Read Tzotzil Isaías 40 Bible Online

Isaías 40 - Tzotzil bible

Isaías 40

¹Yu'un xi ta xal ti Dios avu'unique: “Patbo yo'ntonic, patbo yo'ntonic ti jteclumale.

²Oyuc yutsil ave ati'ic xac'opojic ta stojol ti jteclum Jerusalene. Albeic ya'i ti oy xa sc'oplal ti c'ot ta tsutsel ti jech mosovinbilique. Laj xa stojic ti bu jelavique. Laj xa sc'upinic ti tsots yal coc ta jc'ob ta scoj ti mu albajuc ti smulique.”

³Yu'un oy buch'u x'avet ti xi ta xale: “Ti ta sbajtical banomile, chapanbeic sbe ti Cajvaltique. Poletuc no'ox avu'unic ta sventa ti Diose. Ac'beic lec stuq'uil ti bu ta x'ech' ta sbajticale.

⁴Nojesic ta but'iel scotol ti slomlejale. Pasic ta stenlej ti vitsetique xchi'uc ti stselejtique. Joybijuc ta stenlej ti slomol sputs'ule.

⁵Va'i un, ta xlic yac' ta ilel yutsilal slequilal ti Diose, scotol ta xilic. Yu'un ja' laj yal stuc ti Diose.”

⁶Laj ca'i ti xi c'opoje: “Avanan.” Xichi laj jtaq'ue: “¿C'usi ta xcavta un?” “Scotol jnaclej co'ol s'elanic momol, ti teq'uel lec jech c'u cha'al ti nichim ta osiltique.

⁷Ti momole ta xtaquij, ta xnucultaj ti nichim c'alal ta x'ech' tijatuc ta vuch'tael yu'un ti Diose. Ti buch'uuc no'oxe, co'ol s'elan jech c'u cha'al ti momole.

⁸Ti momole ta xtaquij, ta xnucultaj ti nichime, ja'uc ti sc'op Diose, j'ech'el mu xtub o.”

⁹Steclumal Sión, muyan ech'el ta jun toyol vits, tsots xlic avanan yo' jech ta xaval ti c'usi lec ta xc'ot ta pasele. Jnaclejetic ta Jerusalén, tsots xa'avan, mu xaxi'. Xi xavalbe ya'i ti jteclumetic yu'un ti Judae: “Li' oy ma' ti Dios avu'unique.”

¹⁰Ta xa xvul ta loq'uel ti Dios xchi'uc ti smuc'ul stsatsale. Ta xlic pasvanuc ta mantal ta sventa smuc'ul stsatsal ti yoc sc'obe. Ta xic' talel ti steclumal ti c'alal mi laj xa spoj loq'uele.

¹¹Yu'un co'ol s'elan jech c'u cha'al junuc jq'uel-chij ta xvul ta loq'uel ta xchabiel ti xchije. Ta spet ech'el ti mimi'etique, ta snaban ech'el ta sti' yo'nton. Ta stuc'ulan lec ti me' chijetic ti naca to no'ox voc' yolique.

¹²¿Mi yu'un oy buch'u laj xa sbis ta xch'ixtael ti muc'ul nabe? ¿Mi yu'un oy buch'u ta xchap xchi'uc sni' sc'ob ti c'u sjamlej ti vinajele? ¿Mi yu'un oy buch'u laj xa sbis ta bisel c'u yepal oy sts'ubilumal ti banomile? ¿Mi yu'un oy buch'u laj xa sbis ta jun sbisobil ti stseleje, xchi'uc ti muc'tiquil vitsetique?

¹³¿Mi yu'un oy buch'u laj stojobtas ti Diose? ¿Mi yu'un oy buch'u ta xac'be yil ti c'usi xu' ta spas ti Diose?

¹⁴¿Mi yu'un oy buch'u laj sbijubtas, xchi'uc ta svulesbel ta sjol ti c'usi xu' ta spase? ¿Mi yu'un oy buch'u laj xchanubtas ti tuc' ta xchapanvane? ¿Mi yu'un oy buch'u ac'bun sna' yo' laj sta ti snopbenal yu'une? ¿Mi yu'un oy buch'u chanubtasat ti laj sta ti sbijile?

¹⁵Ta sventa ti stuque, co'ol s'elan jbaj uni vo' ta xil ti muc'tiquil lumetique, co'ol s'elan juteb uni pucuc ta xil ti oy ta jun sbisole. Ti jteclumetic ti oyic ta ti' nabe, co'ol s'elan jbej sat uni yi' ta xil.

¹⁶Ta sjunul ti vits Líbanoe, jalajem xa ti chon bolometic yo' ta xich' chiq'uel ta sventa ti matanale, mu xa xich' tael lec ti si' ta sventa ti c'oq'ue.

¹⁷Scotol ti muc'tiquil lumetique, mu'yuc c'usi xu' yu'unic ta xil ta sba ta sat. Ta sventa ti stuque, mu'yuc yipal yu'unic ta spaquel yuni c'oplalic ta xil.

¹⁸Ti vo'oxuque, ¿buch'u xu' ta xaco'oltasic o ti Diose? ¿Buch'u sat yelov ta xaco'oltasic o ti avalojic une?

¹⁹Ti buch'u c'usiuc no'ox xloc'taj yu'un ta anele, ta xunijes ta meltsanel ti loc'obbaile. Ti buch'u xtojob ta xnichimtasel ti c'usiuc no'oxe, sts'ayet no'ox ta xcom yu'un ta oro. Ta naca plata ta smeltsanbe ti scarinailtaque.

²⁰Ti buch'u sc'abalinoj ta smeltsanel ti loc'obbaile, mu sna' xc'a' ti ste'el ta st'ujbee. Ta sa' ti buch'u xtojob ta stuq'uibtasel ti c'usuc no'ox ta sloc'tae yo' jech mu xbaj ta lum.

²¹¿Mi yu'un mu xana'ic xcaltic un? ¿Mi yu'un mu'yuc x'ale xava'iic? ¿Mi yu'un mu'yuc xaslo'iltabeic talel ta vo'ne? ¿Mi yu'un mu'yuc ono'ox xachiquintaic talel ta vo'ne ti c'alal lic meltsajuc talel ti banomile?

²²Ti Diose, ta vinajel oy ti spasob mantale, smacoj sjunul ti banomile, jujucot ta uni bilix ta xil ti jnaclejetique. Yu'un co'ol s'elan junuc poc' laj sq'ui ech'el ta lich'anel ti vinajele, co'ol s'elan junuc axibal na ti laj sq'ui ta lamele.

²³Ta xc'ot ta pasel yu'un ti mu xa xpac yu'un yuni c'oplalic ti cajal viniquetic xa'i sbaique. Ch'abal stuic ta xcom yu'un ti banquilal jpas-mantaletic li' ta banomile.

²⁴Ti jnaclejetic li' ta banomile, yu'un co'ol s'elan uni ts'unubaletic ti naca to no'ox laj yich' ts'unele, ti naca to no'ox ta stani ech'el yibel ta banomile. Yu'un mi ta sta vuch'tael yu'un ti Diose, j'ech'el nucultic ta xcom. C'alal ta x'ech' ts'otatuc yu'un ti tsots sutub iq'ue, stuc slilijemal xvajet cuchbil ta xbat.

²⁵Yu'un ti ch'ul Diose xi ta sjaq'ue: “¿C'usi xu' ta xaco'oltasicun o ti avalojique? ¿Buch'u xico'olaj xchi'uc ti avalojique?”

²⁶Toyo ech'el asatic ta vinajel, xachiic c'alal ta xaq'uelique: ¿Buch'u laj smeltsan scotol le'e? Ja' ti Buch'u laj xchapanbe yavil ta jujuvoq'ue, ti scotolic biiltasbilic yu'une. Toj ech'em ta jmec ti smuc'ul stsatsale, ti jelavem xu' yu'une, ti chapal lec yu'un ti c'usi ta spas ta stojolique.

²⁷Israel, steclumalot ti Jacobe, ¿c'u cha'al ta xac'an ti partee? ¿C'u cha'al xachi ta xavale: “Ti Diose, mu'yucun xa ta yo'nton ti vi j'elan yu'un ti jvocole. Ti Diose, ch'aybilun xa ta o'ntonal yu'un”?

²⁸¿Mi yu'un mu xana'? ¿Mi yu'un mu'yuc ava'yioj? Ti Ajvalil ti ja' Dios sbatel osile, ti laj smeltsan scotol ti banomile, mi ja'uc sna' slubtsaj, mu xojtiquin ti lubele, yu'un mu no'ox albajuc ta j'ech'el ti sbijile.

²⁹Yu'un ti buch'u lubtsajem xae, ta xac'be yip. Ti buch'u ta xlom xa ta lume, xic'xun no'ox liquel yu'un.

³⁰Ja'uc ti jva'lej viniquetique ta xlubtsajic. Jeche' xvayvun liquel ti lum ach'el ta xa'iique. Jech ec ti buch'u tsots xa'i sbaique, ja' to ti c'uxi xquejlajet ta lum ta xcomique.

³¹Ja'uc ti buch'u spatoj yo'ntonic ta stojol ti Diose, yantic no'ox ta xich' batel ti yip ti jelavem xu' yu'unique. Xu' ti co'ol s'elan xic ti xviletic no'ox ta j'ech'ele. Mu xojtiquinic ti lubele. Nom to c'ot ma' ti lubul pich'il ti lum ach'el ta xa'iique.