Read Tzotzil Isaías 63 Bible Online

Isaías 63 - Tzotzil bible

Isaías 63

¹“¿Buch'u ti le' xtal ti liquem talel ta muc' ta lum yu'un ti Edome? ¿Buch'u ti le' xtal ti jun yutsil stsajal c'u' slapoj talel ti xi'bal sba c'u s'elan ti stsatsal ta xanav talele?” Xi ta xal ti Diose: “Vu'unun ti laj caj'albe sc'oplal ti tsalvaneje, ti oy jmuc'ul jtsatsal ta pojvaneje.”

²“¿C'u cha'al un cha'e ti tsoj ta j'ech'el ti ac'u'e, ti co'ol s'elan yilel ta xapits'olan ta teq'uel ti uvae?”

³Xi ta xal ti Diose: “Jech, yu'un jtuc no'ox laj jpits'olan ta teq'uel ti uvae. Mu'yuc buch'u laj scoltaun. Ta sc'ac'al xa co'nton ta j'ech'el laj jpujilan ta teq'uel ti cajcontrae. Laj jpuj ta teq'uel, ch'it talel ti xch'ich'elic ta jc'u'e, ti laj sbon sjunul ti jc'u'e.

⁴Vu'un laj jnop ti oy jun c'ac'al ta xlic chapanvancune. Sta xa sc'ac'alil ta jpoj ti jlumale.

⁵Ja' la xaval le' une, mi junuc buch'u laj scoltaun. Ch'ayal c'ot co'nton yu'un ti mu'yuc buch'u ta stic' sba ta scoltaelune. Ta coc jc'ob no'ox litsalvan. Litsatsub yu'un ti xvolet ti sc'ac'al co'ntone.

⁶Ta sc'ac'al xa co'nton ta j'ech'el laj jlilin ti muc'tiquil lume. Ta soquemal jol laj jtubbe sc'oplal, ti xbein no'ox batel ta banomil ti xch'ich'elic cu'une.”

⁷Ta jc'an ta xcalbe sc'oplal syail xc'uxul yo'nton ti Diose, ta sq'uejintael lametel q'uejimol ta sventa scotol ti c'usi laj xa spas ta jtojoltique, ta sventa ti mu albajuc yutsilal yo'nton ta stojol yalab xnich'nab ti Israele, ta sventa ti oy c'usi laj spas ta yutsil slequilale, ta sventa xtoc ti mu albajuc ti syail xc'uxul yo'ntone.

⁸Yu'un xi laj yale: “Jteclumaltac ma' ti stuquique, nich'nabiletic ti mu xisvalopatinique.” C'ot ta jpojvanej yu'unic.

⁹Scotol ti vocol lamal ta stojolique, cajal c'ot ta sba. Yu'un mu yanuc buch'u ti jpojvanej yu'unique, ja' laj sva'an sba talel stuc ti Diose. Pojeic yu'un ta sventa yutsilal slequilal, xc'uxul yo'nton. Laj stam, laj snit liquel. Jech ono'ox stalel ta spas.

¹⁰Ja'uc le' une, lic stoy sbaic ta stojol ti Diose. Laj scontrainbeic ti xch'ul lequilale. Joybij ta scontraic. Lic tsacaticuc ta leto yu'un un.

¹¹Lic svules ta sjolic c'u s'elan laj c'otuc ta pasel ta vo'ne, sc'oplal ti Moisés ti laj spoj ti steclumale, ti xi ta sjac'olanbe sbaique: “¿Bu oy ti Dios ti pojvan ta uc'um Niloe, ti laj spoj ti Moisés ti jq'uel-chij yu'une? ¿Bu oy ti Buch'u laj sjelubtas ech'el ti xch'ul bijil ta stojol ti Moisese?

¹²¿Bu oy ti Buch'u laj yac'be ta sba Moisés ti yutsilale, ti smuc'ul stsatsale? ¿Bu oy ti Buch'u laj xch'ac ta o'lol ti muc' ta nab ta sba ta sat ti steclumale yo' ta xc'ot ta pasel sbatel osil ta xpuc ti sc'oplalique?

¹³¿Bu oy ti Buch'u ic'van jelavel ta sninabil muc' ta nab ti mu ja'uc jutebuc jaxbuj ti yacanique, ti co'ol s'elan junuc ca' ech'ic ta sbajtical banomile,

¹⁴ti co'ol s'elan chon bolometic ti xlamet no'ox batel ta stenlejtique?” Tojobtasbilic ech'el yu'un sbijil ti Diose. Ja' jech laj stojobtas ech'el ti steclumale, ti laj sta ti puc ti sc'oplale, ti yutsilale.

¹⁵Q'uelo avil talel un, Dios, ta vinajel ti jun yutsil xtixet ti bu nacalote. ¿Bu bat ti xq'uixnal syail xc'uxul avo'ntone, ti amuc'ul atsatsale? ¿Bu bat avu'un ti jbainelcutique? ¿Mi ch'abal xa un ti yutsil slequil avo'nton ta jtojolcutique?

¹⁶Yu'un ti vo'ot une, jtototcutic. Manchuc mi mu xa xisna'uncutic ti Abrahame, manchuc mi mu xa xisvulesuncutic ta yo'nton ti Israele, ti vo'ot une, Dios jtototcutic, jpojvanejot ono'ox cu'uncutic une.

¹⁷Dios, ¿c'u cha'al ta xavac' ave ati' ta stamel ech'el ti yan jbecutic une? Dios, ¿c'u cha'al ta xavac' pucujibuc co'ntoncutic ti ta xc'ot ta pasel ti mu xa xajxi'tacutique? Lajuc tubuc sc'oplal avu'un le' une. Ayanuc syail xc'uxul avo'nton yu'un ti avajtuneltaque xchi'uc ti jujuvoc' ti ja' avu'untaque.

¹⁸Ti ch'ul lumetic avu'une, mu jaluc laj yu'ninic ma' ti slumalique. Ti cajcontracutique laj xa slilinic ti ch'ulna avu'une.

¹⁹Co'ol s'elan ti mu'yuc aventainojuncutic o ta j'ech'el ti vi s'elan ta xc'ot ta jtojolcutique. Co'ol s'elan ti ma'uc avu'ununcutic yilele.