Read Tzotzil Isaías 41 Bible Online

Isaías 41 - Tzotzil bible

Isaías 41

¹“Ch'an chanic ta jtojol, jteclumetic ti nacaloxuc ta ti' nabe. Muc'tiquil jteclumetic, tsinic ti bu xa c'alal oy ti yipal avu'unique. La'ic yo' ta jchaptic ti jech a'yej li'e, jtsob jbatic ta xchapanel.

²¿Buch'u laj yac' vinajuc ti ajvalil ti lic talel ta sloq'ueb c'ac'al ti ta spas ono'ox canale? ¿Buch'u ta xac' ta c'abal ti muc'tiquil jteclumetique, ti tsalbil ta xc'ot yu'un ti ajvaliletique yo' ta yespada, ta syolob ti bic'tal lilinbil ta xcom jech c'u cha'al ti jobele?

³¿Buch'u ta xac' ye sti' ti mu xvinaj c'uxi ta xvul ta loq'uel ti jnutsvanejetique, ti mu ta yoquicuc ta xa'iic ta stamel tal ti bee?

⁴¿Buch'u yabtel ti va'i s'elan laj sliques taje? ¿Buch'u laj sliques talel ta vo'ne ti laj yal mantal ti jech ac'o comuc o jech c'u cha'al ta xvinaj slo'il ya'yejal avi tana li'e? Vu'un ti Ajvalilune, ti jtuc no'ox Diosune, ti oy ta jventa ti sliquebale, ti stsutsebale.

⁵Ti jnaclejetic ti nacalic ta sti'il nabe, laj yilic. bat xch'ulelic ta xi'el xchi'uquic. Nic ta jujujot xchiquintac ti banomile. Nopajic xa talel, le' xtalique.”

⁶Ti jujun ti c'usi sna' sloc'tael ta spasique, ta xac'be sba yip yo'ntonic ti jech xchi'il sbaic ta abtele.

⁷Ti buch'u sna' sloc'ta ti loc'obbailetique, ta xac'be yip yo'nton ti buch'u yabtelinoj ti c'unil taq'uinetique. Ti buch'u yabtelinoj ta xch'ojel ta yanele, ta xac'be yip yo'nton ti buch'u ta stunes ti majobil taq'uine. “Oy lec yip ma' ti spac'taque”, xi un. Ta jech yepal un, ta xlic sbajanan ta laux ti loc'obbaile yo' jech mu xvuyvunuc.

⁸“A'yio ava'iic lec, Israel, steclumal Jacob ti cajtunel laj jt'uje, steclumal snitilul ti Abrahame, ti lec xquil jba xchi'uque.

⁹Laj jloq'uesot talel ti xi ta jot sti'il ti banomile. Laj jtaot ta iq'uel ti c'alal xi oyot ta jot xchiquin ti banomile, ti xi laj calbote: ‘Ti vo'ote cajtunelot.’ Laj jt'ujot, mi ja'uc oy bu laj jtenot.

¹⁰Mu xaxi', yu'un li' jchi'inojote, mi ja'uc xatsiq'ues avo'nton, yu'un Diosun avu'un. Ta xcac'bot avip, ta jcoltaot. Ta sventa ti jelavem xu' cu'une, icbil japbilot cu'un.

¹¹Scotol ti buch'u xcapet xti'et sjol ta atojole, nijil ta xcomic ta q'uexlal apun. Scotol ti buch'utic ta stsacot ta c'ope, ta j'ech'el ta xtub sc'oplalic.

¹²Sa'o avil ti avajcontrae, mi ja'uc xavilbe sat. Ti buch'u ta xlic stsacot ta letoe, co'ol s'elan mu'yuc.

¹³Vu'un ti Ajvalilun Dios avu'une, jnitojbot ti ac'obe. Yu'un xichi: ‘Mu xaxi', ta xajcoltaot.’ ”

¹⁴Ti Diose j'ech'el ti xi ta xale: “Israel, steclumal Jacob, manchuc mi xi avuni muc'ul ta xa'ilee, ti mu'yuc xa yipal avu'un xtoque, mu xaxi', vu'un ta xajcoltaot. Vu'un ti ch'ul Diosun yu'un ti Israele, jpojvanejun avu'un.

¹⁵Ta xajoybinot ta jun ach' jtunel jech c'u cha'al ta sloq'uesbel syijil pat ti trigoe, ti lec ti yee. Ta xalilin ta bojel ti momoletique ja' to ti c'uxi ta xjoybij ta pucuc avu'une, ti ta xajoybin ta jobel ti vitsetique.

¹⁶Natic to xvilte-vilte muyel avu'unic ta toyol. Va'i un, cuchbil ta xbat yu'un ti iq'ue, ti bec'bil ta xbat yu'un ti sutub iq'ue. Jech ti vo'ot une, xlaet no'ox liquel avo'nton ta stojol ti Diose, ti atuc xa no'ox jech ti mu'yuc c'usi xana' ta xava'i ta stojol ti ch'ul Dios yu'un ti Israele.

¹⁷“Ti jnaclejetic ti mu'yuc c'usi x'ayan yu'unique, ti ja' me'unetique, ta sa'ic ti vo'e, le' une, mu staic. Yu'un taquibilan ti ye sti'ic ta scoj ti taqui ti'ile. Ja'uc le' une, ti Ajvalilune ta jbainic lec. Ti vu'un Diosun yu'un ti Israele mu xajtenic comel.

¹⁸Ta vitsetic ti oy ta sbajtical banomile, ta xcac' tucuc loq'uel uc'um xchi'uc sat vo'etic ti ta o'lol stenlejale. Ta joybin ta tuquemal vo' ti sbajtical banomile. Ti ta taquin banomile, ta xcac' t'omuc loq'uel uc'umetic.

¹⁹Yu'un ta sbajtical banomile, ta xlic jts'unan ch'ut te'etic, ti acacia te' sbie, ti arrayan te' sbie, xchi'uc ti olivo te' sbie. Yu'un ti ta taquin banomile, ta xcac' ch'iuc ti tojetique, ti jmoj capal ta xch'i xchi'uc ti abeto te' sbie, xchi'uc ti nucul-patetique.

²⁰Scotol banomil ta sna'ic, ta xilic, ta snopic, ta sts'et chiquintaic ti vu'un jech Ajvalilune, ti c'ot ta pasel cu'un ta sventa ti jmuc'ul jtsatsale, ti vu'unun ch'ul Diosun yu'un ti Israele, laj cac'be ti xch'ulelique.”

²¹Ti Ajvalile, Dios yu'un ti Jacobe, xi ta xale: La'ic, loc'obbailetic, paco ac'oplalic, la'ic ta spojel abaic.

²²La'ic ta scaj'albeluncutic ti c'usi ta xc'ot ta pasel le' to batele. Chapetanic ca'itic ti c'usi laj xa ech'uc batel xtoque. Ta jts'etan jni' jchiquincutic ta ya'yiel. Caj'albuncutic sc'oplal ti c'usi q'uelel xa talel ta xavile yo' jech ta jna'cutic mi ja' melel.

²³Albuncutic c'usi ta xc'ot ta pasel ti le' to batele. Aq'uic ta ilel mi diosoxuc ta melel. Pasic ti bu c'alal xu' avu'unique, mi ja' ti leque, mi ja' ti chopole. Sbalin to mi stsic'luj co'ntoncutic yu'un ti xi'elale, mi ja' ti toj batel jch'ulelcutic yu'une.

²⁴Ja'uc le' une, jeche'oxuc no'ox ta j'ech'el. Mi jtosuc oy c'usi spas avu'unic. Laj sta ti mu xa x'ilbat satic ti buch'u laj st'ujot ta yajdiose.

²⁵“Vul xa ta loq'uel cu'un jun vinic ta sloq'ueb c'ac'al ti laj jta ta iq'uele, ti ta xc'ot ta loq'uel ta yolon ti yolon xocon sloq'ueb c'ac'ale. Ti vinic taje, co'ol s'elan lumal bin ta xil ti jpas-mantaletic ti naca st'usan no'ox ta teq'uele. Jech ta spas jech c'u cha'al ta svots'ilan ta teq'uel yach'el ti jpotobe.

²⁶¿Buch'u laj scaj'al ta sliquebal taj une yo' jech ta jnacutic lec? ¿Buch'u laj scaj'albe sc'oplal ta vo'ne yo' jech xu' ta xcaltic ti oy stuq'uil ti c'usi ta xale? Yu'un mi ja'uc junuc avu'unic ti laj avalique. Mi jbeluc oy buch'u laj ya'i avu'unic ti c'ope.

²⁷Yu'un vu'un laj calbeic ya'iic ta sliqueb ti jnaclejetic ta Sione, ti tacbil bat ti j'al-mantal j'ich'-c'op ta Jerusalene, yo' ta xalbe ya'i ti mu xa jaluc sc'an ta sutic talel ti svinquilelique.

²⁸Quiloj, mi junuc ti yan diosetic ta xtal sva'an sbae. Mi junuc ti xu' yu'un ta sbijubtasvane. Mi junuc ti xu' ta xc'opoj ta stac' sutel ti c'usitic ta jaq'ue.

²⁹¡Vinaj ti mu ja'uc junuc ti c'usi xbalinate! Oy to me c'usi xu' yu'unic ma' ti xi sc'oplal une, yu'un ja' no'ox balinbil ti jeche' tey va'ajtique.