Read Tzotzil Isaías 39 Bible Online

Isaías 39 - Tzotzil bible

Isaías 39

¹Ti jech yorail ta vo'ne taje, ti ajvalil Merodac-baladán xnich'on ti Baladán ajvalil yu'un ti lum Babiloniae, laj ya'ibe sc'oplal ti yal ta chamel ti Ezequiase, ti lecub xa xtoque. Laj stac batel vunetic ta stojol jun chibuc j'al-mantal j'ich'-c'opetic ti yich'ojic batel matanal xtoque.

²Ti Ezequiase xlaet xa yo'nton laj ya'i ti jech c'otique. Lic yac' iluc ti sc'ulejale, ti platae, ti oroe, ti muil poxiletique, ti lequil aceitee, ti squejlebtac ti abtejebaletique, xchi'uc ti c'usitic naca q'uejajtic ta yaviltaque. Ti c'usitic x'ayan ti bu ta spas mantale, laj yac' iluc scotol.

³Va'i un, ti j'alc'op Isaiase bat, yu'un bat sq'uel ti ajvalil Ezequiase, ti xi laj sjac'bee: “¿Bu liquemic talel li viniquetic le'e? ¿C'usi tal sjac'bot?” Ti Ezequiase xi laj staq'ue: “Liquemic talel ta namal jteclum. Liquemic talel ta muc' ta jteclum Babilonia.”

⁴Ti Isaiase xi laj sjaq'ue: “¿C'usi laj yilic ti li' ta ana ta apasob mantale?” Ti Ezequiase xi laj staq'ue: “Laj yilic scotol ti c'usi oy li'e. Yu'un mi ja'uc jutebuc ti mu'yuc laj cac'be yilic ti c'usitic oy ta yaviltac cu'une.”

⁵Va'i un ti Isaiase xi laj yalbe ya'i ti Ezequiase: “Ts'etano achiquin ta ya'yiel ti xi ta xal ti Dios ti scotol xu' yu'une:

⁶‘Scotol ti c'usi oy avu'un ta amuc' ta nae, xchi'uc scotol ti c'usitic laj staic ta tsobel ti amolmuc'totac ta vo'nee, xchi'uc ti c'usi ataoj ta tsobel avie, ta xc'ot sc'ac'alil ti ta xich' ich'el batel ta Babiloniae. Mi ja'uc jutebuc ti oy c'usi ta xcome.

⁷Oy jlom anitilultac ic'bil ta xbatic ta Babiloniae, ta spasatic ta capon. Ta xlic tunicuc ta mosovil ta sna ti ajvalile.’ ”

⁸Laj snop ti Ezequiase, ti c'u to sjalil cuxule, xu' nan ti lamajem ti c'ope, ti mu'yuc c'usi sna'e. Jech o xal xi laj stac'be ti Isaiase: “Ti c'op ti laj avich'bun talel ta sventa ti Diose, jc'uxubinel ta xca'i.”