Read Tzotzil Isaías 42 Bible Online

Isaías 42 - Tzotzil bible

Isaías 42

¹“Li' oy ti cajtunel ti vu'un jventainoje, ti ja' jt'ujoje, ti xlaet no'ox co'nton xchi'uque. Yu'un laj cac'be yich' ti jcuxleje yo' jech ta sta slecubtasel sjol yo'ntonic yu'un ti muc'tiquil lumetique.

²Mu sna' ti x'av'un no'oxe, mu sna' stoy ye sti'. Ma'uc cajal toyol ye sti' ta xc'opoj ta calleetic.

³Mu c'ajomaluc ta xac'be xchi'il ta voch'el ti aj ti c'alal yich'oj xa stsiq'uemale. Mu yu'unuc naca stubel ti bu jutuc xa ta xtil ti mechae. Ta j'ech'el naca lequilal yich'oj talel.

⁴Mu jutebuc ti c'ux o'nton yu'une. Mu xc'ot ta tubel ti c'usi nopbil yu'une, ja' to ti c'uxi vinaj lec smelol ti pojel c'uxubinel ta banomile. Ti jnaclejetic ti oyic ta ti' nabe, ts'etel xchiquinic ta ya'yiel ti chanubtasel yu'une.”

⁵Ti Ajvalil Diose laj smeltsan ti vinajele, xchi'uc laj sq'ui batel. Chapaj yu'un ti banomile, xchi'uc ti c'usitic ta xch'i ta stojole. Ta xac'be yich' ic' xchi'uc xcuxlejal ti jnaclejetique. Ti Dios taje xi ta xalbe ti yajtunele:

⁶“Ti vu'un Diosune laj quic'ot talel. Laj jnitbot talel ac'ob yo' jech tsots atunel ta xac'ot ta sventa ti coltaele. Nopbil abec'tal atacopal cu'un. Ta jc'an un ti ta aventa yilicuc jtrate ti jteclumetique, ti ta xac'ot ta saquilal osil yu'un ti muc'tiquil lumetique.

⁷Ta jc'an ti ac'o vic'uc sat avu'un ti ma'satetique, ti ac'o aloq'ues talel ti jchuqueletic ti oyic ta chuquinabe, ti bu tiq'uilic xtoc ta jc'ol chuquinab ti mu xilic ti saquilal osile.

⁸Vu'un Diosun, jech ti jtalele. Mu xcac' que jti' ti ta xjel yajval ti buch'u ta xcac'be ti cutsilal jlequilale. Mu smeloluc ti nijil chimil yich'el ta muc' ti loc'obbailetic ti c'alal jtuc no'ox oy sc'oplal quich'el ta muq'ue.

⁹A'yio ava'iic c'u s'elan c'ot ta pasel cu'un scotol ti c'usitic jcaj'aloje. Avi tana li'e, ach' ti c'usi ta jcaj'albe sc'oplale. Ta Jcaj'ac'boxuc ana'ic ti c'alal mu to ta xvul ta loq'uele.”

¹⁰Q'uejinanic ta jun ach' q'uejimol ta stojol ti Diose. Lequil c'opojanic yu'un ti nacaloxuc ta namal banomile, xchi'uc ti buch'utic xnuxetic ta ba nabe, xchi'uc ti c'usitic chanuletic ti cuxajtic teye, xchi'uc ti muc'tiquil lumetic ti oyic ta ti' nabe, xchi'uc ti jnaclejetic yu'une.

¹¹Laetuc no'ox yo'ntonic ti sbajtical banomile, ti jteclumetic yu'une, xchi'uc snitilultac ti Cedar ti lamalic ta axibal nae. Laetuc no'ox liquel ta q'uejimol ti jnaclejetic yu'un ti jteclum Selae, ti stac'uc to talel toyol ch'en vitsetic ti yech'omal snuq'uique.

¹²Ti muc'tiquil lum ti oyic ta sti'il nabe, ac'o yalic ti yutsilal slequil ti Diose, ti oyuc ta ye ta sti'ic ti sq'uejintaele.

¹³Ti Diose ta xvul ta loq'uel jech c'u cha'al junuc vinic ti cuchem yu'une, co'ol s'elan jech c'u cha'al junuc j'ac'-leto ti mu xa pajesbaj ta xa'i ta yaq'uel ti letoe. Ta stoy ye xchi'uc ti sc'ope. Ta xlic avanuc ti ac'o licuc ti letovajele, ti tsalbil ta xc'ot yu'un ti scontrae.

¹⁴Ti Diose xi ta xale: “Yu'un ep c'ac'al ti mu'yuc c'usi laj cale, ti ts'ijilun no'ox jmucoj ta co'ntone. Avi tana li' une, xi'avet no'ox liquel jech c'u cha'al junuc ants ti ta xcol ta alajele, ti x'ijet xa ti vocol xa ta xich' iq'ue.

¹⁵Ta jlilin ti muc'tiquil vitstique xchi'uc ti stselejale. Taquin ta xcom cu'un scotol ti momoletique xchi'uc ti te'etique. Sbajtical banomil ta xcom cu'un ti uc'umetique. Taquin ta xcom cu'un ti nabetique.

¹⁶Ti ma'satetique, ta xquic' batel ta be. Ta stamic batel cu'un ti bu mu xojtiquinic jutebuque. Ta sba ta satic, ta xlic joybin ta saquilal osil ti ic'al osile. Ta jpas ta stenlej ti bu syalobalil ti banomile. Ti va'i s'elan taje, ta j'ech'el mi ja'uc stselbuj cu'un.

¹⁷Ti buch'utic spatoj yo'ntonic ta stojol ti loc'obbaile, mi ja' ti xi ta xlic yalbeic ti yan loc'obbailetique: ‘Ti vo'ote, cajdiosotcutic’, q'uexlal xa ta stam sbaic loq'uel.

¹⁸“Cocorixetic, ts'etano achiquinic. Ma'satetic, ts'ilano asatic, q'uelic lec.

¹⁹Mu'yuc xa buch'u xjelav to sma'satil xcocorixil jech c'u cha'al ti cajtunele, ti jtaquel cu'une. Mu'yuc xa buch'u xjelav to sma'satil xcocorixil jech c'u cha'al ti caj'al-mantal j'ich'-c'ope, ti yajtunel ti Diose.

²⁰Ep ti c'usitic yilojane. Ja'uc le' une, ma'uc sat ta stuc'ulanel. Xa'i c'usi ta xich' alel. Ja'uc le' une, x'ech' xjelav yu'un.

²¹Ti Ajvalile, ta sventa ti ja' jun Dios ti sna' xpojvane, oy ta yo'nton ti jun yutsiquil smuc'tiquil c'otuc ta pasel ti c'u s'elan ta xchanubtsavane.

²²Ja'uc le' une, elc'anbilic chajbilic ta sa'el ti c'usi oy yu'unic ti jteclum li'e. Scotol ochic ta c'abal ti tiq'uilic ta chuquele. Ta xc'ot ta pasel ta xtiq'ueic ta jc'ol chuquinab ti bu bajal leque. Mi ja'uc oy buch'u ta sloq'uesvan. Ti cuxul q'uex nac'bilique, mu'yuc buch'u xpojun loq'uel.”

²³Ja'uc le' une, ¿mi oy la buch'u junucal avu'unic ta xavaq'uic ta venta ti va'i s'elan taje? ¿Mi yu'un oy la buch'u chapaloxuc ta xchiquintael ti c'usi ta xc'ot ta pasele?

²⁴¿Buch'u laj yac' ye sti' ti c'ot ta stojol ti Israel steclumal ti Jacobe, ti uninbil c'otique, ti cuxul q'uexnaq'ueique? ¿Mi mu ta meleluc ti ja' laj spas ti Diose? Yu'un laj sa' smulic ta stojol. Mu sc'an stamic batel ti be ti bu ac'bat yilic ta stamel batele. Mi ja'uc laj xch'unic ti chanubtasel yu'une.

²⁵Jech o xal cap sjol ta stojolic. Laj stsits ta sventa muc' ta leto ti laj xchic' ta leb c'oq'ue. Ja'uc le' une, mi ja'uc laj snit spajes sbaic.