Read Tzotzil Isaías 21 Bible Online

Isaías 21 - Tzotzil bible

Isaías 21

¹Xi s'elan ta xcaj'albat sc'oplal ma' ti sventa sbajtical banomile: Co'ol to s'elan jech c'u cha'al junuc sutub ic' sts'otet no'ox talel le' ta yolon ti yac'ol xocon sloq'ueb c'ac'ale, ta xlic talel ta sbajtical banomil ti toj xi'bal sba ta xc'ot ta pasele.

²Xi'bal sba ta j'ech'el ti xi s'elan laj yac'bun quil ti Diose: Ti jpayvaneje ta x'ac'van ta c'abal. Ta x'ac'van ta vocol ti j'ac'vanej ta vocole. Lican va'lan, Elam. Volvananic, medoetic. Ta'lo xa xca'i ti oy buch'u x'ajetique.

³Xt'elt'un xa yu'un ti jbec'tal jtacopale. Xibalet xa xchi'uc xc'uxul jech c'u cha'al jun ants ti xbalet xa xchi'uc xc'uxul xch'ut ti c'alal ta svoq'ues ti yole. Mu xa xca'i c'usi ta xc'ot ta pasel yu'un ti vul o'ntone. Mu xa xquil c'usi ta xc'ot ta pasel ti batem ti jch'ulel ta xi'el yu'une.

⁴Mu xa xac' ti snopbenal ta xca'i yu'une. Xit'elt'un xa yu'un ti xi'ele. Ti lec to ox ta xca'i ti jun yutsil siquet ti mal c'ac'ale, c'ot ta pasel ta jtojol un ti xi'bal sbae.

⁵Chapal xa ma' ti mexa une. Lich'il q'uiil xa ti tec'obaletique. Lic xa ma' ti ve'el uch'obajele. Xi albatic ma' ti banquilaletic yu'un ti soldadoetique: Lican va'lanic, ts'ayetuc no'ox liquel avu'unic ta stsaquel ti macobbailetique.

⁶Yu'un xi laj yalbun ti Diose: “Batan, ba va'ano junuc jchabivanej yo' jech xchapet ta xal scotol ti c'usi ta xil ta xc'ot ta pasele.

⁷Mi ta xil ta xtal carreta ti nitbil ta cha'cot ca'e, mi ta xil ti oy buch'u cajalic ta xtal ta burroe, mi jchop o ta chon bolom ti camello sbie, ti stuc'ulanuc lec ta sq'uelele.”

⁸Xi lic avanuc ti buch'u va'anbil ta q'uel osile: “Dios, ti bu va'anbilun ta sq'uelel ti osile, va'alun scotol c'ac'al. Jujun ac'ubal, jun co'nton cac'oj jsat ta sq'uelel ma' ti osile.

⁹Le' xa xtal jcot carreta ti nitbil ta cha'cot ca' ta xquile.” Va'i un, oy buch'u xi laj yal une: “¡Yal xa ta lum pisil une. Yal xa ta lum ti lum Babiloniae! Scotol ti sloc'obbail diosetic yu'unique, mu'yuc smelol busul com ta banomil.”

¹⁰Jteclumal, laj avich'ic pech'el ta teq'uel jech c'u cha'al ta xich' pasbel ti trigoe, pisile, laj calbot ava'iic ti c'u s'elan laj ca'i ti laj yal ti Ajvalil ti scotol xu' yu'une, Dios yu'un ti Israele.

¹¹Xi s'elan ta xcaj'albat sc'oplal ta xlic yich' contrainel ti lum Edome: Yu'un oy buch'u xi x'avet ta xalbun ta xlic talel ta Seire: “Jq'uel-osil, ¿jayib xa ora x'ech' batel ti ac'ubaltic taj une? Jq'uel-osil, ¿jayib xa ora x'ech' batel ti ac'ubaltic taj une?”

¹²Xi ta stac' ma' ti jq'uel-osile: “Ta xa sacub talel ti osile. Ja'uc le' une, jutuc xa sc'an och talel ti ac'ubale. Mi oy c'usi ta xajaq'uique, jaq'uic, sutanic talel xtoc un.”

¹³Ti sbajtical banomile, xi ta xcaj'albat ti sc'oplale: Jbolomajeletic ti ta x'ech' avu'unic ac'ubal ta chuculaltic ta sbajtical banomil ti liquemoxuc talel ta Dedane,

¹⁴loc'anic talel ta snupel ta be ti buch'utic ta xa'iic taqui ti'ile, ac'beic yuch' vo'. Jnaclejetic ta lum Tema, loc'anic talel ta snupel ta be ti buch'utic jatvilique, ac'beic ti sve'ele.

¹⁵Yu'un ja' jatviletic ti ta xlajic ta milel ta espada ti lec juxbil ti yee. Ja' jatviletic ti ta xlajic ta milel ti chapal xa ta xach'batic ti yolobe, ti capem xa jolil yu'un ti ac'-letoe.

¹⁶Yu'un xi laj yalbun ti Diose: “Li' ta jun jabile, mu stselbuj jech c'u cha'al jun abtel ti xchapanoj lec c'u sjalil ta xc'ot ta pajel ti yabtele, jech tub xa ox scotol yutsil slequilal ti Cedare.

¹⁷Yu'un jun chib xa no'ox ta xcom syolobic ti j'ac'-letoetic yu'un ti lum Cedare.” Ti va'i s'elan taje, ja' ta xal ti Ajvalile, Dios yu'un ti Israele.