa jcotuc laj sjam ye ti xch'ivlajet xae.”

¹⁵Ja'uc le' une, ti eq'uele, ¿mi xtoyet xa xa'i sba ta stojol ti buch'u ta stunesat yu'une? ¿Mi xtoyet xa xa'i sba ti tuch'ob te' ta stojol ti buch'u ta xquililanat yu'une? Ja' jech ti vaxtonile, tojol te' no'ox, mi ja'uc pasbil ta mantal yu'un ti buch'u yich'oj batele.

¹⁶Jech o xal un, ti Dios ti scotol xu' yu'une, mu'yuc xa yipal ta xc'otic yu'un ti buch'utic tsots xa'i sbaique, xchi'uc ta xc'ot ta pasel yu'un ta xtil ti sbec'talic ti cajtsajem ti sc'ac'alique.

¹⁷Ti ch'ul Diose, ti c'otem ta saquil osil yu'un ti Israele, ta sjoybin sba ta leb c'oc'. Ta jun no'ox c'ac'al, ta xchic' ta slilin scotol ti ch'ixtique, ti jobeltic ti oy ta lume.

¹⁸Ta j'ech'el ta slilin ti c'upil sba te'tic yu'unique, ti ts'unubaltic yu'unique. Co'ol to s'elan jun jchamel ta xicta comel ti ch'abal xa ti yipal yu'unique.

¹⁹Bejantic xa ta xicta comel ti te' ta yut ti te'tique, ti xchap xa no'ox ta atel yu'un ti jun biq'uit olole.

²⁰Ta yorail taje, ti c'u xa yepal com ti Israele, ja' ti buch'utic ja' steclumal ti Jacob ti colic toe, mu xa xba sa' spojelic ta stojol ti buch'utic soquesatic yu'une. Ta sjunul yo'ntonic ta sa' spojel scoltaelic ta stojol ti Ajvalil Ch'ul Dios yu'un ti Israele.

²¹Mu xa yepaluc steclumal ti Jacobe, ta sutic talel ta stojol ti Dios ti mu stac' tsalele.

²²Ac'o mi co'ol s'elan syi'al ti'il nab yepal alumal, Israel, jun chib xa no'ox ta sutic talel. C'ot xa ta nopel ma' ti ta xich' tubel ti sc'oplale, ti j'ech'el ta xich'ic chapanele.

²³Ti Dios ti scotol xu' yu'une, c'ot xa ta nopel yu'un ti ta sliline, ti ta xc'ot ta pasel yu'un ta stojol scotol ti muc' ta lume.

²⁴Xi ta xal ti Dios ti scotol xu' yu'une: “Jteclumaltac ti nacaloxuc ta lum Sione, mu xaxi'ic yu'un ti asirioetique, ac'o mi ta xa smajoxuc xchi'uc ti xvach'ique, ac'o mi ta syales ti yoc sc'obic xchi'uc ti xvaxtone jech c'u cha'al laj spasic ti egipcioetic ta atojolique.

²⁵Yu'un li'tic xa no'ox batel ta xc'ot ta pasel ti tsitsele, ti ta jtubbe sc'oplal ya'iic ta j'ech'el ta scapemal ti jole.

²⁶Ta stsitsatic yu'un Dios ti scotol xu' yu'une jech c'u cha'al ti c'alal laj stsal ti Madián ta tontic yu'un ti Orebe. Yu'un ta xac' iluc ti smuc'ul stsatsal ta scontrainel ti Asiriae jech c'u cha'al laj yac' iluc ta stojol ti Egiptoe.

²⁷Ti jech c'ac'al taje, ta xc'ot ta pasel ta xayalesbat ti avicatsic acuchojique. Ta xc'ot ta pasel ta xtub sc'oplal ti jun to yabtejeb vacax ts'otol ta anuq'uic ti ilbajinbiloxuc yu'unique.”

²⁸Ti j'ilbajinvanejetique le' xa xtalic ta Rimone, vulic xa ta Ajat, ech'ic xa talel ta Migrón, laj yicta comel ti yicatsic ta Micmase.

²⁹Laj xa xtuch'ic jelavel talel ti ach'eltic ta spul-pulil banomile. Ta xvul slaman sbaic ti sbiinoj Guebae. Bat xa xch'ulelic ta xi'el ti jnaclejetic ta Ramae. Xbitetic xa ta jatobal ti jnaclejetic ta lum Guibeá yu'un ti Saule.

³⁰Avetanic xa liquel, jnaclejetic ta Bat-galim. A'yio ava'iic ec un, jnaclejetic ta Laisa. Taq'uic ec un, jnaclejetic ta Anatot.

³¹Ti jnaclejetic ta Madmenae xbitetic xa batel ta jatobal; ti jnaclejetic ta Guebime bat snac' sbaic.

³²Avi tana li'e, ta xvul slaman sbaic ta Nob ti j'ilbajinvanejetique; ta xac' xa iluc senyail ta stsac ta leto ti lum Sione, ja' ti Jerusalene.

³³Q'uelo avilic un, ti Dios ti scotol xu' yu'une, toj xi'bal sba ta sjunul yip ta slomes yalel ti te'tique; xjipte-jipte no'ox yalel ti natiquil te' ti laj yich' lomesele, xq'uiet no'ox batel ta lumtic ti bu spajeb snatiquile.

³⁴Ta jun no'ox eq'uel, ta sjip yalel ta lum ti pimilal te'tic ta j'ech'ele; ti c'upil sba te'tic ta Libanoe, xq'uiet no'ox yalel ta lumtic.