Read Tzotzil Isaías 50 Bible Online

Isaías 50 - Tzotzil bible

Isaías 50

¹Yu'un ti Diose xi ta xale: “¡Mu tac'aluc xc'ot avu'un ti laj jti'olta ti Israel ti ja' ame'ique jech c'u cha'al ta spas jun vinic ti ta sti'olta ti yajnile, ti laj jchonoxuc ta mosovil ti oy xa quil xchi'uc ti yane! Laj avich'ic chonel ta scoj ti amulique. Ti'oltabil c'ot ti Israel ti ame'ique, yu'un jelav ti atoyobbailique.

²¿C'u cha'al ya'yel un ti c'alal livule, mu'yuc buch'u junuc laj jta? ¿C'u cha'al ya'yel un ti c'alal li'avtavane, mu'yuc buch'u laj stac'? ¿Mi tac'al c'ot avu'unic ti mu xu' cu'un spojele? ¿Mi tac'al c'ot avu'unic ti mu xa xc'ot ta pojel colel cu'une? Ta jbel no'ox jc'op, ta xc'ot ta taquijel cu'un ti muc' ta nabe, ti sts'ijlajan liquel ti banomil bu ta xanav ti uc'umetique, yo' jech ta xchamic ta taqui ti'il ti choyetique. Ta xlic c'a'icuc ti c'alal ch'abal ti vo'e.

³Vu'un ta jpas ti ic'uneb ta xcom ti vinajele, ti lamal sc'u'inoj ta xc'ot cu'un ti me'inal c'u'ile.”

⁴Bijubtasbilun yu'un ti Diose, ti xu' cu'un ta spatbel yo'nton ti buch'utic lubtsajemic xae, ti xcuxet to ech'el banomil ta xa'iic yu'un ti jc'ope. Ts'etel xa jchiquin jmalaoj ca'i ti jujun sob ic'lumane. Sjunul co'nton ta jchiquintabe ti sc'ope.

⁵Yac'ojbun jni' jchiquin ti Diose, mu jtoy jba, mu jsutes jba ta stojol.

⁶Laj cac' ta tsitsel ta nucul ti jpate. Ch'an xa no'ox xichi c'alal laj sbulic ti quisime. Mu'yuc laj joybin jsat ti c'alal ta xisbisicun ta cotol chavale, ti c'alal ta xistubtaique.

⁷Xi oyun ti coltabilun yu'un ti Diose: Jech o xal mu'yuc xc'ot ta co'nton ti c'alal ta xisbisicun ta cotol chavale. Staoj yav va'al licom jech c'u cha'al junuc muc' ta ton un. Jna'oj lec ti mu xcac' jba ta lo'il maxile.

⁸Xi oyun ti nabal ta jts'el ti cajpac-c'ope: ¿Mi yu'un oy buch'u contra ta xiyil? ¡Batic ta stojol ti jchapanvaneje! ¿Mi oy buch'u tac'al xa yu'un ta stic'bun ti jmule? ¡taluc, ac'o yalbun ca'i ta jsat!

⁹Yu'un c'otem ta jcoltavanej cu'un ti Diose. ¿Buch'u la xu' ta stic'bun ti jmule? Scotol ti cajcontrataque, ta sac ch'ayic ech'el jech c'u cha'al junuc c'u'il ti xcununet xa ta xyal ta lum setbenal yu'un ti xchanule.

¹⁰Ti axi'taojic ti Diose, a'yio ava'iic ti xi ta xal sc'op ti yajtunele: Mi ic' ta j'ech'el ti bu ta xaxanavique, mi ja'uc jutebuc ti saquilal osile, pato avo'nton ta stojol ti Ajvalile, nabano abaic ta stojol ti Dios avu'unique.

¹¹Ja'uc le'e, scotolic ti buch'utic ta stiq'uic c'oq'ue, ti buch'utic chapalic ta xach'ic batel yolob ti yacal ta tilel ti sni'e, xbaletic no'ox liquel ta c'aq'uel yu'un sleb ti sc'oc' stuquique, lic tiluc ta yolon ti yolob ti laj atic'beic ti sc'ac'ale. Ti Diose ta stac talel ti tsitsel ta atojolic taje, ti telel ta xacomic ta lumtic ti mu x'ech' xjelav ti avocolique.