Read Tzotzil Isaías 54 Bible Online

Isaías 54 - Tzotzil bible

Isaías 54

¹Muyubajan ta avanel, ants, ti mu xana' xa'alaje, ti mu'yuc no'ox ti avalab anich'nabe. Laetuc no'ox avo'nton ta q'uejimol, ti vo'ot ti mu'yuc ono'ox aviloj ti alajele, yu'un xi ta xalbot ti Diose: “Ti tenbilal antse, ja' ep ta xil ti yalabtaque, ja' mu sta ta xil ti ants ti buch'u oy ti smalale.”

²Muq'uibtaso ti avaxibalnae. Mu ta xi'eluc xaxach' batel ta lich'anbel yaxibal ti ana ti bu nacalote. Xach'o batel ta timanel ti xch'ajanultaque. Pajbo lec ti spajobte'altaque.

³Yu'un xi ta stuq'uil bats'i c'obe, xi ta stuq'uil ts'et c'obe, ta xapuc abaic batel. Ti anitilultaque ta xu'ninic ti epal muc'tiquil lume, ta snojesic ta naclej ti jteclumetic ti jeche' pochol avi tanae.

⁴Mu xaxi', laj sc'oplal ti lo'il maxiltabilote, ti chopol ta xc'opojic ta atojole, ti ta snijanot ta q'uexlal apune. Ta xc'ot ta ch'ayel ta avo'nton ti q'uexlal apunot to ox ta atsebale. Nom ta xc'ot ti na'lebilot ta scoj ti ame'lal antsile.

⁵Ti Buch'u laj yac' ach'ulel avanimae, ta sbisot ta snup xchi'il. Dios scotol xu' yu'un, xi sc'oplal. Ti jcoltavanej avu'une, ja' ch'ul Dios yu'un ti Israele, ja' Dios ti sventainoj sbejel ti banomile.

⁶Yu'un co'ol to ox a'elan jech c'u cha'al jun tsebal jipbilal ants ti oy ta vul o'ntone. Ja'uc le' une, ti Dios avu'une laj staot ta iq'uel ti xi ta xalbote:

⁷“Xi no'ox sjalil ma' ti laj jtenot comele. Avi tanae, ta yutsil slequil co'nton, ta jcha'nabanot ta jpat ta xocon.

⁸Ta jech no'ox yepal soc ti jole. Uni jliquel no'ox ti tenbil lac'ot cu'un ta o'ntonale. Avie, tal syail xc'uxul co'nton ti sbatel osil oy ac'uxubinele.” Loc' ta ye ta sti' stuc ti jpojvanej Dios avu'une.

⁹“Yu'un laj jva'an jba ta yalbel ti Noee ti mu xa xtal mut'iatuc ta nojel ta vo' ti banomile. Avi tana xtoque, ta jva'an jba ta yalel ti mu xa soc ti jol ta atojole, mi ja'uc ta jsibtasot.

¹⁰Ac'o mi ta xc'ot ta pasel ta xjel yavil ti vitsetique, ac'o mi ta xlom ti toyol ch'enetique, ti syail xc'uxul co'nton ta atojole, mi ja'uc ta xtub ta be, ti jtrate caloj ti slamajel o'ntonale, mu xtub ta be.” Taje, loc' ta ye sti' stuc ti Dios ti c'ux ta xaya'ie.

¹¹“Toj abol aba, jteclum, ti ilbajinbilot yu'un ti tsots iq'ue, ti mu'yuc buch'u ta spatbot avo'ntone. Vu'un ta xcac' ta sba ic'al baxton ti c'upil sba tonetic avu'une. Ta jchotan liquel ta sba yax'elan bax ton ti sliqueb yoc na avu'une.

¹²Ti luchlebal q'uelob osil avu'une, naca ta c'upil sba tsajal baxton ta jmeltsan. Naca ta yaxal bax ton, ta jmeltsan ti jujupech ochebal sti'tac ti jteclum avu'une. Naca ta c'upil sba tonetic, ta jmeltsan ti moquetic avu'une.

¹³Yu'un scotol ti avalab anich'nabe, ta jchanubtas, scotolic ta staic ti mu'yuc c'usi sna'ique.

¹⁴Cajal ac'oplal ta xc'ot yu'un ti pojel coltaele. Mu'yuc xa atijel ta c'op liquel yu'un ti ilbajinele. Laj to sc'oplal ma' ti ch'ayal ach'ulel ta xc'ot yu'un ti sibtasele.

¹⁵Mi oy buch'u ta stsacot ta c'ope, mu tijbiluc sjol cu'un. Tsalbil ta xc'ot avu'un ti c'alal ta xatsac ta c'ope.

¹⁶“A'yio ava'i, ti jten-taq'uine, vu'un laj cac'be xch'ulel ta yabtelanel ti xloquet no'ox ta xtil yu'un ti c'oc' ta stilesobile, ti xlic ta lum ti abtejebaletic ta smeltsane. Ja' jech xtoc vu'un laj cac'be xch'ulel ti vinic ti xu' yu'un ta tsutsesvaneje yo' jech sts'ijlajan ta xcom yu'un ti banomile.

¹⁷Ja'uc le' une, mu'yuc to buch'u smeltsanoj ti abtejebal ti xu' ta stsutsesote. Yu'un ch'an xi, ts'ijil ta xcom avu'un scotol ti buch'u ta sa'bot amule. Xi s'elan ta xcac'beic yich'ic ti buch'utic yac'oj sbaic ta tunel ta jtojole: cuchem yu'un ta j'ech'el.” Taje, ja' ta xal stuc ti Diose.