Read Tzotzil Isaías 28 Bible Online

Isaías 28 - Tzotzil bible

Isaías 28

¹Mu xa ono'ox cha'bel un, jteclum Samaria, ti cajal toyol c'otem ti mu'yuc xa buch'u jech xtaun o ta xa'i ti c'otem ta xnichimal sronail sjol ti Efraine, ti batem yo'nton ta yacubel ti lum taje. ¡Laj to c'op ma' ti ch'alalic ta jun yutsil nichime, yu'un taquij xa ti jun yutsil q'uiil ta stenlejal ve'ebal banomile, lum ti uninbilic ta yuch'el ti vinoe!

²Ti Diose sva'anoj xa jun tsatsal vinic ti cuchem yu'une, ti naca xjipvan no'ox ta lume, jech c'u cha'al ti bot xchi'uc ti yic'ale, jech c'u cha'al banomilal vo' ti ta soquesvane, ti xbalaq'uin no'ox ta smut'ian comel ta j'ech'ele, ti ta xjipvan ta lume,

³ti naca xpech'van no'ox comel ta teq'uel ti cajal toyol xa'i sbae, ti stuc xa no'ox jech mu'yuc buch'u xtaun o ta xa'i ti c'otem ta xnichimal sronail sjol ti Efraín ti jyacubel jteclum taje.

⁴Laj ta c'op ma' ti ch'albil ta jun yutsil nichime, yu'un taquijem xa. Ti q'uiil ta stenlejal ve'ebal banomile, co'ol s'elan sba sat icux ti xi s'elan ta xc'ot ta stojole: Naca to no'ox c'ot ta sat ti buch'u laj yile, lo' xut ta anil.

⁵Ti Dios scotol xu' yu'une ta xch'al ta rona ta jun yutsil slequil ti steclumal ti c'u yepal com ti jech c'ac'al taje.

⁶Ta stic'be ta sjol ta sbaquil ti jchapanvanejetic ti lequil chapanvanicuc ta chapanobbaile. Ta xac'be yip yo'ntonic ti soldadoetic ti buch'utic ta xchabiic ti lume.

⁷Oy yan xtoc ti xi s'elan c'otem ta stojolic ti naca xa xtamlajetic yu'un ti vinoe, ti naca xa sts'elajetic ta jujot yu'un ti pasem ya'lel uvae: Ma' taj une, ja'ic ti paleetique, ti j'alc'opetique, ti naca xa xtamlajetic ta scoj ti pasem ya'lel uvae. Mu xa stac' a'yeluc ta xa'iic xchi'uc ti vinoe. Naca xa xtamlajetic xchi'uquic ti pasem ya'lel uvae. Xtamlajetic ta yalel ti oy c'usi ta x'ac'bat yilic ti yalojique, xchi'uc ti jyacubelic ta yalel ti jbel ma' ti ta xloc' ta ye ti chapaj ti c'op yalojique.

⁸Noj ta j'ac'-ib-o'nton xenel ti mexaetique. Mi ja'uc jutebuc ma' ti mu'yuc yatinoje.

⁹Xi ta xalic jc'oplale: “¡La', la' ac'bun quilcutic ti c'usi sc'an pasel une, ta yaq'uel jna'cutic ti c'u s'elan laj yac'bot avil ti Diose, ti co'ol to s'elan c'otemuncutic ta uni biq'uit olole,

¹⁰ti naca to ta xchan talel ti vun ti xi ta xloc' ta alel yu'une: ba be bi bo bu!”

¹¹Lec un cha'e, mi mu xc'ot ta yo'ntonique, ta xich' alel ta jun chucul c'op, ta yan o c'op ti Dios ta sc'oponan ti lum li'e.

¹²Yu'un xi ono'ox laj yalbeic talel ta vo'ne: “Li' ta tael ma' ti slamajemal o'ntonale, ti xcuxobil o'ntonale, ta xcuxel yo'nton ti buch'u yalem xa ta lum yu'un ti svocole.” Ja'uc le' une, mu'yuc laj yaq'uic ta venta.

¹³Jech o xal ta xc'oponatic yu'un ti Diose jech c'u cha'al biq'uit ololetic ti yacalic to ta xchanel ti vune. Ti jech ta xliquic ta xanobal une, taj to javal ta xc'otic ta svalopatic. Ta syayijes sbaic. Ta xbajic ta pets' ti ts'otol ta xcomic yu'une.

¹⁴Chiquintao ava'iic sc'opojel ti Diose, pimil viniquetic ti abainojic ta spasel ta mantal ti jnaclejetic yu'un ti jteclum Jerusalene.

¹⁵Xachi ta xavalique: “Laj xa jnupin jolcutic ta pasel trate xchi'uc ti lajebale, jun trate xchi'uc ti buch'u sbainoj ti animaetique. C'alal mi tal ti j'ac'vanej ta vocole, mi ja'uc xvul ta jtojolcutic. Jsa'oj xa jpojelcutic ta stojol ti buch'u jutbil ta spase. Jsa'oj xa jpojelcutic ta stojol ti buch'u naca lo'lavanej ta spase.”

¹⁶Jech o xal ti Diose xi ta xale: “Ta jpitan jbejuc ton ta lum Sion, jbej t'ujbil ton ti toyol stojol ta j'ech'ele, ti ta xtun ta sliquebe, ti yicobinoj ta xc'ot scotole. Ti buch'u spatoj yo'nton ta stojole, mu'yuc c'usi sna'.

¹⁷Ti bu ta xlic ti abtel taje, ja' ta jtunes ta jplomo ta sq'uelel ti tuq'uil jol o'ntonal ti tuc' ta xbat ti chapanele. Ta jtunes ta jnivel ta sq'uelel ti bu jun yutsil slequil ta xich' pasele.” Ti naca jutbil laj asa'ic ti apojobbailique, ta slilin ti bote. Ti anopojic c'otem ti anac'obbailique, smeset no'ox batel yu'un ti vo'e.

¹⁸Mu'yuc c'usi bal o ti trate laj apasic xchi'uc ti lajebale. Mu'yuc c'usi xtun o ti laj apasic trate xchi'uc ti buch'u yich'oj ta venta ti animaetique. Ta xvul ono'ox ta atojolic ti c'usi xi'bal sba ta xtale, ti ta xasnet'oxuc ta voliele.

¹⁹Ta xa sbec'oxuc batel ti jujuten ta xvul ta atojolique. Ta yoc'omal no'ox, ta c'ac'al ac'ubal, ta xvul ta loq'uel. Naca no'ox ta xava'ibeic ti sc'oplalique, xanic xa ta xi'el yu'un.

²⁰Co'ol s'elan puch'ulot ta uni biq'uit tem ta xavay, ti pixilot ta com com c'u'il xchi'uque.

²¹Ti Diose ta xlic abtejuc jech c'u cha'al laj spas ta vits Perazime, jech c'u cha'al laj spac c'op ta stenlejal Gabaone. Ta sliques yabtel ac'o mi vocol ta q'uelel yiluc. Ta xc'ot ta pasel yu'un ti yabtele, ac'o mi yan ta q'uelel ti yabtel c'usi ta spase.

²²Ja' yu'un un cha'e, lajuc sc'oplal avu'unic ti labanvaneje. naca me stsin sba ta j'ech'el ti acarinailique. Yu'un laj ca'ibe sc'oplal ti Dios ti scotol xu' yu'une, laj yal mantal ti ta stsutses ta j'ech'el ti lume.

²³Ts'ijano aba, chiquintao ava'i lec ta ya'yiel ti xi s'elan ta xcale: Bijan ta ya'yiel ti xi s'elan ti jc'op ta xcale:

²⁴C'alal ta xlic ts'unubajuc ti jchabajome, mu staojuc yav ti scotol c'ac'al ta sjavolan ta voq'uel ti banomile, ti ta stusbe lec sat ta chiv-chiv taq'uin ti sbanomile.

²⁵Mi laj xa stuse, ¿mi mu meleluc xana' ta xlic svij ta sts'unel ti eneldo sbie, mi ja' ti cominoe, ti xcholet no'ox ta sts'unel yu'un ti trigoe, ti sts'un no'ox ech'el ti jchop o ta trigoe, mi ja' ti centeno sbi ta sti'iltac ti bu xpolet ech'ele?

²⁶Tojobtasbil yu'un Dios ti c'u s'elan ta spase.

²⁷Ti ts'unubal eneldo sbie, ma'uc ta xich' majel ta yabtejeb vacax, mi ja'uc ta xich' stselanel jelavel carreta ta sba ti cominoe. Ti eneldo sbie, ta xich' majel ta jun te'. Ti cominoe chichinbil ta jun vach'.

²⁸Ja'uc ti trigoe, ta xich' majel ta yabtejeb vacax ti stselet no'ox ta x'ech' ti carreta ta sbae. Ta xich' beq'uel loq'uel ti sat trigoe yo' jech mu xchev.

²⁹Ja' jech xchapanoj yabteltac Dios ti scotol xu' yu'une. Jun yutsil ta j'ech'el ti c'u s'elan snopoj ta spase. Ta xc'ot ta pasel yu'un ta sventa ti mu albajuc ti sbijile.