Read Tzotzil Isaías 64 Bible Online

Isaías 64 - Tzotzil bible

Isaías 64

¹Oyuc la ta alel xach'ac ta jamel ti vinajel ti ta xayal talele, ti nicnunuc no'ox avu'un ti vitsetic ta atojole,

²ti jechuc c'u cha'al c'oc' ta xchic' ti ch'ix te'etique, mi ja' ti xvocan no'ox yu'un ti vo'e. Va'i un, ti avajcontrataque ta xlic sna'ic unbi ti va'alot ta stojolique. Ti muc'tiquil lum une xnicnunic no'ox ta xi'el ta atojol unbi.

³Ti c'alal xi'bal sba c'ot ta pasel avu'un ti mi ja'uc jna'cutic jset'uc ti jech ta xc'ot ta jtojolcutique, ti c'alal layal talele, laj nicuc ti vitsetic avu'une.

⁴Ta j'ech'el, mi ja'uc oy bu ca'binojcutic quilojcutic ti oy yan dios ti x'ech' to oy c'usi ta xac' ta ilel ta sventaic ti buch'utic spatoj yo'nton ta atojole.

⁵Ti vo'ote, ich'bil ta muc' ta xc'ot avu'un ti buch'u xmuyubaj xa ta spas ti c'usi leque, ti ta svules ta yo'nton ta spasel ti c'usi ta xac'ane. Soquem ti ajole, yu'un laj xa jsa' jmulcutic. Vo'ne xa laj jyanijescutic avo'nton.

⁶Jcotolcutic co'ol j'elancutic jech c'u cha'al jun vinic ti oy sc'oplal mu stac' nopele. Scotol ti c'usi lequil abtel laj jpascutique, jun yic'al ta j'ech'el jech c'u cha'al ic'al c'a' poq'ue. Xitanetcutic ta bajel jech c'u cha'al junuc yanal te' ti coquijem xa yu'un ti staquinale, ti xivalc'uj sutbijcutic ech'el yu'un yic'al ti c'usi chopol ta jpascutique.

⁷Mu'yuc buch'u junuc ti xvocolet ta atojole, ti ta xac'beic yipal ta stam sbaic liquel ta atojole. Jech o xal laj ach'ac aba loq'uel ta jtojolcutic. Jipbil tenbil licomcutic avu'un ta scoj ti jmul jcolo'cutique.

⁸Manchuc mi jech un, Cajval Dios, vo'ot jtototcutic. Lum ach'eluncutic ma' ti vu'uncutique. Vo'ot me ti jpotobote. Jcotolcutic yabteluncutic avoc ac'ob.

⁹Dios, mu me xjelav ta j'ech'el ti ta xa'ilin une, ti naca svulesel ta ajol ti c'usi chopol laj jpascutique. Q'uelo avil, ateclumaluncutic.

¹⁰Ti ch'ul jteclumetic avu'une, c'ot xa ta sbajtical banomil. Ti Jerusalene lilij xa, jeche' xa sts'ijlajan.

¹¹Ti ch'ulna ti jun yutsil ta j'ech'el cu'uncutic ti bu laj slequil-c'optaot ti jtot jme'cutique, lilijem com ti laj yich' chiq'uel ta c'oq'ue. Scotol ti c'usi batem co'ntoncutic yu'une, soc scotol.

¹²Ta scotol ti va'i s'elan c'ot ta pasel une, Dios, ¿mi mu'yuc xa c'usi stac' xapas jset'uc un? ¿Mi yu'un ts'ijil xa no'ox ta xacom ta j'ech'el? ¿Mi yu'un aq'uelojuncutic no'ox ti spajebal xa no'ox ta xavac'uncutic ta lo'il maxile?