Read Tzotzil Isaías 29 Bible Online

Isaías 29 - Tzotzil bible

Isaías 29

¹Ariel, Ariel, mu cha'belun un, muc' ta lum ti bu laj slaman sba ta volej ti Davide. Ech'uc to batel jayibuc jabil xchi'uc ti ep ta tos ti sq'uinic ta spasique.

²Yu'un ta xlic cac'be svocol ti Ariel ti muc' ta lume, ti yo'ntonuc xa ya'i c'usi yut ta spoj sba xchi'uc ti vocole, ti xmalajet xa ti ya'lel satique, ti xme'inal oq'uic xa liquele. Ta xc'ot cu'un jech c'u cha'al ti Ariele.

³Ta jtac talel cajsoldadotac ta svolelot. Ta jit'an jtsatsal moc ta joyob ta smaquelot ta be, ti sbuset no'ox ta j'ech'el ti cajsoldadotac ta stsacot ta c'ope.

⁴Ta xac'ot ta jun j'ac'-lo'il-maxil. Telel ta xacom ta lumtic, ti co'ol to s'elan jun yech'omal snuc' jsibtasvanej xa'avete, ti x'ajajet to ta a'yiele.

⁵Ti xc'ulet no'ox yepal ta j'ech'el ti avajcontrae, co'ol s'elan junuc pucuc ti xvajet no'ox ta j'ech'ele. Ti tsots xvoletic no'ox xa'i sbaique, co'ol s'elan jun solepal, xtanet no'ox batel ta jech yepal.

⁶Ti Dios ti scotol xu' yu'une xc'avlajet no'ox jech c'u cha'al junuc chauc ta xtal sva'an sba ta atojol, ti xc'uyc'un no'ox ta niquel ti banomil yu'une, ti xvo'o'et no'ox ta j'ech'ele, ti sts'otobaj no'ox ta jmec ti sutub ic' xchi'uc ti ya'lele, ti xloclun no'ox ta j'ech'el ti leb c'oc' ta stsutsesvane.

⁷Scotol ti jun no'ox yepal ti lumetic ti ta stsaquic ya'iic ta leto ti lum Ariele, scotolic ti ta stsutses ya'iique, ti ta stic' sbaic ochel ya'iic ta nac'obbailetique, ti ta xilbeic ya'iic ti svocole, laj c'op un, yu'un co'ol s'elan no'ox jun vaichil c'ot ta pasel, mi ja' ti oy c'usi ta x'aq'ue iluc ta ac'ubaltique.

⁸Co'ol s'elan ta xvaichinaj ti buch'u ta xa xcham ta vi'nal ti yacal xa ta xve' ta xil ti c'alal mu'yuque, ti c'alal vul ti xch'ulel une, staoj o yav xmich'mun xch'ut ta vi'nal. Mi mo'oje, co'ol s'elan ta xvaichinaj ti buch'u ta xa xcham ta taqui ti'il ti yacal xa ta xuch' vo' ta xil ti c'alal mu'yuque, ti c'alal vul ti xch'ulel une, staoj yav ta xa'i ti taqui ti'ile. Jech ta xc'ot ta stojolic ti epal lumetic ti ta stsaquic ta leto ti Jerusalén ta vits Sione.

⁹Staojuc yav ac'beic yipal ti apochanilique. Staojuc yav ma'satucoxuc ti mu xavilique. Staojuc yav tam-lajetanetic jech c'u cha'al ti jyacubele, ac'o mi mu'yuc avuch'ojic ti uch'bolal ta xac' yacubele.

¹⁰Laj yac' taluc vayel ta atojolic ti Dios ti ta xbat ach'ulelic yu'un ta j'ech'ele. Ti j'alc'opetique, ac'o mi c'otem ta jtojobtasvanejetic yu'un ti jteclume, ja'uc le' une, macbat satic ta jlic poc' yu'un ti Diose.

¹¹Scotol ti c'usi ta xich' ilele, c'ot ta atojolic jech c'u cha'al junuc jlic balbil ts'ibabil vun ti pac'al lec ta seyoe. Mi ta x'ac'batic sq'uel junuc ti buch'u sna' vune, ti xi ta x'albate, “Q'uelo ca'itic c'usi ta xal”, xi ta staq'ue: “Mu xu' un, yu'un pac'bil seyoal.”

¹²Mi ta x'albat junuc ti buch'u mu sna' vune, ti xi ta xich' albele, “Q'uelo ca'tic li'e”, xi ta staq'ue: “Mu jna' sq'uelel vun.”

¹³Xiyut ti Dios une: “Ti lum li'e, naca no'ox sba ye ti ta xalic ti c'otem ta cajtunele. Ta ye no'ox ma' ti ta xiyich'un ta muq'ue. Le' to oy ma' ti yo'ntonic ta jtojol une. Naca nopbil yu'un viniquetic ma' ti ta xalic ti quich'el ta muq'ue, naca chanbil no'ox ta sjol stuquic.

¹⁴Jech o xal un, jchop o senyail ta xcac'be yilic ti jteclum taje, ti ch'ayal ta xc'ot yo'ntonic yu'une. Sbijilic ti buch'utic oy sbijilique, ti xac' sjolic ta snopel ta ya'yiel ti buch'u sna' xchiquintae. Ta j'ech'el ta jch'aybe sc'oplal ma' le' une.”

¹⁵Mu xa ono'ox cha'bel un, ma' ti buch'u snopoj ti mu xa x'ile yu'un Dios ti c'usi ta spase, ti ta queoval xa snac'oj sba ta spasel ti smul scolo' ti xi ta xalique: “Mu'yuc buch'u xijyil ma' li' une. Mi ja'uc oy buch'u sna'.”

¹⁶Vi to la s'elan ta sjoybinic ta soquesel ta yalel ti c'opetique. Co'ol no'ox s'elan yalojic ti jop ach'el ta xabtelan ti jpatbine. Ti c'usi meltsanbile, mi ja'uc xi ta xalbe ti buch'u meltsanun yu'une: “Mu vo'otucot ma' ti laj ameltsanune.” Mi ja'uc xi ta xal jbejuc ti c'usi laj yich' meltsanel ta lume: “Mu xana' ti c'usi ta xapase.”

¹⁷Mu xa jaluc sc'an xc'ot ta pasel, ti pimilal te'tique ta xjoybij ta ve'ebal banomil. Ti ve'ebal banomil to oxe ta xc'ot ta pimilal te'tic.

¹⁸Ti jech c'ac'al taje, ta xlic ya'iic ti oy buch'u ta xavta ta sq'uelel vun ti buch'u macal ti xchiquinique. Sac jaman no'ox osil ta xilic, mi jset'uc ma' ti ic' muts'an ti banomil ta xilic ti buch'u ma'sate, mi ja'uc ti oyic ta ac'ubaltic ta xa'iique.

¹⁹Ti buch'u peq'uel yuni c'oplale xlaet no'ox liquel yo'nton ta stojol ti Diose. Ti spajebal xa me'un mu'nate ta xlic muyubajicuc ta stojol Ch'ul Dios yu'un ti Israele.

²⁰Ti buch'u xcapet soquet no'ox ta xa'i ti banomile, ta xlaj sc'oplal ta j'ech'el. Ta xlaj ta xtub sc'oplal ti buch'u cajal toyol xa'i sba xchi'uc ti stoyobbaile. Ti yac'oj no'ox sjol ta spasel ti chopole, ta j'ech'el ta xch'ay sc'oplal.

²¹Ti j'ac'-cuchinej milvaneje, ti j'ac'-cuchinej mulile, ti buch'u jech xa yilel ti sc'op buch'utic ta slo'la syanijesbel sjol ta spas ti mu xchapan ti buch'u ch'abal smule, ta xlaj sc'oplal.

²²Jech o xal ti Ajvalile, Dios yu'un ti Israele, ti laj stic' sba ta spojel ti Abrahame, xi ta xale: “Avi tana le'e, li' ta xlic batel ti mu xa xa'i q'uexlal ti Jacobe, mi ja'uc xa xchacpochtaj ti sate.

²³Yu'un ti c'alal ta xlic yil snitilultac ti c'u s'elan ta jpasbe ti slumale, ti Ch'ul Diosun yu'un ti Israele, ta xc'ot ta sjolic, ta xlic xi'taicun.

²⁴Ti buch'utic mu stac' a'yeluc ta xa'iique, ta xlic bijubicuc. Ti buch'utic xbic'tal c'opojic no'oxe, ta xc'ot ta yo'ntonic ti chanubtasele.”