Read Tzotzil Isaías 24 Bible Online

Isaías 24 - Tzotzil bible

Isaías 24

¹A'yio ava'iic, ti Diose, sts'ijlajan ta xicta comel ti banomile. Ta soques, ta slilin ta j'ech'el. Tan puc ta xbat yu'un ti jnaclejetique.

²Jech ta xc'ot ta stojol ti paleetique, ti jteclumetique. ti ajvalile, ti mosovile. ti me' ajvalile, ti me' mosovile. ti jchonolajele, ti jmanolajele. ti buch'u ta xac' ta ch'ome, ti buch'u ta xch'amunaje. ti buch'u oy yile, xchi'uc ti buch'u yac'oj ta ch'ome.

³Ta j'ech'el sts'ijlajan ta xcom ti banomile. Scotol ta xich' pojel batel ti c'usitic x'ayane. Yu'un ja' jech loc' ayan ta yo'nton ti Dios ti jech ta xc'ot ta pasele.

⁴Ti banomile, lamal ta xc'ot ta stojol ti svocole, ti ta xmolib yayilub xchi'uque. Scotol banomil un mu xch'i xc'opoj ta xa'i. Ti vinajel banomile ta xlic ochicuc ta at o'ntonal.

⁵Ti jnaclejetique laj xa soquesic ti banomile. Mu'yuc xc'ot ta pasel yu'unic ti oy c'usi jbel albile. Laj sbajic ti mantaletique. Laj sten laj sjipic ti trate ti oy sc'oplal sbatel osile.

⁶Jech o xal un, laj sta bac vocol ti banomil ti c'ot ta stsutsel yu'une. Ti jnaclejetic yu'une ta xich' svocolic yu'un ti tsitsele. Ja' yu'un un, jutebaj xa ti jnaclejetique, jun chib xa no'ox oy.

⁷Ch'abal ta tael ma' ti vinoe. Ti ts'un uvae, ta stsaqueic ta chamel. Ti buch'utic xmuyubajic no'ox ta banomile, batem xa xch'ulelic yu'un ti at o'ntonale.

⁸Tub sc'oplal ma' ti xmuyubajic no'ox ti xlomet no'ox ti tampoletique, ti arpae. Sts'ijlajan com ma' ti xvochetic xmuyubajic no'ox ta sq'uelel ti c'usitic xch'ay o'ntonal yu'un, xchi'uc ti buch'utic lec xil sbaique.

⁹Laj to me sc'oplal unbi ta yuch'el ma' ti vino ti xlomet xchi'uc ti vobe. Mu xyal ta biq'uel ta xa'iic vino ti buch'utic xyalic ta yuch'el ta scoj ti mu xnel mu x'ech' ti svocolique.

¹⁰Lilij xa ma' ti lum ta scoj ti mu xa'i sbaic ti jnaclejetique. Mu xa ochbaj ta jbejuc ti nae.

¹¹X'oq'uic xa ma' ti jnaclejetic ta calleetique, ja' ti mu'yuc xa ta tael ti vinoe. Nom to c'ot ta banomil ti muyubajele.

¹²Lilijem xa ma' ti lume. Laj xa yich' lilinel ta voq'uel ma' ti sti'tac ta j'ech'ele.

¹³Scotol ti muc'tiquil lum ta banomile, xi s'elan ta xc'ot ta stojole: Co'ol s'elan jech c'u cha'al ta xich' jisel ta te' ti aceituna ti ta xich' lilinbel ti sate, mi mo'oje, co'ol s'elan jech c'u cha'al ta xich' chajel ta c'uxc'ultael ti uva c'alal mi laj xa ox yich' tulele.

¹⁴Ti buch'u cuxul to ta xcomique ta xlic avanicuc ta muyubajel. Ta stuq'uil to yu'un smaleb c'ac'al ta xvinaj ta xc'opojic talel c'alal ta xilic yich'oj tsots yabtel ti Diose.

¹⁵Ja' ec ti buch'u oyic ta sloq'ueb c'ac'ale, xchi'uc ti jnaclejetic ti oyic ta sti'il nabe, ta xalbeic yutsil slequilal ti Ajvalil Dios yu'un ti Israele.

¹⁶Ta jot to xchiquin banomil, ta xca'itic ti oy buch'u xi ta xq'uejintae: “Ich'biluc ta muc' ti buch'u xa'ibe ti sni' xchiquinale.” Ja'uc le' une xichi laj cale: Mu xa ono'ox cha'bel un, mu cha'bel ti ch'abal ti jlequil cutsilale. Ti jpayvanejetique mu'yuc xch'ulelic ta x'ac'vanic ta milel.

¹⁷Ti jnaclejetic ta banomile co'ol s'elan te'tical chon bolometic ti nutsbilic yu'un ti jnutsuviletique, ti xi'bal sba xyalic ta jun ch'ene, mi ta jun pets'e.

¹⁸Mi col to yu'un ti jnutsvaneje, ta xbaj ochel ta jun ch'en. Mi loc' to ech'el ta ch'ene, ch'ambil ta xc'ot ta pets'. Banomilal vo' ta xtal ta vinajel. Ta xnic yoyaltac ti banomile.

¹⁹Mu no'ox albajuc ta xnic ta xc'uy ta j'ech'el ti banomile, ti ta xjav ta j'ech'ele.

²⁰Xvuc'uq'uet ta jujot ti banomile jech c'u cha'al junuc jyacubel ti xvuc'lajet ta jujujote. Ta xnic ta j'ech'el jech c'u cha'al junuc vacax na ti naca tey quiquile. Toj ol ta j'ech'el ti smul xcuchoje. Mi ja'uc xa ta stam sba mi yal ta lume.

²¹Ti jech c'ac'al taje, ti Diose ta stsits ti c'usitic tsots yich'oj yabtel ta vinajele, xchi'uc ti ajvaliletic ta banomile.

²²Ta svol ta tsobel. Ta stic' ta jun chuquinab ti bajal ta xcom yu'une. Ta sjalil to un, ta xlic tsits.

²³Ti Dios ti scotol xu' yu'une, ti c'alal ta xlic ochuc ta Ajvalil ta vits Sione, ti ta lum Jerusalene, ti c'ac'ale, ti ue, ta x'ic'ub. Ti banquilaletic yu'un ti steclumale ta xilic yutsilal slequilal ti Diose.