Read Tzotzil Isaías 34 Bible Online

Isaías 34 - Tzotzil bible

Isaías 34

¹Nopajanic talel, jteclumetic, a'yio ava'iic. Ts'etano lec ani' achiquinic, muc'tiquil lumetic. Ac'o ya'i ec ti banomile, xchi'uc scotol ti c'usitic oye, ta sbejel banomil xchi'uc scotol ti c'usitic cuxul ta stojole.

²Yu'un ti Diose ta x'ilin ta stojol ti muc'tiquil lumetique, xchi'uc ta stojol scotol ti c'u yepal oy yu'une. Sta xa yorail ta xac'be svocol. Ta stubbe sc'oplal ta j'ech'el.

³Tusul ta xich' ictael comel ti animaetique. Xbeq'uet no'ox ta nom ti yiq'ue. Jun to uc'um xbeinaj no'ox ti ch'ich' ta vitsetique.

⁴Scotol ti c'usitic oy ta vinajele, tan puc ti c'u s'elan ta xlaj lilijuque. Ti vinajele ta svol sba ech'el jech c'u cha'al junuc ti c'usi bal-bale. Scotol ti c'analetique ta xbaj talel jech c'u cha'al ta xbaj yanal ti uvae, mi ja' ti icux ti c'alal nucultajem xae.

⁵Melel, yespada ti Diose ta xvinaj ta vinajel, ti ja' xa ta xtun ta sjol sbaquil ti lum Edome, ti chapal xa sc'oplal ta xc'ot ta tsutsel ti lum ach'el yu'une.

⁶Ta xve' yu'un ta ch'ich', ta xepu' yespada ti Diose jech c'u cha'al ta xich' milel ti chije, mi ja' ti tentsun ti ta xjelav ta matanale. Ti Diose ta xac' jun milbil matanal ta jteclum Bosra. Ta xc'ot ta jun muc'ul milobbail ta yosilal ti Edome.

⁷Ta xc'ot ta stojolic jech c'u cha'al ta xich'ic ti te'tical vacaxe, ti ch'in vacaxetique, xchi'uc ti tot vacaxetique. Ts'ajal ta ch'ich' ta xcom ti yosilale. Naca xa xepu' x'olet ti pucuque.

⁸Melel, yu'un ja' o sc'ac'alil ta spac sutel xq'uex ti Diose, ta sjabilal ta sloq'ues sc'ac'al ta scoj ti c'usi pasbat ti lum Sione.

⁹Ti uc'umetic yu'un ti lum Edome, ta xlic joybijuc ta xuch'. Ti pucuque ta xjoybij ta azufre. Ti banomile ta xtil jech c'u cha'al junuc xuch'.

¹⁰C'ac'al ac'ubal, mi ja'uc xtub, yu'un xtomet no'ox ti xch'ailale. J'ech'el sbatel osil tenbil ta xcom. Jbel sc'oplal mu'yuc buch'u junuc ta x'ech' ti bu taje.

¹¹Yu'un ta snainic liquel ti mutal bolome xchi'uc ti muc'tiquil cux-cuxe. Ta xlic spas stasic ti joje xchi'uc ti ch'aj cux-cuxe. Ti Diose ta sjoybin ta sbajtical banomil ti sts'ijlajan ta xcom yu'un ta j'ech'el ti lum taje.

¹²Laj to me sc'oplal ma' ti ta xventainatic yu'un junuc ajvalil une. Scotol ti banquilaletic yu'unique, j'ech'el ta xc'ot ta tubel sc'oplalic.

¹³Ch'ixtic liquel ti chapanobbail naetic yu'unique. Yavil muc'tic laetic tomal ch'ixtic liquel ti nac'obbailetic yu'unique. Ta xc'ot ta yavilal oq'uiletic, ta snac'obbail j'anilajel-mutetic.

¹⁴Ti vetetique mu xa c'usi sna' ti jmoj xc'uletic xchi'uc ti oq'uiletique. ti xchanul ac'ubal me' tentsunetique xme'et no'ox ta xic'anan sbaic talel. Ti bu taje, snainoj o xa ti sbeel banomil ta sibtasvan ta ac'ubaltique, yu'un xocol xa ti bu ta xcux yo'ntonique.

¹⁵Ti bu taje, ta xac' stasic xchi'uc stonic yo' ta xvoc' yolic ti mutal bolome, ta svol sbaic ta xchabiel. Ti bu taj xtoque, ta svol sbaic ti xique, ti jujucot stote nupajtic xchi'uc ti sme'taque.

¹⁶T'uno, avtao ava'iic ti xi ta xal ta jpoc vun yu'un ti Diose: Ti chon bolometic taje, jcot stot jcot sme' ta snupul-nup oyic, ti c'ot xa ta nopel yu'un stuc ti Diose, ti ta jbel no'ox sc'op ta stsob talele.

¹⁷Jujunic ac'bil xa yilic ti bu ta xc'otique. Xye'et no'ox sc'ob laj yac' iluc bu c'alal ta xpaj talel ti yosilalique, ti j'ech'el ta xcom o ta yu'unique, ti j'ech'el sbatel osil ta xnaquiique.