Read Tzotzil Isaías 26 Bible Online

Isaías 26 - Tzotzil bible

Isaías 26

¹Ti jech c'ac'al taje, ta xich' q'uejintael q'uejimol ti xi s'elan ta xq'uejinic ta slumal Judae: “Oy jun tsatsal jteclum cu'untic ti xu' ta xispojotique, ti laj sva'anan moquetic xchi'uc pojobbailetic ti Diose.

²Jamic ti sti'taque yo' jech ta x'och talel jun lum ti xa'ibeic sni' xchiquinale, ti staoj yav jun yo'nton ta spasel ti c'usi leque.

³Dios, vo'ot avac'ojbe slamajel yo'ntonic ti buch'utic mu sna' syanijes ti sjol yo'ntonique, yu'un spatoj yo'ntonic ta atojol.

⁴Ta j'ech'el, pato avo'ntonic ta stojol ti Diose, ja' apojobbailic sbatel osil.

⁵Ta stubbe stoyobbailic ti buch'utic cajal xa'i sbaique. Ta spec'tsanbe sc'oplal ti jteclum ti toyobba xa'i sbaique, ti j'ech'el ta sjip ta lume.

⁶Ta xpech'eic ta teq'uel yu'un ti buch'u mu'yuc ich'bil ta muq'ue xchi'uc ti me'un mu'nate.”

⁷Tuc' stamoj ech'el ma' ti buch'u xa'ibe sni' xchiquinale; ta ave ati' ti mu'yuc macal ta xc'ot yacanic ta be ti bu stamojic ech'ele.

⁸Ta jbel sc'oplal oy yip co'ntoncutic ti jtamojcutic batel ti c'u s'elan ta xac' ta na'el ti oy c'usi jbel albil avu'une, Cajval, ti juteb ta co'ntoncutic ti oyucot ta na'el cu'uncutique.

⁹Jic' xa ma' ti co'nton ta ac'ubaltique, yut to co'nton ta x'ayan talel ta sa'elot. C'alal ta xlic achapan ti banomile, ta xlic xchanic ti jnaclejetique c'u s'elan ti stuq'uil jol o'ntonale.

¹⁰Manchuc mi ayalesoj syail xc'uxul avo'nton ta stojol ti buch'utic toj chopolique, mu xc'ot ta yo'ntonic ta pasel ti c'usi leque. Mu'yuc xch'ulelic ta spas sbaic ta stojol ti jnaclejetic ti lec sc'oplalic li' ta banomile, mu ja'uc xaq'uic ta venta ti jelavem smuc'ul stsatsal ti Diose.

¹¹Cajval, chapal xa avu'un ti tsitsele, mi ja'uc sc'an xaq'uic ta venta un. C'alal ta xilic ti mu albajuc ti syail xc'uxul avo'nton ta sventa ti ateclumale, q'uexlaltasbil ti sba satic ta xc'ote. Oyuc la ta alel ti lajicuc ta chiq'uel yu'un ti sc'ac'al avo'ntone.

¹²Cajval, vo'ot ta xavac' ti oy c'usi lec ta jtacutique. Ta melel cac'tic ta xatic' aba ta spasel ti cabtelcutique.

¹³Cajval, Dios cu'uncutic, yan ajvaliletic ma' ti buch'utic lic'otcutic ta jtunel yu'une, ja'uc avi tana une, ta jna'cutic ti vo'ot Cajvalotcutique.

¹⁴Chamic xa ma' ti stuquique, mi ja'uc xa ta xcuxiic talel, co'ol s'elan junuc queov ech'ic; mi ja'uc xa ta stam sbaic liquel, laj xa atsits, laj xa atubbe sc'oplal. C'ot xa ta pasel avu'un ti tub xa ta o'ntonal ti na'bil to ox ti sc'oplalique.

¹⁵Laj avac' epajuc ti muc' ta lume, Cajval, ti ch'i c'opojic avu'un ta sventa ti junuc yutsil ti ac'oplale. Laj ajamalubtasbe ech'el ti bu ta x'ech' sts'aquil ti yosilique.

¹⁶C'alal yacal ti ilbajinele, laj jsa'otcutic, Cajval, ti laj atojobtasuncutique, naca ta uni coscos c'op no'ox.

¹⁷Oyuncutic ta atojol, Dios, co'ol s'elan jech c'u cha'al jun ants ti xchi'uc yole, ti c'alal xa ta xc'ot yorail ta svoq'uese, x'avet, xbalet liquel xchi'uc ti xc'uxule.

¹⁸Yu'un co'ol s'elan laj quilcutic ma' ti banomil ya'yele, ja'uc le' une, mu'yuc c'usi laj quilcutic ta jsatcutic, jeche' no'ox ech' ti vocole. Mu'yuc laj sta spojel scoltael cu'uncutic ti lume, mi ja'uc ta xvoc' jnaclejetic ta snojesel ti banomile.

¹⁹Ja'uc ti animaetic avu'une, ta xcha'cuxiic. Ta xcha'cuxiic ti chamem xa ti sbec'tal stacopalique. Ti telel xa ta xvay sbec'talic ta banomile, ta xvul xch'ulelic, xmuyubajic xa ta xlic avanicuc. Ta xavac' talel axojobal jech c'u cha'al junuc job ac'ubal. Ti animaetic une ta xich' sbec'talic ti ta xvulic ta loq'uel ta banomile.

²⁰Batan, jteclumal, ochan batel ta ana. Maco ti ti'na ta apate. Nac'o aba uni jliqueluc, ja' to mi ech' sc'ac'al yo'nton ti Diose.

²¹Ti Diose ta xloc' talel ta spasob mantal yo' jech ta stsits ti jnaclejetic ta banomil ta scoj ti smule. Ti banomile ta j'ech'el mu snac' ti c'u yepal lajem ta stojole. Ta svinajes ti c'u yepal lajem ta milele.