Read Tzotzil Isaías 7 Bible Online

Isaías 7 - Tzotzil bible

Isaías 7

¹Ti Rizín ajvalil yu'un ti lum Siriae, xchi'uc ti Peka xnich'on ti Remalías ajvalil yu'un ti Israele, lic stsaquic ta leto ti jteclum Jerusalén ti ta xu'ninic ya'iique. Mi ja'uc cuch yu'unic. Ti c'ot ta pasel taje, ja' o ti c'alal tiq'uil ta ajvalilal ta lum Judá ti Acaz xnich'on ti Jotam smom ti Uzíase.

²Ti yorail taje, xi bat yich' albel ya'i ti ajvalil Acaz xchi'uc ti c'u yepal oy ta snae: “Ti sirioetique laj xa sco'oltas sjolic xchi'uc ti Efraine.” Ti ajvalile xchi'uc ti jteclume, xt'el-t'unic no'ox liquel ta xi'el jech c'u cha'al ta xc'uyet ta jujujot ti te'tic ti ta xvuq'ue yu'un ti iq'ue.

³Va'i un, ti Diose xi laj yalbe ya'i ti Isaíase: “Ic'o batel ti anich'on Sear-jasube. Bat nupo ta be ti ajvalil Acaz ta jot sti'il macbil vo' ti oy ta ac'ol ti bu ta x'ech' ti be ta xbat ta osiltic ti sbiinoj Chuc'ob poq'uetique,

⁴ti xi xavalbe ya'ie: ‘Tsotsan me ya'i, mu ja'uc xatsiq'ues avo'nton, mu ja'uc xaxi', mu ja'uc xbat ach'ulel yu'un xchi'uc ti chib xupite' ti xtomtun no'ox ti xch'ailale, ti ja' sc'oplal ti Rizín xchi'uc ti sirioetic yu'une, xchi'uc ti xnich'on Remalíase, ti liquem ta j'ech'el ti sc'ac'al yo'ntonique.

⁵Ti sirioetique, xchi'uc steclumal ti Efraine, xchi'uc xnich'on ti Remalíase, nopbil xa yu'unic ti chopol ta spasbot ya'i ti xi ta xalique:

⁶Ochcutic batel ta Judá, la' jsibtastic ya'iic ti cu'ninbetic ti slumalique, ti ochuc ta ajvalil cu'untic xnich'on ti Tabeele.

⁷‘Ja'uc ti Dios une xi laj yale: Ti jech taje, mi ja'uc ta xc'ot ta pasel un.

⁸Ta jteclum Damascoe, ja' ti bu chotol ti ajvalil yu'un ti Siriae. Ti Rizine, ja' ti ajvalil ta jteclum Damascoe. Ti li' ta vo'ob xchanvinic (65) jabile, ta xlic yich' svocol ti Efraine, ja' to ti c'uxi ch'ab xi sc'oplal ti jteclume.

⁹Ti smuc'ul yo'nton ta xa'i ti Efraine, ja' ti muc' ta lum Samaria. Ti smuc'ul yo'nton ta xa'i ti lum Samariae, ja' ti bu ochem ta ajvalil yu'un ti Samaria xnich'on ti Remalíase. Ti mi xtal xbat no'ox ti snopbenal avu'unique, mi ja'uc ta xajalijic ta banomil’ ”

¹⁰Ti Acaz xtoque, xi albat yu'un ti Diose:

¹¹“C'anbo ti Ajvalil Dios avu'une, ti ac'o yac'bot avil c'usi jchop o ta q'uelel ti ta xc'ot ta senyail avu'un ta xlic talel ta yolon to ti banomile, mi ja' ti ta xlic talel ti bu xa slajeb toyole.”

¹²Ti Acaze xi laj staq'ue: “Mu jc'an jlajeltsabe yo'nton ti Dios ta sc'anbel ma' ta jchop o senyail ta yac'belun quile.”

¹³Va'i ti Isaías une xi laj yale: “Ts'etano achiquinic ta ya'yiel ava'iic ti vo'oxuc ti snitiluloxuc ti Davide. ¿Mi ch'an xa no'ox la xi ac'oplalic xana' un ta yilbajinel ta soquesbel sjol yo'nton ti viniquetique, ti jech oyoxuc ta soquesbel yo'nton ti Dios xtoque?

¹⁴Avi tana li'e, xi s'elan ta xlic yac'boxuc avilic senyail stuc ti Diose: Xchi'inoj xa yol ti jun tsebe, ti ta xilbe sat ti yol ti Emanuel ta xac'be ti sbie.

¹⁵Ta sliquebal jabil xch'iel sc'opojel ti olole, naca setajtic chu' vacax ta stun ta slajes, xchi'uc ta stunes ti ajapome.

¹⁶Ja'uc le' une, ti c'alal mu to xtojob lec ta snopel ta xchiquintael ti olole, steclumal ti cha'vo' ajvalil ti ta xayac'bot ep xi'el ta j'ech'ele, sts'ijlajan ta xcom.

¹⁷“Ti Diose ta xac' taluc ta atojol, ta stojol ti ateclumale, ta stojol snitilultac ti ajvalile, ti sba to velta ta xc'ot ta pasel ti jech c'ac'al taje, ti ja' mu sta c'ot ta pasel ti c'alal laj xch'ac sba ti Efraín ta stojol ti Judae.” (Taj une, ja' me sc'oplal ti ajvalil yu'un ti Asiriae.)

¹⁸Ti yorail ta xc'ot ta pasele, ti Diose co'ol s'elan vov ta xac' taluc ti buch'utic nacal ta namal banomil ti oyic ta sti'il uc'um yu'un ti Egiptoe; co'ol s'elan chanul ajapom ta xac' taluc ti Dios ti buch'utic nacalic ta lum Asiriae.

¹⁹Scotolic taje, ta xtal slaman sbaic ta volej ti bu spulul-pulul ti banomile, ta nail ch'entic, ta sjunlej spimilul ti ch'ixtique, ta yavil yuch'ob vo' ti chon bolometique.

²⁰Ti yorail ta xc'ot ta pasel taje, ti Diose ta stunes ti ajvalil yu'un Asiria ta jun ch'amunbil nauxa ti ta xlic talel le' ta jot uc'um Eufratese, yo' jech ta xch'ulbeic sjolic yisimic, xchi'uc ti bu xa c'alal nac'al ti tsotsetic yu'un ti israeletique.

²¹Ti yorail taje, ti buch'u sts'unoj jcotuc me' vacax, xchi'uc cha'cotuc ti me' chije,

²²yepal me ti ya'lel xchu' ta xaq'ue, ti xu' ta smeltsan ti lec setajtic ta slajese. Scotol ti c'u yepal ti mu'yuc xlajic ti c'alal ta xich' lilinel ti lume, ta slajes ti lec setajtic ya'lel xchu' vacaxe, xchi'uc ti ajapome.

²³Ti yorail taje, ti bu to ox ts'unbil jmil (1,000) ta tec' ti uvae, xchi'uc ti xtoj o to ox yu'un jmil (1,000) ta sep platae, scotol ta xc'ot ta yavil ch'ixtic, ta yavil momoletic.

²⁴C'ajomal no'ox xu' ta x'ochic batel ti buch'u oy yu'unic ti snitobil sni' syolobe, yo' jech ta snuts ti c'usitic oy ti bu taje. Yu'un scotol ti lume ta xjoybij ta xch'ieb ch'ix xchi'uc ta xch'ieb momoletic.

²⁵Ti ta vitstic ta sloquic to ox ta azarone, mu no'ox albajuc ta xch'i ta j'ech'el ti ch'ixe, ti momole. Mu ja'uc buch'u xu' ta x'och batel ti bu taje. C'ajomal xa no'ox c'ot ta yavil sve'eb vacax, ta sve'eb ti chije.