Read Tzotzil Isaías 25 Bible Online

Isaías 25 - Tzotzil bible

Isaías 25

¹Cajval, ti Diosot cu'une, ta xcac'ot ta toyesel ac'oplal, ta xcalbot avutsilal alequilal, yu'un c'ot ta pasel avu'un ti c'usitic jun yutsiquil anopoje, ti vo'ne xa sliquel avu'une, ti j'ech'el mu stselbuje, ti jbel sc'oplal ta xc'ot ta pasele.

²Naca xa ton lamal com avu'un ta jteclumetique, ti lilij ta j'ech'el avu'un ti spimil mocale. Lilij ta j'ech'el avu'un ti na bu chotajtic ta spasic mantal ti avajcontrae, ti mu ja'uc xa ta xlic xcha'va'anique.

³Ti jech taj une, ti jun pucujil lume ta xlic yich'ot ta muc'. Ti jnaclejetic ta jteclumetic ti mu'yuc xch'ulelic ta j'ech'ele, ta xlic xi'taot.

⁴C'otemot ta spojobbail ti me'un mu'nate. C'otemot ta jc'opojel yu'un ti buch'u sc'anuc xa ya'i bu ta sta pojel c'alal ilbajinbile. C'otemot ta pojobbail yu'un ti c'alal xchajet ti vo' xchi'uc ti yic'ale. C'otemot ta queoval yu'un ti c'alal toj c'ux ta j'ech'el ti c'ac'ale. Spucujilic ti buch'utic spajebal o xa ti mu'yuc xch'ulelique, co'ol s'elan jech c'u cha'al ti c'alal xchajet no'ox ti vo' xchi'uc ya'lel ta yorail sique.

⁵Mi mo'oje, co'ol s'elan jech c'u cha'al xq'uixnal ti taquin banomile. Ti epal jcontrainvaneje, ta xapajesbe ta be ti sc'ac'al yo'ntonique jech c'u cha'al siquet xa ti banomil c'alal ta xmac ta toc sat ti c'ac'ale. Ti buch'utic spajebal xa o ti mu'yuc xch'ulel xa'i sbaique, mu xa xtoy ti yeique.

⁶Ti Dios ti scotol xu' yu'une, ta vits Sión, jun yutsiquil ve'liletic, uch'bolaletic, xchi'uc vino, ta xchapan ta sventa scotol ti muc'tiquil lumetique. Ech'em lec ta jmec ti ve'liletique, ti uch'bolaletic ta x'ac'batique.

⁷Ti ta vits li' une, ti Diose ta slilinbe loq'uel ti oy c'usi macal o sat scotol ti lumetique, ti co'ol s'elan jlic poc' smacoj scotol ti muc'tiquil lumetique.

⁸Ti Diose j'ech'el ta stubbe sc'oplal ti lajel tubebale. Ta scusbe ya'lel sat scotolic. Ta xch'aybe ta banomil scotol ti mu'yuc yutsil slequil sc'oplal ti slumale. Ja' Dios laj yal stuc ma' taje.

⁹Ti jech c'ac'al taje, xi ta xalique: “Le' une, ja' me ma' ti Dios cu'untic une. Laj jpat co'nton ta stojol. C'ot ta pasel ti laj spojotique. Xlaetuc co'ntontic, muyubajcutic ti laj scoltaotique.”

¹⁰Ti Diose sbainoj ta xchabiel ta yoc ta sc'ob stuc ti vits Sione. Ja'uc ti lum Moabe, ta xlic xpech'olan ta teq'uel jech c'u cha'al ta xich' pech'olanel ta teq'uel ti jobel ti bu yavil c'a'epe.

¹¹Ti Moabe sjimolan xa sc'ob jech c'u cha'al ta spas ti jnuxinajele. Yantic xa stsul yalel ti stoyobbail ti jujucoj ta syobilan sbae.

¹²Ti Diose ta sjinesbe yalel ta lum ti toyol ta j'ech'el ti smoquique, ti tsots lec yipe. Ta sjinesbe yalel ti busul ta xicta comel ta lumtic scotole.