Read Tzotzil Isaías 45 Bible Online

Isaías 45 - Tzotzil bible

Isaías 45

¹Va'ane ta ajvalil yu'un Dios ti Ciroe, ti yich' nitbel sc'ob yo' ta xu'ninan ti muc'tiquil lumetique, ta spojbel yabtejebic ti ajvaliletique. Ta xc'ot ta pasel yu'un Dios ti naca sjam no'ox ech'el ti ti' ochebaletic yu'un ti lumetic ti bu ta x'ech' ti Ciroe, ti mu ja'uc xa buch'u xmac yu'une. Avi tana une, xi ta xalbee:

²“Jba'be ta xibat avu'un. Sbuset no'ox yalel ta jinel cu'un ti c'usitic oy ta toyole, ti naca jvoc' no'ox batel ti'na ti meltsanbil ta c'anal taq'uine, ti naca jlilin no'ox ech'el ta c'asel ti pisajtic taq'uin yich'oje.

³Ta xcac'bot ta avoc ta ac'ob ti c'usitic toyol stojol ti q'uejbile, ti c'ulejaletic ti nac'bil lec ta yaviltaque, yo' jech ta xana' ti vu'unun ti Ajvalile, Diosun yu'un ti Israele, ti laj sbiiltasote.

⁴Ta sventa ti oy to ta co'nton ti Jacobe, ta sventa ti lum Israel ti t'ujbil cu'une, laj sbiiltasot ti c'ot ta pasel laj avich' avabtel ti ich'bil lac'ot ta muc' avi tana le'e, ti c'alal mi ja'uc xavojtiquinune.

⁵Vu'unun ti Ajvalile, mu'yuc xa yan. C'ajomal no'ox jtuc Diosun, mu'yuc xa ta tael ma' ti oy to yan dios une. Chapalot xa cu'un ta xava'an aba ta yaq'uel ti letoe, ti c'alal mi xavojtiquinune.

⁶Jech laj jpas yo' jech ta sna'ic scotol ti buch'utic nacalic ta stuq'uil sloq'ueb c'ac'ale, xchi'uc ti buch'utic nacalic ta stuq'uil smaleb c'ac'ale, ti mu'yuc xa ta tael yan dios une. Vu'unun ti Diosune mu'yuc xa yan.

⁷Vu'un laj jmeltsan ti saquilal osile, ti ic'al osile. Vu'un ta xcac' ta yaq'uel ti lequilale, xchi'uc ti vocole. Vu'un ti Ajvalilun ta spasel scotol ti va'i s'elan taje.

⁸Ta toyol to ta xtal ti c'u s'elan tsalbil ta xc'ot cu'un scotole, ti co'ol s'elan jech c'u cha'al junuc ts'ujul ti ta xlic talel ta vinajele, jech c'u cha'al vo' ta xtal ta toc ti lec ta xa'i ti banomile, ti co'ol s'elan sat ts'unubal ta xvul ti pojel colele, ti nich no'ox liquel ti tuq'uil lequilale.”

⁹Ti c'usi patbil ta lum ti oy stunele, ti co'ol c'otem jech c'u cha'al ti yane, mi ja'uc ta svul sba xchi'uc ti buch'u meltsanun yu'une. Ma'uc ma' ti xi ta xalbee: “¿C'usi ta xapas le' une?” Mi ja'uc ti yan oy stunel ti xi ta xalbe ti buch'u meltsanun yu'une: “Mu xana' xa'abtej.”

¹⁰Mi ja'uc xtoc jun nich'onil ta sten ta sbaj ti ac'bat xch'ulel li' ta banomil yu'un ti stot sme'e.

¹¹Ti Ajvalile, ch'ul Dios yu'un ti Israele, ti ac'bat ti sbec'tal yu'une, xi ta xale: “¿Mi yu'un ta xavich'beicun que jti' yu'un ti jnich'nabe, mi ta stojobtaselun ti c'u s'elan sc'an pasele?

¹²Vu'un laj jmeltsan ti banomile xchi'uc ti jnaclejetic yu'une. Ta jc'ob laj jq'ui ech'el ti vinajele. Ta jmantal vinajuc talel ti c'usitic ta xac' xojobale.

¹³Vul ta loq'uel cu'un ti Ciroe yo' jech ta stsalvan. Ta xc'ot ta pasel cu'un ti mu vocoluc ti c'u s'elan xu' ta stam ochebal ti sbe ta scotole, ti ta xcha'meltsan ti jteclumale, ti ta stic' sba ta spojel scoltael ti buch'utic nutsbilic loq'uel ta slumalic ti ja' cu'untaque, ti mi ja'uc jutebuc ta sujvan xchi'uc ti stojole. Mi ja'uc ta sc'an matanal.” Ja' jech c'opoj ti Dios ti scotol xu' yu'une.

¹⁴Ti Diose xi ta xalbe ti Israele: “Ti jchabajometic ta Egiptoe, ti jbolomajeletic ta Etiopiae, ti natiquil viniquetic ti nacalic ta lum Sabae, ta sbic'tajes sbaic ta atojol. Ta xc'otic ta amosovtac, ti tijil batel ta apatic ti chucajtic ech'el ta carinae, ti xi xvocoletic xquejeletic ta atojole: ‘Ta melel xa cac'tic un, oy ta atojolic ti Dios une. Mu'yuc xa yan, mi ja'uc oy ta tael yan dios.’ ”

¹⁵Manchuc mi jech un, Diosot ti mu xavinaj ta q'uelele, Dios jpojvanej yu'un ti Israele.

¹⁶Scotolic ti buch'utic ta smeltsanic ti loc'obbailetique, ta xac' sbaic ta q'uexlal ti nijil chimilic ta xac' sbaic ta lo'il maxile.

¹⁷Ja'uc ti Israele pojbil coltabil c'otic yu'un ti Diose, ti j'ech'el pojbil c'otique. Mi ja'uc jutebuc peq'uel ti sc'oplalique, ti ta xac' sbaic ta lo'il maxile.

¹⁸Ti jpasvinajel ti ja' Diose, ti laj smeltsan ti banomile, ti lec c'ot ta meltsajel yu'une, ti lec stsacanoj sba c'ot yu'une, ti ma'uc sventa ti jeche' xocol ti laj smeltsane, ti ayanuc ti jnaclejetique, xi ta xale: “Vu'un ti Diosune, mu'yuc xa yan.

¹⁹Mu ta muculuc lic'opoj. Mi ja'uc lic'opoj ti bu toj ic' ta j'ech'el ti li' ta banomile. Yu'un ma'uc xichi laj calbeic ya'iic snitilultac ti Jacobe: ‘Xbat me asa'icun ti bu mu'yuc c'usi x'ayan une.’ Ti vu'un Diosune, melel ti c'usi ta xcale. Oyun ta yalel ti bu oy ti stuq'uile.

²⁰“Volo abaic talel, la'ic li'e. Nopajanic talel acotolic ti c'u to yepal cuxul lacomic jteclumetic. Altic quic ta j'ech'el ti buch'utic xvoletic ech'el ta xanobal xchi'uquic ti c'usitic loc'tabil ta te'e, ti xc'opoj xti'inic xa ta stojol jun dios ti mu ja'uc xpojvan xcoltavane.

²¹C'opojanic un, vinajesic talel ca'itic, ti xi xajac'olanbe abaic ta jujun tal mi lec xava'iique: ¿Buch'u laj scaj'al talel ta vo'ne ti va'i s'elane? ¿Mi yu'un oy xa ono'ox buch'u laj yal ta vo'ne? ¿Mi mu ja'uc vu'un ti Diosune? Mu'yuc xa ta tael yan Dios. Ma' ti yu'un oy to yan Dios ta tsalvanej ta pojvanej jech c'u cha'al ti vu'une, mu'yuc xa.

²²“La'ic li' ta jtojole, ta xa jpojoxuc, jteclumetic ti oyoxuc le' ta jot xchiquin banomile. Vu'unun ti Diosun avu'unique, mu'yuc xa yan.

²³Yu'un jtuc xichi ti laj jva'an jba ta rexticoe. Laj cac' que jti' ti ta xitsalvane. Ti jech laj cale, ta xc'ot ta pasel un: Scotolic ta squejan sbaic ta jtojol. Scotolic ta sva'an sbaic ta rextico ta jtojol.

²⁴Ma'uc no'ox taje, yu'un xi ta xalique: ‘C'ajomal no'ox Dios oy ta yoc ta sc'ob ti tsalvaneje, ti smuc'ul stsatsale.’ Scotolic ti xti'et sjolic ta jtojole, j'ac'-lo'il-maxil ta xc'otic.

²⁵Col albatic un, jtsalvanej ta xc'otic scotol ti lum Israele, ti mu'yuc xa no'ox c'usi jech o ta xa'iic ti xmuyubajic xa ta jtojole.”