Read Tzotzil Isaías 9 Bible Online

Isaías 9 - Tzotzil bible

Isaías 9

¹Ta ba'yel ti Diose laj yac' ta lo'il maxil ti Galilea yosilal ti Zabulone xchi'uc ti Neftali ti nopol oyic ta naclej ti jyanlumetic ti yan sjol yo'ntonic ta stojol ti Diose, ti smacojic ta lamlej ech'el ta jot sti'il uc'um Jordán ti c'otem c'alal to ta ti' nabe. Le' une, ta ts'acal to c'ot ta pasel ti ich'bil ta muc' c'ot yu'une.

²Ti jnaclejetique, ti mu to ox xilic ti saquilal osil ti bu stamojic batele, sac jaman no'ox ti banomil lic yilique. Ech'em no'ox yutsil xchijlajan yutsil ti banomil laj yilic ti mu xilic to ox ti saquilal osile.

³Dios, mu no'ox albajuc laj jtacutic avu'un ti smuyubajel co'ntoncutique, ti spajeb xa no'ox ta j'ech'el ti muyubajele. Scotolic xmuyubajic ta atojol jech c'u cha'al yorail ta stsobic ti ts'unubale, jech c'u cha'al xmuyubajic xa ta xch'acbe sbaic ti epal c'ulejale.

⁴Yu'un vo'ot laj atsutsesbe sc'oplal ti mu x'ech' xjelav svocolic ti oyic ta mosovinel ti jnaclejetique, ti ilbajinel ti oyic ta vul o'nton yu'une, ti tsots pasbilic ta mantal yu'une. Mu yanuc c'ot ta pasel jech c'u cha'al c'alal laj ach'aybe sc'oplal slumal ti Madiane.

⁵Ti xpujpun no'ox xchi'uc xonob ti soldadoetique, ti bonantic ta ch'ich' xchi'uc ti sc'u'ique, ta xich' chiq'uel, j'ech'el ta stsuts ta c'oc'.

⁶Yu'un c'ot xa ta pasel ti voc' xa jun querem ta jtojoltique. Laj xa yac'botic talel jun xnich'on ti Diose, c'ot ta pasel ti ac'bat yich' yabtel ta ventainvaneje. Xi s'elan sc'oplal ta x'albate: Ch'ayal ta xc'ot o'ntonal yu'un ti c'u s'elan ta snope, Dios ti mu tsalbaje, Totil sbatel osil, Banquilal jlamajesej-c'op.

⁷Ta xchoti ta spasel mantal ti bu choti ti Davide; buyuc no'ox ta xpuc batel sc'oplal ti yich'oj tsots yabtel ta ajvalilale, mu'yuc xlaj sc'oplal ti lamajem ti c'op yu'une. J'ech'el ta xc'ot ta pasel ti tsots yabtel yich'oje; ti yictac yabtel ti bu stsacoj sba lec xchi'uque, ja' ti tuc' ta xchapanvane, ti ta stic' sba ta xchapel ti bu tsots sc'oplal avi tana le'e, jech o sbatel osil. Taje, ta xc'ot ta pasel ta sventa ti mu no'ox albajuc ayanem syail xc'uxul yo'nton ti Dios ti scotol xu' yu'une.

⁸Ti Diose laj stac batel jun mantal ta stojol ti Israele, ti ja' steclumal ti Jacobe.

⁹Scotol jteclum yu'un ti Efraín ti nacalic ta yosilal ti Samariae, c'ot ta sni' ta xchiquinic ti va'i s'elan taje. Xcajetic xtoyetic xa ti xi ta xalique:

¹⁰“Lilij xa yalel ti latriyoetique, ta ton xa, ta xcac'betic xq'uexol ti ta xlic jcha'va'antique. Laj xa sbasilanic ti sicómoro ts'am-te'etique, ta ch'ut te', ta xcac'betic xq'uexol ti ta xlic jcha'va'antique.”

¹¹Ti Diose laj stac talel jcontrainvanejetic ti xi'bal sba ta j'ech'ele, ti laj yac' ye sti' stuc ti tal tsacvanicuc ta letoe.

¹²Ta stuq'uil sloq'ueb c'ac'ale, liquic talel ti tal tsacvanicuc ta leto ti sirioetique; ta stuq'uil smaleb c'ac'ale, liquic talel ti tal tsacvanicuc ta leto ti filisteoetique. Ta jbiq'uel no'ox laj stsutsesic ti Israele. Manchuc mi jech un, mu to ta x'ech' sc'ac'al yo'nton ti Diose, yu'un staoj to yav ta sibtasvan.

¹³Ja'uc ti jteclum une, mu'yuc sutic talel ta stojol Dios ti jech tsitsbilique, mi ja'uc c'ot ta yo'ntonic ta sa'el ti Dios ti scotol xu' yu'une.

¹⁴Va'i ti Dios une, jech laj spasbe ti lum Israele jech c'u cha'al ta xich' pasbel ti chon bolom ta xich' c'ocbel ti snee, mi ja' ti sjole, ti mu yanuc jech c'u cha'al ta xich' ts'etel ti te'el xane, mi ja' ti jchop o ta xan ti junco sbie. Ta jun no'ox c'ac'al, ta xc'ot ta pasel ma' ti va'i s'elan taje.

¹⁵(Sc'oplal ti sjole, ja' ta xac' ta na'el sc'oplal ti moletique xchi'uc ti banquilaletique. Sc'oplal ti snee, ja' ta xac' ta na'el sc'oplal ti jlo'lavanej j'alc'opetique.)

¹⁶Ti banquilaletique laj stam batel yan be yu'unic ti lume, ti buch'utic ta sa'ic ti jtojobtasvanej yu'unic yalojique, ch'ayesatic ta be.

¹⁷Jech o xal ti Dios une, mu'yuc yal syail xc'uxul yo'nton ta stojol ti jva'lej jch'iel jc'opojeletique, mi ja'uc xa c'uxubaj yo'nton jutebuc ta stojol ti me'un mu'natetique xchi'uc ti me'unal antsetique. Yu'un scotol ti lume bolib ti sjol yo'ntonique, chopol ti c'usi ta spasique, scotolic mu'yuc smelol ti c'usitic ta xloc' ta ye ta sti'ique. Ja' jech ec ti Diose, mu lamajemuc ti sc'ac'al yo'ntone, staoj to yav ta sibtasvan.

¹⁸Ta x'ac'van ta vocol ti c'usi chopol ta xich' pasele, ti co'ol s'elan jech c'u cha'al junuc colemal c'oc' ti xjumet no'ox ta xchic' ti chucul ch'ixtique, ti jobeltique, ti naca xchic' no'ox batel ti te'tic ta ts'i'laltique, ti sts'otet no'ox xchi'uc sutub ic'al ti ch'ail ta xmuy batele.

¹⁹Ta scapemal sjol ti Dios ti scotol xu' yu'une, laj stiles ta c'oc ti muc' ta lume, mi ja'uc xa xc'uxubaj yo'nton ti vinic xchi'uc ti svinquilele.

²⁰Ta jujun tal ta xlic yilbe sba ti svocolique, naca stsacanbe no'ox sbaic ti c'usi ta stun ta slajesique, staoj yav ta xa'iic ti vi'nale. Ta jujun tal ta sti'be sba ti xnich'onique.

²¹Ti Manasese ta stubbe sts'unubal ti Efraine; ti Efraine ta stubbe sts'unubal ti Manasese. Co'ol yo'ntonic xtoc ti xviletic no'ox batel ta scontrainel ti Judae. Jech ec ti Diose mu lamajemuc ti sc'ac'al yo'ntone, staoj to yav ta sibtasvan.