Read Tzotzil Isaías 3 Bible Online

Isaías 3 - Tzotzil bible

Isaías 3

¹Q'uelo avilic lec un, ti Ajvalil ti scotol xu' yu'une, ta xch'ayboxuc sc'oplal ta Judá ta Jerusalén scotol ti ta xchonic ti c'usitic ta xtune, ta stubbe sc'oplal ti ve'liletique, ti vo'e.

²Ta xch'aybe sc'oplal ti tsatsaquil viniquetic xa'i sbaique, ti banquilal j'ac'-letoetique, ti jchapanvanejetique, ti j'alc'opetique, ti jt'unvanejetique, ti buch'utic ich'bil ye sti'ique,

³ti banquilal jpas-mantal yu'un soldadoetique, ti toyobba jc'ulejetique, ti jbijubtasvanejetique, ti bainom satinometique, xchi'uc ti j'ac'-chameletique.

⁴Yu'un uni jva'lej viniquetic ta x'och ta banquilaletic avu'unic, uni bic'tal queremetic ta spasoxuc ta mantal.

⁵Mu stac' alel ma' ti c'usi ta xc'ot ta pasel ta lume, ta jujun ta xlic stsac sba ta c'op, manchuc mi lec xil sbaic. Ti jva'lej viniquetique ta xlic yilbeic svocol ti buch'utic ch'iem c'opojemic xae, mu'yuc xch'ulelic ta j'ech'el ta xlic yilbeic svocol ti buch'u oy stuq'uil sjol yo'ntonique.

⁶Ta xc'ot ta pasel ti xchi'il no'ox sbaic ta voq'uele, xi ta xalbe ya'i ti nacal ta sna ti stote: “Ti vo'ote oy to ac'u' stac' xalap, ochan ta banquilal cu'uncutic ca'itic un cha'e, ta spasel mantal ta ajvalil ta jinemal lum li'e.”

⁷Ja'uc ti june xi ta staq'ue: “Mu'yuc xa c'usi stac' ta jpas ma' ti vi s'elan toj chopol c'ot ta pasel une, ti c'alal ch'abal ti jve'ele, ti jc'u' ta jlap ta jnae. Mu me xavaq'uic ochcun ta ajvalil yu'un ti lume.”

⁸Melel, ta xyal ta lum ti Jerusalene. Ta xlilij ta j'ech'el ti lum Judae, yu'un ti bu taje, ta xlic spasic ti c'usitic contra ta xil ti Diose, ti ja' soquesobil yo'nton ti Ajvalile.

⁹Ta x'aq'ueic ta q'uexlal apun yu'un ti c'usitic mu'yuc smelol ta spasique. Mu xa mucbaj ti smulique, co'ol ta spasic jech c'u cha'al ti sodomaetic ti ta sba ta sat scotol lum ta sa' ti smulique. Mu xa ono'ox cha'bel un, ti buch'u va'i s'elan ta spasic taje, ta xac'be sba svocol stuquic.

¹⁰Mu'yuc c'usi sna' ma' ti buch'u oy stuq'uil sjol yo'ntone, yu'un lec ti c'usi ta xc'ot ta stojole, xmuyubaj no'ox xchi'uc ti c'usitic lec ta spase.

¹¹Mu xa ono'ox cha'bel un ti buch'u chopol ti c'usi ta spase, mu lecuc ti c'usi ta stae. Ta x'ac'bat stoj yu'un Dios ti c'u s'elan laj spase.

¹²Uni biq'uit querem no'ox ti j'ilbajinvanej yu'un ti jteclumale. Antsetic ochemic ta ajvalilal. Jteclumal, ta xaslo'laoxuc ti jtojobtasvanejetic avu'une. Ta xayic'oxuc batel ta spasel ti c'usi mu lecuque.

¹³Ti Diose xchapanoj xa sba ta yich'bel ti sc'ope, xchapanoj xa sba ta yac'bel stoj smulic ti steclumale.

¹⁴Ti Diose ta xtavan ta iq'uel ta xchapel ti c'ope, ti xi ta xalbe ya'i ti buch'utic ich'bil ye sti'ique, xchi'uc ti banquilaletic ta jteclume: “Ti vo'oxuque yacaloxuc ta soquesel ti jts'unubal uvae, laj xa avelc'anic ti me'un mu'natetique, ti c'usitic avelc'anojique, anac'ojic ta anaic.

¹⁵¿C'usi avabtelic ya'yel un cha'e ta yilbajinel ti jteclumale, ta xpech'el ta teq'uel ti me'un mu'natetique?” Mu me lo'iluc no'ox ta xal ti Ajvalil ti scotol xu' yu'une.

¹⁶Xi ta xal ti Dios xtoque: “Q'uel avil c'u s'elan ti toyobba antsetic yu'un ti Sione. Xic'xun no'ox xa'i sbaic ta xanobal, mu'yuc xa xq'uexlalil ta xq'uelvanic, xi xa yuni natiquil ta sjet yoc ta xanobal, xchilchun no'ox yu'un ti xch'al yoque.

¹⁷Ti stsitselic ta xcac'beic yu'un taje, ta xbul loq'uel ti stsotsil sjolic yu'un ti salile, ta xcaq'uic ta q'uexlal ta j'ech'el.”

¹⁸Ti jech c'ac'al taje, ti Diose ta xch'aybe sc'oplal scotol ti xi s'elan ti xch'alobilique, ti xnichimal yixtolal yoquique, ti xnichimal stim sjolique,

¹⁹ti staq'uinal xchiquinique, ti xoj sc'obique, ti chajal poc' smac satique,

²⁰ti sts'ot sjolique, ti uni bic'tal carina ti chucul ta snuc' yoquique, ti xchuquique, ti muil poxiletic tiq'uil ta uni limite yu'unique, ti smacobil sat ti bainom satinome,

²¹ti ixtolal c'obil yu'unique, ti staq'uinal yixtolal sni'ique,

²²ti yutsiquil c'u'il yu'unique, ti yan c'u'il yu'unique, ti mochibal yu'unique, ti vorxa nucul yu'unique,

²³ti nenetic yu'unique, ti lequiquil jilich' poq'uetic yu'unique, ti ts'ot jolil yu'unique, ti yan poq'uetic yu'unique.

²⁴Ti jech xjiq'uet ta muil poxil avie, ta xc'ot ta stojolic ti mu staq'uic nopel yu'un ti sjomomilique. Ti lequil chuquile, jbej xa uni ch'ojon tumul liquel. Ti xch'alet no'ox yu'unic ta tusel ti sjolique, stuc me boch liquel un. Ti jun xa yutsiquil c'u'il ta stunesique, pac'nochic me liquel un. Ti c'upil xa sba sat yelovic ta q'uelele, mu xa xtal yutsil ta q'uelel yu'un ti q'uexlale.

²⁵Ti viniquetic avu'une, ta xlajic ta letovajel, ti banquilal j'ac'-leto avu'une, ta xchamic ti c'alal xyaquet ti letovajele.

²⁶X'oc' xme'inaj xa ti lume; j'ech'el jipbil tenbil ta xcomic.