Read Tzotzil Isaías 5 Bible Online

Isaías 5 - Tzotzil bible

Isaías 5

¹Ta sventa ti buch'u lec xquil jba jchi'uque, ta jliques ta sq'uejintael jun q'uejimol ta sventa ti ts'unubal yu'une. Ti buch'u lec xquil jba jchi'uque sts'unoj sts'unubal ta jun lequil ve'ebal banomil.

²Laj sloc lec ti banomile, laj stsob loq'uel ti ton lamale, lic sts'un ti uva ti lec sts'unubal ta j'ech'ele. Ta o'lol yut ti ts'unubale, lic sva'an natil q'uelob osil, lic xchapanbe yavil bu ta xich' pits'el ti uvae. Laj snop ti buch'u lec xquile, yac'touc ti lec chi'ic laj yac' sat ti uvae, ja'uc le' une, toj poj laj yac' ti uva une.

³A'yio ava'iic un, jnaclejetic ta Jerusalén, xchi'uc jnaclejetic ta Judá, alic ca'itic un buch'u smul, mi ja' ti jts'unub uvae, mi ja' ti vu'une.

⁴¿Mi oy to c'usi stac' pasbel ti jts'unub uvae? ¿Mi yu'un oy to ti c'usi mu'yuc laj cac'bee? Laj jnop caloj ti chi'ic ta xac' ti sate. ¿C'u cha'al ya'yel un cha'e poj laj yac' sat ti uvae?

⁵Lec un cha'e, ta xcalboxuc ava'iic ti xi s'elan jnopoj ta jpasbe ma' ti jts'unub uvae: ta jlilinbe loq'uel ti smocale, ti yich'uc stsutsesbel ya'i ti sc'oplale, ta jtenbe loq'uel ti smocale, ti yich'uc t'usel ya'i ta teq'uele.

⁶Teq'uel ta xquicta comel ya'i. Mu ja'uc xa ta xich' ch'ulbel ti staquinal sc'obtaque, mi ja'uc xa ta xich' aq'uintael, ti yich'uc net'el ya'i yu'un ti ch'ixe, ti momole. Ta xcalbe ya'i mantal ti toque, ti mu xa xac' taluc ti vo' ta stojole.

⁷Ti lequil ts'unubal uva yu'un ti Dios ti scotol xu' yu'une, ti mu tuch'baj ta yo'nton ta xa'i ti sts'unube, ja' sc'oplal ti lum Israele xchi'uc ti lum Judae. Ti Diose snopoj ti ta xch'unbat ti oy c'usi jbel tsots albil yu'une, le' une, c'ajomal no'ox laj yil ti naca milbaile. Laj snop ti oyuc lequil chapanel yu'unique, le' une, c'ajomal no'ox laj yil ti oy buch'u x'avlajet ta oq'uel yu'un ti vocole.

⁸Mu xa ono'ox cha'bel x'ech' avocolic ti vo'oxuc ti naca xaman no'ox ma' ti anaique, ti naca xaman no'ox ma' ti avosilique, ti mu ja'uc ta sman avu'unic ti yane, ti xanaquiic no'ox ta lum ti co'ol s'elan avu'un atuquic ma' ti xanaquiique.

⁹Ti Dios ti scotol xu' yu'une xi laj sva'an sba ta yalbelun ta jamale: “Ta xc'ot ta pasel ma' ti ep ta xlilij ti naetique; mu'yuc ta alel ti smuc'tiquile ti c'upil sbae, mu'yuc xa buch'u ta xnaqui liquel.

¹⁰Ti vaquib ta litro yovolal sjamlej smacoj sbanomilal ti ts'unbil uvae, c'ajomal no'ox jun uni nene' barril ta xloc' ti vinoe. Ti lajunbej coxtal ts'unubile, c'ajomal no'ox uni jbej coxtal ta xloc' ti sat trigoe.”

¹¹Mu xa ono'ox cha'bel un ti vo'oxuque, ti sob no'ox ic'luman ta xlic yacubanique, ti c'alal stsinet xa ta xava'iic yu'un ti vinoe, ti avich'ojic sjunul ti ac'ubale.

¹²Xnic no'ox ti arpae, ti jchop o ta vobe, ti tampole, ti amae, ti yepal no'ox ta j'ech'el ti vino ti yacaloxuc ta ve'ele. Mi ja'uc xatoy asatic ta sq'uelel ti c'usi ta spas ti Diose; mi ja'uc xavaq'uic ta venta ti yabtele.

¹³Jech o xal un, ti jech mu xa'ibeic xchiquinale, ti jteclumale, bec'bil ta xloq'uic ech'el ta sbanomilic. Yu'un scotol ti lume xchi'uc ti banquilaletic yu'unique, ta xlic chamicuc ta vi'nal xchi'uc ta taqui ti'il.

¹⁴Co'ol s'elan ye junuc jti'oval chon ti mu no'ox albajuc ti buyuc no'ox jomajtic ti muquinale, ti naca xilbe no'ox svocol ti jteclum xchi'uc ti banquilaletic yu'une, ja' sc'oplal ti jnaclejetic ti batem yo'ntonic ta spasel ti c'usi lec ta xa'iique, xchi'uc ti yacubele.

¹⁵Ti jnaclejetique, peq'uel ta xc'ot ti sc'oplalic ta j'ech'ele; ti jtoyobbaetique mu xa cha'bel xtoy ti satique.

¹⁶Ti Dios ti scotol xu' yu'une ta xac' ta ilel ti smuc'ul stsatsal ti c'alal ta xich' ti eale. Ti ch'ul Diose ta xac' ta ilel ti yutsilal slequilal ti c'alal yacal ta xchapanvane.

¹⁷Ta xc'ot ta pasel ta xlilij ti muc' ta lumetique; ta x'och ta q'uelob chij, ta q'uelob tentsunetic ti yavil slilijemal ti muc' ta lume.

¹⁸Mu xa ono'ox cha'bel un, ti lo'labiloxuc ta spasel ti chopole, ti jochbiloxuc yu'un ti mulil jech c'u cha'al ti carreta jochbile.

¹⁹Ti vo'oxuque xachi ta xavalique: “Ac'o me spas xch'a ti Dios ti c'usi snopoj ta spase yo' jech ta xquiltic; c'otuc me ta pasel xch'a yu'un ti ch'ul Dios yu'un Israel ti c'u s'elan snopoj ta spase yo' jech ta xcojtiquintic.”

²⁰Mu xa ono'ox cha'bel un, ti abisojic ta lec ti c'usi chopole, ti abisojic ta chopol ti c'usi lec ta pasele, ti ta xajoybinic ta saquil osil ti c'usi mu lecuc ta q'uelele, ti c'usi mu lecuc ta q'uelele, ta xajoybinic ti xojobin no'ox yutsil ta q'uelele, ti ta xajoybinic ta lequilal ti c'usi j'ac'vanej ta vocole, ti j'ac'vanej ta vocole, ta xajoybinic ta lequilal.

²¹Mu xa ono'ox cha'bel un, ti oy abijil abisoj abaique, ti xatojob avalojique.

²²Mu xa ono'ox cha'bel un, ti atuc xa no'ox abisoj abaic ta jun banquil j'uch'-vinoe, ti mu'yuc buch'u xastsalic ta smeltsanel ti uch'bajele.

²³Ta sventa ti atsacojic xa ti mich'ob c'abale, ta xavalic ch'abal smul ti buch'u oy smule; mu xa tsotsuc sc'oplal ta xava'ibeic sc'op ti buch'u ch'abal ti smule.

²⁴Jech o xal un, jech c'u cha'al ti c'oq'ue ti naca xchic' no'ox batel ti jobele, ti slebe ti naca xchic' no'ox batel ti taquin yanal te'e, jech ta xavich' ti avocolique jech c'u cha'al ti te' taquin xa xchi'uc ti yibel ta xc'aq'ue, ti xvajet no'ox batel ti xnich jech c'u cha'al ti pucuque. Yu'un laj abajic, laj atenic ti chanubtasel yu'un Dios ti scotol xu' yu'une, ti ch'ul Dios yu'un ti Israele.

²⁵Jech o xal ti Dios une soc sjol ta stojolal ti slumale, yal yoc sc'ob ta tsitsvanej. xnic no'ox liquel ti vitstique, co'ol to s'elan c'a'ep busul no'ox com ti animaetic ta bebetique. Manchuc mi jech un, mu'yuc to ech'em sc'ac'al yo'nton ma' ti Dios une, staoj to yav ta sibtasvan.

²⁶Ti Dios une lic xlich'an bandera, ti xpiet no'ox ta xic'an talel namaquil muc'tiquil lumetic, ti ta namaquil banomil ta xtal yu'une. Mu xjalijic, ta xtalic no'ox, yu'un ta jech no'ox yepal ta xvulic.

²⁷Mu'yuc junuc yu'unic ti ch'abal ti yipe, ti lubem xa xa'i sbaique, mu'yuc junuc yu'unic ma' ti mu'yuc svic'oj ti satique, mu'yuc junuc yu'unic ma' ti ch'abal stsinoj lec ti xchuque, mu'yuc junuc yu'unic ma' ti tuch'em ti yaq'uil xonobique.

²⁸Lec jich'ilic ta j'ech'el ma' ti sni' syolobique; t'imilic lec scotol ti syalcual syolobique. Ti svoy sca'ique, co'ol s'elan ton ti syijile, co'ol s'elan jun sutub ic' xcaret no'ox ti scarosal scarretaique.

²⁹Yech'omal ti c'u s'elan xvo'o'ete, co'ol s'elan jun león ti xloquet no'ox talel ti snuq'ue, ti xloquet no'ox snuc' ta stsac batel ti sve'el ti mu junuc oy buch'u xu' ta spojbee.

³⁰Ti lum taje, ti c'alal ta xc'ot sc'ac'alil ti albil sc'oplale, co'ol s'elan junuc muc' ta nab yech'omal snuq'uic ti x'avetic no'ox ta scontrainel ti lum Israele. Ti oyuc buch'u ta sq'uel ti banomile, ta xil ti ic'unebe, ta xmac sat ti c'ac'al ti tsinil ta j'ech'el ta jun ic'al lumal toque.