Read Tzotzil Isaías 43 Bible Online

Isaías 43 - Tzotzil bible

Isaías 43

¹Avi tana une, Israel, steclumal Jacob, ti Dios ti laj yac'bot ach'ulel avanimae, xi ta xalbote: “Mu xatsiq'ues avo'nton, yu'un lac'ot xa ta pojel colel cu'un. Laj jbiiltasot, cu'un lac'ot.

²C'alal ta x'ech' atuch' ti nabe, chi'inbilot cu'un. C'alal ta x'ech' atuch' ti uc'umetique, mu xa squilot ech'el. Mi oy bu ta x'ech' atuch' ti c'alal yacal ta tilel ti c'oq'ue, mu xac'ac', mu stsacot ti slebe.

³Ajvalilun avu'un, avajpojvanejun, ch'ul Diosun yu'un ti Israele. Vu'un cac'be stoj acolelic ti Egiptoe, ti Etiopiae, xchi'uc ti Sabae.

⁴Yu'un mu tuch'bajucot ta o'ntonal ta xca'i. Ech'em atunel, toj c'ux ta xca'iot. Ti jech ventainbilote, ti jech mu xa'aq'ue ta milele, laj cac' ta c'abal ti jnaclejetique, ti muc'tiquil lumetique.

⁵Mu xaxi', yu'un li' jchi'inojote. Yu'un ti avinquileltac ti oyic ta stuq'uil sloq'ueb c'ac'ale, ti oyic ta stuq'uil smaleb c'ac'ale, ta stsob sbaic talel cu'un.

⁶Xichi ta xcalbe ti yajval yolon ti yolon xocon sloq'ueb c'ac'ale: ‘Sutesbun talel’. Xichi ta xcalbe ti yajval yolon ti yac'ol xocon sloq'ueb c'ac'ale: ‘Mu xapojbun comel ti stuquique. Ac'bun talel ti jquerem jtsebtac ti oyic ta nome, ti tanijemic ta xchanjotal ti banomile.

⁷Ac'bun talel scotolic ti buch'utic yich'ojbeicun xa ti jbie, ti laj cac'beic ti xch'ulel yanimaique, ti chapanbil cu'un ti xtixet no'ox xchi'uc ti jlequilal cutsilale.’

⁸“Ac'o talicuc avu'un ti jteclumale, yu'un ma'sat c'otemic, ac'o mi lec xpilpun ti satique, yu'un cocorix c'otemic, ac'o mi jamal ti xchiquinique.

⁹Acotolic jteclumetic, tsobo abaic talel, volo abaic talel ta jmoj, muc'tiquil lumetic. ¿Buch'u junucal ti jteclumetic taje ti laj scaj'al ti va'i s'elan taje, ti laj xa ono'ox yalilan talel ti c'usitic laj c'otuc ta pasel ta vo'nee? Talicuc ti rexticoetic ti ta sva'an sbaic ta yalel ti mi oy smelol ti c'usi laj yich' alele, yo' jech ta xich' chiquintael, ta xich' alel ti ja' melel ti c'ope.”

¹⁰Yu'un ti Diose xi jamal ta xale: “Vo'oxuc cajrexticooxuc, cajtuneloxuc ti laj jt'ujoxuque, yo' jech ta xavojtiquinicun, yo' jech ta xapat avo'ntonic ta jtojol, yo' jech ta xana'ic xtoc Buch'uun. Yu'un c'ajomal no'ox vu'un ti Diosune, mi junuc dios oy c'alal oyun ono'oxe, mi ja'uc ti oy bu to ta xvul ta loq'uel ta ts'acale.

¹¹C'ajomal no'ox vu'un Diosun. Mu'yuc xa bu ta sta scoltaelic ta yan.”

¹²Ti vu'un Diosune xichi ta xcale: “Laj caj'al ti laj jpucbe sc'oplale: Vu'un laj jtic' jba ta apojelic. Mi ja'uc laj spas yan dios. C'otemoxuc ta cajrextico.

¹³Yu'un le' xa ono'ox talel ta vo'ne ti vu'un Diosune. Mu'yuc buch'u xu' ta xcolic loq'uel ta coc ta jc'ob. Mu'yuc buch'u xu' ta smac ta be ti c'usi ta jc'an ta jpase.”

¹⁴Ti Ajvalile, ti ja' ch'ul Dios yu'un ti Israele, ti c'ot ta pasel yu'un ti laj stic' sba ta spojelique, xi ta xale: “Yo' jech ta xc'ot ta pasel ti ta jtic' jba ta apojelique, ta jtac batel jnaclejetic ta jteclum Babilonia. Ta xc'ot ta pasel cu'un ti ta xjam scotol ti sti'tac ti moque. Ti smuyubajelic ti caldeoetique, ta xlic joybijuc ta tsots vocol.

¹⁵Vu'unun ti Ajvalilune laj cac'be xch'ulel yanima ti Israele. Ch'ul Diosun, Ajvalilun avu'unic.”

¹⁶Yu'un ti Diose laj sjam jelavel be ta nab. Ti bu xluchumaj no'ox yacan ti uc'ume, laj sjam jelavel be.

¹⁷Yu'un xvoletic no'ox batel yu'un scotol ti soldadoetic ti tsots xu' yu'unique, yo' jech jmoj ta tsutsesatic ta j'ech'el xchi'uc ti scarretaique, xchi'uc ti sca'ique. Jipat yalel ta lum ti mu'yuc xa bu xcuch stam sbaic liquele. C'otic ta tubel jech c'u cha'al ta xtub ti mechae.

¹⁸Avi tana li' une, xi ta xalbe steclumal ti Diose: “Ma'uc xa me xbejbun ta avo'ntonic yu'un ti c'usi c'ot ta pasel ti voljee. Mi ja'ucuc xa xanopilan ti c'usitic x'ech' xa ti sc'oplale.

¹⁹Yu'un oy c'usi ta ach' ta xlic jpase. Ta xavil tana li'e ti ta xvinaj ti ta xc'ot ta pasele. Yu'un ti ta sbajtical banomile, ta jam jun be. Ta xt'om uc'umetic ti bu mu'yuc stu ta j'ech'el ti banomile.

²⁰Ti te'tical chon bolometique, ti oq'uiletique, ti j'anilajel-mutetique, ta xlic yich'icun ta muc'. Yu'un ta xlic c'otuc ta t'omel vo' cu'un ta sbajtical banomil. Xpolet no'ox liquel uc'umetic cu'un ti bu mu'yuc stu ta j'ech'el ti banomile, yo' jech ta xcac'be yuch'ic vo' ti jteclumal ti t'ujbil cu'une.

²¹Ti jteclum ti chapal cu'une, ta svinajesbeic slequilal yutsilal ti jc'oplale.

²²“Ja'uc ti vo'ot une, Israel, steclumal Jacob, mu'yuc bu laj ataun ta c'oponel. C'ajomal no'ox jeche' xch'ayet ta jtojol.

²³Mu'yuc bu laj avac'bun ti chic'bil matanal chije. Mi ja'uc laj avich'un ta muc' ta yac'belun ti milbil matanaletique. Ti vu'une mu xic'anc'unuc ta matanal ta slubtsaneloxuc. Mu'yuc laj quilbajinoxuc ta stsatsal c'anel ta yac'belun ti pome.

²⁴Mu yu'unuc ti utsuc xa xamanic muil aj yo' jech ta xavich'beicun talel ta jmotone. Mi ja'uc xlaet xa co'nton avu'unic yu'un ti xepu'al milbil chon bolometique. C'ajomal no'ox laj jta ti mu xa ts'icbaj ta xca'i yu'un ti amulique, ti laj asoquesbeicun co'nton yu'un ti apochanilique.

²⁵“Ja'uc le' une, ti jech Diosun avu'une, c'ot ta tubel ti amilvanejale. Mi ja'uc xa ta jvules ta co'nton ti c'u spimil ti amule.

²⁶Mi oy c'usi mu sta o ta xavil ti c'usi ta jpasbote, la' jtunestic ca'itic ti lequil chapanele. Chapchunan talel ti c'usi achapoj tal une, ja' to ta xvinaj mi ch'abal ti amul ta xloc' une.

²⁷Ti sliquebal atot ame' ta vo'nee laj sta smul. Ti jchanubtasvanejetic avu'une joybijic ta cajcontratac.

²⁸Ti ajvaliletic avu'unique laj soquesbeicun ti jch'ulnae. Jech o xal un, jsat no'ox jq'uel ti chopol c'optabil lilijem com ti Israel steclumal ti Jacobe.