Read Tzotzil Isaías 52 Bible Online

Isaías 52 - Tzotzil bible

Isaías 52

¹Vic'o asat, lum Sión, vic'o asat un. Tsotsan ac'bo xa yipal un, ch'ul jteclum Jerusalén. Lapo xa ti ac'u' ti spajeb xa ono'ox ti yutsil slequile, yu'un ti buch'utic yan ti sjol yo'ntonique, ti mu'yuc stuq'uilique, mi ja'uc xa ta x'ochic talel yan velta.

²Tamo aba, jteclum Jerusalén. Lilino ti apucuquil une. Chotlan ta apasob mantal. Jch'iel jc'opojel jchuquel tseb Sión, jituno xa ti carina taq'uin ti chucul ta anuq'ue.

³Ti Diose xi ta xale: “Mi junuc centavo laj quich' ti c'alal ic'bil labatic jech c'u cha'al junuc mosovile. Ja' jech ec mi junuc centavo ta xcac' yu'un ti apojelic avi tanae.

⁴Ic'bil bat ba'yel ti jlumal ta Egiptoe, ti jun to jyanlumetic naquiique. Ts'acal to un, mu'yuc smulic ilbajinatic yu'un ti asirioetique.

⁵¿C'usi xal o ti vi s'elan ta xquil tana une? Ta jech no'ox yepal, bec' x'ute batel ti jteclumal c'alal Babiloniae. Cajal xa ye sti'ic ta avlajetel ti cuxul j'ilbajinvanejetic yu'unique, ti mu'yuc spajebic ta soquesbeicun ti co'ntone.

⁶Ja'uc le' une, ta sta sc'ac'alil ta xlic yojtiquinicun. Ta xlic sna'ic ti jteclumal ti vu'un Diosun ti lic'opoje.”

⁷Xvic'luj to satil yu'un ti c'alal xbitet no'ox c'otel ta stselejtic ti buch'u yich'oj c'otel lequil lo'il a'yeje, ti buch'u ta xalbe sc'oplal ti lamaj xa ti contrainele, ti buch'u ta xalbe sc'oplal ti colic xa yu'un ti ilbajinele, ti xi ta xalbe ti jteclum Sione: “Ti Dios avu'une, ja' Ajvalil.”

⁸A'yio ava'iic, ti avajq'uel-osiltaque, tsotsic xa ta xc'opojic, ti x'avanic xa ta xaq'uic ta na'el ti c'ot xa ta pasel ti tsalvaneje, yu'un laj yil ta sba ta satic c'u s'elan sut talel ti Dios ta stojol ti jteclum Sione.

⁹Ti slilijemal Jerusalene xvochetic xa liquel ta yalbel sc'oplal ti tsalvaneje, ja' ti mu xtuch' ta yo'nton xc'uxubinel steclumal ti Diose, ti laj stic' sba ta spojel ti Jerusalene.

¹⁰Yu'un ti Diose laj yac' ta ilel smuc'ul stsatsal ta sba ta sat scotol ti muc'tiquil lumetique. Yu'un scotol banomil ta sna'ic ti ja' jpojvanej cu'untic ti Diose.

¹¹Loc'anic talel ta Babilonia, loc'anic xa talel. Mu xasoques abaic yu'un ti c'usi ta soquesvane. Loc'anic xa talel ta Babilonia. Stuc'ulanuc sbaic lec ti buch'utic ta xich'ic batel ti c'usitic ja' yu'un ti Diose.

¹²Ja'uc le' une, mu ta jechuc yepal xavoletic loq'uel ta anil, ti jatviloxuc xa loq'uele. Ti Ajvalil Dios yu'un ti Israele, chabibiloxuc yu'un ta jujujot.

¹³Ti cajtunele tsalbil ta xc'ot yu'un scotol, cajal toyol c'ot sc'oplal.

¹⁴Yu'un epal jnaclejetic ch'ayal c'ot yo'ntonic ta stojole, ti mu xa x'elomaj ti sat yelov ta q'uelele.

¹⁵Ja' jech xtoc ep muc'tiquil lumetic ti ch'ayal ta xc'ot ti yo'ntonique. C'alal ta xlic yilic ti ajvaliletique, mi ja'uc xa xtal ta sjolic ti c'usi xu' ta xloc' ta yeique. Yu'un ja' to ta xlic yilic, ta xlic ya'ibeic jutebuc smelol ti c'usi mu'yuc ya'yiojique.