Read Tzotzil Isaías 27 Bible Online

Isaías 27 - Tzotzil bible

Isaías 27

¹Ti Diose, ta sventa ti jelavem xu' yu'un ti yespadae, ta stsits o ti Leviatán ti muc' ta Dragón chon ti xnaquet ta muc' ta nabe, ti xotol xchapoj sba ti luquetel chon Leviatán ti jech c'ac'al taje.

²Ti jech c'ac'al taje, xi ta xal ti Diose: “Q'uejintaic ti lequil ts'unubal uvae.

³Jbainoj ta xchabiel ti vu'un Diosune. Mu xquicta ta smaltabel ya'lel. Jbainoj ta xchabiel c'ac'al ac'ubal yo' jech mu xich' ilbajinel.

⁴Mu'yuc capem jol yu'un. Ti oyuc xch'ixale xchi'uc smomolale, ta xiloc' ech'el ta stsaquel ta leto ya'iic, ti ta jchic' ta j'ech'ele.

⁵Mi ta sc'an ta jchabiele, lamajuc yo'nton ta jtojol. Melel cac'tic, lamajuc yo'nton ta jtojol.”

⁶Le' batele, ti slumal Jacobe ta xlic yac' ep yi'bel. Ti Israele ta xlic puluc sq'uelom. Ta xlic nichimajuc. Ta xlic snojesic banomil ta sventa ti sate.

⁷Ti Diose mu'yuc yac'ojbe tsitsel ti Israel jech c'u cha'al laj yac'be tsitsel ti j'ilbajinvanejetic yu'unique. Mi ja'uc cham yu'un ti Israel jech c'u cha'al cham ti jmilvanejetic yu'unique.

⁸Ti Diose laj stsits ti slumal ti laj stac loq'uel ta sbanomilique. Tsots laj xvuch'ta loq'uel jech c'u cha'al tsots ic' ta xlic talel ta sloq'ueb c'ac'ale.

⁹Ja'uc le' une, ta xch'aybe smul scolo' ti Jacobe. Ta xich' ch'aybel ti bu jelavic une, ti xi s'elan sc'an spasique: Ti xch'uch'ultaicuc ta voq'uel yaltar ti sdiosique jech c'u cha'al ta xich' lilinel ta voq'uel stonaltac ti tane, mi ja'uc junuc va'al ta xcom jbejuc ti balal ch'ul te'e, mi ja'uc yaltaril ti chic'obil pom yu'unic sventa yich'obil ta muc' ti sdiosique.

¹⁰Ti jteclum ti macbil lec ta moque, xch'uch'ulil xa busul com jech c'u cha'al jbej na ti jipbil xa comele, jech c'u cha'al ti sbajtical xa banomil yilel ti ch'abal ti jnaclejetique. C'ot ta yavil q'uelob vacax ti bu ta slo'ic batel ti yanaltac te'e, ti lamalic xa ta xcux yo'nton ta yolone.

¹¹Sc'obtac ti te'e ta sc'as c'alal mi taquij xae. Ti antsetic une ta stsobic talel yo' ta stsanic o c'oc' xchi'uquic. Mu'yuc sbijilic ta j'ech'el ma' ti jun lum taje. Jech o xal un, mi ja'uc juteb ta xc'uxubaj yo'nton yu'unic ti Jmeltsanvaneje, ti J'ac'-ch'ulelal yu'unique.

¹²Ti jech yorail taje, ti Diose ta sliques talel yabtel jech c'u cha'al ti buch'u ta smaj ti trigoe, ti ta xlic talel ta stuq'uil uc'um Eufratese, ta xc'ot ta uc'um yu'un Egipto. Ja'uc ti vo'oxuc une, Israel, ta jujun ta xavich'ic tsobel talel.

¹³Ta yorail taje, ta xich' oq'uisanel ti muc' ta oq'uese. Ti buch'utic ch'aybil batic ta Asiriae, ti bec'bil batic ta lum Egiptoe, ta xtal yich'ic ta muc' Dios ta Jerusalén ti ta ch'ul vitse.