Read Tzotzil Isaías 56 Bible Online

Isaías 56 - Tzotzil bible

Isaías 56

¹Ti Diose xi ta xale: “Ac'beic yipal ti oyuc slequilal ti jol o'ntonale. Ja'uc pasic ti c'usi leque, yu'un jutuc xa sc'an xc'ot ta pasel ti pojel colebale, ti ta xcac' ta ilel smuc'ul stsatsal ti coltael cu'une.

²Mu'yuc c'usi sna' ma' ti buch'u yac'ojbe yipal ta spas ti mantaletique, ti ta yutsil yo'nton ta xc'ot ta pasel yu'une, ti ta xchabi ti sc'ac'alil cuxob o'ntonale, ti mu ja'uc ta soquese, ti stuc'ulanoj sba ti mu spas jset'uc ti c'usi chopole.”

³Mi ja' jun jyanlum ta xac' sba ta yoc ta sc'ob ti Diose, ma'ucuc me ti xi ta xale: “Ch'acalun xchi'uc ma' ti steclumal Dios une.” Mi ja'uc xi ta xal ec ti buch'u pasbil ta capone: “Ma' li' vu'une, co'ol j'elan jech c'u cha'al junuc ti taquin te'e.”

⁴Yu'un xi ta xal ti Diose: “Mi ta xich'ic ta muc' sc'ac'alil cuxob o'ntonal ti buch'u caponetique, mi ta xc'ot ta pasel yu'unic ti c'usi oy ta co'ntone, mi staoj yav jun yo'ntonic xchi'uc ti jtratee,

⁵x'ech' to yutsil ma' ti c'usi ta xcac'beique, ja' mu sta sc'oplal ti oyuc ti squerem stsebe. Ta xcac' que jti' ti mu xch'ay sc'oplal ta jch'ulnae, ti bejel ta xcom sbatel osile.

⁶“Ti jyanlumetic ti ta xac' sbaic ta coc ta jc'obe, ti ta xac' sbaic ta tunel ta jtojole, ti mu tuch'bajun ta yo'ntonic ta xa'iique, ti ta xc'otic ta cajtuneltaque, ti ta xich'ic ta muc' ti sc'ac'alil ti cuxob o'ntonale, ti ma'uc ta soquesique, ti staoj yav jun yo'ntonic ta xich'ic ta muc' ti jtratee,

⁷ta jvolic talel ta ch'ul vitstic cu'un. Mu'yuc no'ox c'usi sna'ic cu'un ta snail ti c'opojebal ti'inebal cu'une. Ta jtsacbe, ta xquich'be ti chon bolometic ti ta xac'beic yich' svocol ta milel ta chiq'uel ta sba ti caltare, yu'un na'bil ta xc'ot sc'oplal ti jna sventa c'opojebal ti'inebal yu'un scotol ti jteclumetique.

⁸Ta xc'ot ta pasel cu'un ti ta sutic talele, ti ta svol sbaic talel ti buch'utic tenbil loq'uic ta slumalique.” Taje, ja' ta xal stuc ti Dios ti ta xc'ot ta pasel yu'un ti ta stsob talel ti israeletic ti buyuc no'ox tan puc oyique.

⁹Xi ta xal ti Diose: “Volo abaic talel, pucujil jti'oval chonetic. La'ic, te'tical chonetic, ta sbalel ta ti'el ti jvoc' chijetique.

¹⁰Yu'un ti jchabivanejetic yu'un ti jteclumale, c'otem ta ma'satetic. Mi ja'uc xa xilic ti oy c'usi ta xc'ot ta pasele. Scotolic co'ol s'elan ts'i' ch'an xi mochol no'ox ti mu'yuc xvajvune, ti ja' xa xlaj o xchi'uc ti mochol ta vaichinajele, ti vayel xa no'ox batem ta yo'ntone.

¹¹Jun to jchamel vi'nal ts'i'etic ti mu xnoj ti xch'ut ta j'ech'ele. Jech c'u cha'al jun jq'uel-chijetic ti mu ja'uc jutebuc xa'ibeic ti smelole. Ti jujune stamoj batel sbeic ta sa'el ti c'usi ta xtun yu'unique.”

¹²Xi ta xalbe sbaique: “Ba jsa' cuch'tic vino ti tsots paseme yo' jech ta xijyacub. Ti c'u s'elan ta jpastic avi tana li'e, jech me jpastic oc'om un, mi xjelav to jutuc.”