Read Tzotzil Isaías 66 Bible Online

Isaías 66 - Tzotzil bible

Isaías 66

¹Ti Diose xi ta xale: “Ti vinajele, ja' ti bu nacalune. Ti banomile, ja' ti bu ta jtec'an ti coque. ¿Mi oy bu xu' ta xameltsanic ti jna avalojic une? ¿Mi oy bu xu' ta xameltsanic ti xcuxobil co'nton ti avalojic une?

²Yu'un vu'un laj jmeltsan scotol taje, ja' jech lic ayanuc talel. Ti vu'un Diosune, mu lo'iluc ta xcal. “Ti oyun ta stuc'ulanele, ja' ti me'un mu'nate, ti buch'u ta snijan xchiman sbae, ti ta xich' ta muc' ti jc'ope.

³Ja'uc le'e, oy buch'u ta xac'be yich' svocol ta milel jcot tot vacax, ta smil vinic xtoc. Oy buch'u ta spajbe cuchilu ta snuc' ti chije, ta smil ts'i' xtoc. Oy buch'u ta xac' ta matanal ti jchop o ta trigoe, ta xac' ta matanal xch'ich'el chitom xtoc. Oy buch'u ta xchic' ti pome, ta xich' ta muc' loc'obbail xtoc. Ti buch'utic laj yac' sjol ta spasel ti va'i s'elan taj ti mu albajuc xchopolal ta j'ech'ele, jun yutsil ta spasel xa'i.

⁴Ja' jechun ec, ta jt'ujbeic ti c'u s'elan ta xcac'beic yich' ti svocolique. Ta jtac talel ta stojolic ti bu xi'emic yu'un ta j'ech'ele. Lic'opoj liti'in ta stojolic, mu'yuc xc'opoj xti'inic. Xivulvun, mu'yuc buch'u stac'. Ja' laj spasic ti c'usi ma'uc lec ta jq'uele. Lic stamic ta spasel ti c'usi chopol ta xquile.”

⁵Ts'et chiquintao ava'iic sc'opojel ti Diose. Xi ta xal ta atojol ti ta xavich'beic ta muc' ti sc'ope: “Oy jlom avinquilelic ti xti'et sjolique, ti ilbajinbiloxuc yu'un ta sventa ti xavocoletic ta jtojole, xi ta xalique: ‘Quere, jq'uel xa me ca'i ma' ti yutsilal slequilal ti Dios une. Jq'uel xa me ca'i ti xmuyubajique.’ Ja'uc le' une, ta xc'otic ta j'ac'-lo'il-maxil.

⁶Ati va'i s'elan xvochvun ta xlic talel ta jteclume, ti va'i s'elan xvochvun ta xlic talel ta ch'ulnae, ja' xa xvochvun yu'un ti Dios ti tal yac'be stojic ti yajcontrataque.

⁷“Ti lum Sione, c'ot ta stojol co'ol s'elan jun ants ti lic yil osil banomil ta jech no'ox yepal ti c'alal mu'yuc ya'binoj ti yipal xc'uxul ti alajele.

⁸¿Mi oy buch'u ya'yioj ti co'ol x'ale sc'oplale? ¿Mi oy buch'u yiloj ti xco'olaj c'otem ta pasele? ¿Mi oy bu ta jun no'ox c'ac'al ta xlic ayanuc jun muc' ta lum? ¿Mi oy bu ta uni jliquel no'ox ta xlic ayanuc jun muc' ta lum ta jech yepal? Ja'uc le' une, ti c'alal stsic'luj xc'uxul olol ta x'ayan yu'un ti Sione, ta jech yepal, laj yil ti xnich'nabe.

⁹¿C'u ono'ox la xachi ta jpajes ta svoq'uesel ti olole, ti c'alal c'otem ta jventa ta xil ti osil banomile? Vu'un ti Ajvalil Diosun avu'un laj cal ma' taj une.”

¹⁰“Muyubajanic xchi'uc ti Jerusalene. Mu'yucuc c'usi xana'ic xchi'uc scotol ti buch'utic mu tenbaj tuch'baj ta yo'nton ta xa'iique. Volo abaic ta muyubajel xchi'uc scotol ti buch'utic oq'uic ta sventae.

¹¹Ti co'ol s'elan c'otem ta me'il ti stuque, ta smuq'uibtas avo'ntonic ta smalael ti c'usi q'uelel asatic yu'une, ja' to ti mu'yuc c'usi xana'ic liquele.

¹²Ti vu'un Diosune xichi ta xcale: “Co'ol s'elan jun uc'um ta xcac' taluc ta stojolic ti lamajemal o'ntonale. Sc'ulejal ti muc'tiquil lume, co'ol s'elan balac' vo' ta xcac' vuluc ta stojolic. Ta sbain ta smalq'uineloxuc. Snitojoxuc talel ta sc'obic ti mu'yuc xa c'usi xana'ic ta j'ech'el yu'une.

¹³Jech c'u cha'al me'il ta spatbe yo'nton ti yalabe, ja' jech ta jpatboxuc avo'ntonic. Ta xataic ti mu'yuc c'usi xana'ic liquel ta Jerusalene.

¹⁴C'alal ta xavilic ta xc'ot ta pasel taje, xlaet liquel ti avo'ntonique. Ta xlic queremajuc ti abec'tal atacopalic jech c'u cha'al ta xq'uex yanal ti abnaletique. Ti vu'un Diosune ta xcac' iluc ti jmuc'ul jtsatsal ta stojol ti jtuneltaque. Ta xcac' iluc ti scapemal jol ta stojol ti jcontrataque.”

¹⁵Ti Diose, ta jun leb c'oc' ta xvul ta loq'uel, ti co'ol s'elan sutub ic' ti scarretataque, ti tilem ta j'ech'el ti sc'ac'al yo'nton ta yaq'uel ti tsitsele.

¹⁶Jech, ti Diose tsots ta j'ech'el ti ye sti' ta xchapanvan ti co'ol s'elan c'oq'ue. Ta yespada ta xchapan scotol ti banomil ti ep ta xchamic yu'une.

¹⁷Ti Diose xi ta xale: “Ti buch'u ta xac' sba ta tunel ti ta spoc sba yo' ta snijan xchiman sba ta stojol yan dios ta ts'unbilal nichime, ti naca sts'ac-patiic no'ox ech'el ta sti'el ti chitome, ti ch'oe, ti yan chon bolometic ti albil sc'oplal mu stac' ti'ele, ta j'ech'el, tub xi sc'oplalic,

¹⁸yu'un xcojtiquinbe ti yabtelique, ti c'usi ta snopique. Jech o xal un, c'ot xa yorail ta jtsob scotol ti jteclumetique xchi'uc ti muc'tiquil lume. C'alal ta xtalique, ta xilic ti jlequilal cutsilale.

¹⁹Xi s'elan senyail ta xcac' iluque: ta xjatavic loq'uel cu'un jlomuc ti ta jtaquic batel ta muc'tiquil lume: jech c'u cha'al ta lum Tarsis, ta lum Libia, ta lum Lidia, ta jteclumetic ti bu sna'ic xach'el ti yolobe, ta lum Tubal, ta lum Grecia, xchi'uc ta yan lumetic ti oy ta namal muc'tic nabe, ti mu'yuc ya'binojic ti jc'oplal ta j'ech'ele, ti mu ja'uc yilojic ti cutsilal jlequilale, ti ta xlic yalbeic ya'iic ti cutsilal jlequilal ta stojolique.

²⁰Ti ta muc'tiquil lumetic taje, ta xiq'uic loq'uel talel scotol ti avinquilelique, ti cajalic ta xtalic ta ca'e, ti ta carretae, ti chotol ta xtalic ta q'uechbil chotlebale, ti cajal ta xtalic ta mulae, ti ta camelloe. Co'ol s'elan ta xc'ot ta matanal ta jtojol ta lum Jerusalén, ta ch'ul vits cu'un, jech c'u cha'al ta xich'ic talel matanal ti israeletic ti lec suc'bil ti bis ta xich'ic talel ta jch'ulnae.

²¹Oy jlom yu'unic ta jt'ujic yo' ta x'ochic ta paleetic, xchi'uc ta xtunic jech c'u cha'al ta xtunic ti levitaetique”, xi ti Diose.

²²Xi ta sva'an sba ta yalel ti Diose: “Jech c'u cha'al ta xjalij ti ach' vinajele, xchi'uc ti ach' banomil ti ta xlic jmeltsane, ja' jech ta xjalijic ti anitilultaque, ti mu'yuc ch'ayem ta o'ntonal ti ac'oplalique.

²³Ti jujun u sc'ac'alil ti ach' ue, ti jujun xemuna sc'ac'alil ti cuxob o'ntonale, scotolic ta xtal squejan sbaic ta jtojol. Ti vu'un Diosune laj cal ma' taj une.

²⁴Ta xtalic un, ta xilic ti chamemic xa scotolic ti buch'utic laj stoy sbaic ta jtojole. Ti xuvit xvolvun ta xti'eic yu'une, mi ja'uc ta xcham. Ti bu tiq'uilic ta c'oq'ue, mi ja'uc xtub. Spajebal xa no'ox mu xa stac' alel ti xchopolil ta xilic scotol ma' ti jnaclejetique”, xi ti Diose.