Read Tzotzil Levítico 10 Bible Online

Levítico 10 - Tzotzil bible

Levítico 10

¹Ti Nadabe xchi'uc ti Abiue, ti ja' xnich'nab ti Aarone, lic stamic jujun ti xchic'obil ac'ale. Laj stsanbeic sc'ac'al. Laj yac'beic pom ta sba ta sjovil no'ox sjolic ti c'u s'elan laj yaq'uic ti c'oc' ta stojol ti Diose, ti mu jutebuc ti jech albilique.

²Va'i un, lic tiluc talel c'oc' ta stojol ti Diose, c'aq'uesatic ta j'ech'el. Jech tey cham lajic ta stojol ti Diose.

³Ts'acal to un, ti Moisese xi laj yalbe ya'i ti Aarone: —Ti jech le' une, ja' smelol sc'an ta xal ti xi laj yal ti Diose: ‘Ti buch'u xac'touc ti lec xa xca'i ti yuni jol no'ox ta xtal snopune, ta xcac'be yil ti mu sts'ic cu'une. Ta xcac' ta ilel ti cutsil jlequil ta stojol scotol ti israeletique.’ Jech xtoc ti Aarone tey xa no'ox ts'ijil com.

⁴Laj taj une, ti Moisese laj sta ta iq'uel ti Misaele, ti Elsafane, ti ja' xnich'nab ti Uziele, sjun tot ti Aarone, ti xi laj yalbee: —La'ic li'e, loq'uesic talel ta Axibalna ti avuts' avalalique. Bat aq'uic ta sti'il xa ti bu c'alal jmacojtic ta nacleje.

⁵Tey nopajic batel, ta sc'u' no'ox stuquic laj svolic loq'uel ti buch'u chamemique. Bat yaq'uic c'alal to sti'il ti bu lamalic ta nacleje jech c'u cha'al yaloj ono'ox ti Moisese.

⁶Va'i un, ti Moisese xi laj yalbe ti Aarone xchi'uc ti xnich'nabe, ja'ic ti Eleazare xchi'uc ti Itamare: —Mu me xapasic ti xch'ebuj ajolic yu'une, ti xach'i'ic xa ta jatel ac'u'ic ta yaq'uel ta ilel ti oyoxuc ta me'unale, naca mi xachamic ec, xu' me ta sloq'ues sc'ac'al yo'nton ti Dios ta stojol ti jteclume. Ja'uc no'ox ti avinquilelique xchi'uc scotol ti israeletique, oyicuc ta vul o'nton yu'un ta scoj ti laj stiles c'oc' ta sc'ac'al yo'nton ti Diose.

⁷Mu xajip xaten comel ti Axibalna ti bu Nupel ta bee yo' jech mu xa xachamic, yu'un ti vo'oxuque, laj xa avich'ic avabtelic ta sventa ti nupob abtelal aceite yu'un ti Diose. Jech laj spasic co'ol jech c'u cha'al albatic yu'un ti Moisese.

⁸Ma'uc no'ox taje, yu'un xi ono'ox albat ti Aarón ti c'alal c'oponat talel yu'un ti Diose:

⁹“Manchuc mi vo'ot, mi ja' ti anich'nabtaque, ti c'alal ta xa'ochic batel ta Axibalna ti bu nupel ta bee, mu me xavuch'ic ti vinoe, mi ja'uc yan uch'bolal ti pasem xae, naca mi chamanic. Yu'un ja' c'ot ta jbel c'usi tsots albil ti ta x'ech' ta stojol ti totil me'ile xchi'uc ti alab nich'nabe,

¹⁰yo' ta xana'ic ti c'usitic tsots sc'oplal ti yan stunele, xchi'uc ti c'usitic jbelantic ta stunesele, ti c'usi mu soquesvane, xchi'uc ti c'usi sna' soquesvane.

¹¹Ma'uc no'ox taje, yo' jech xu' xatojobtasic ti israeletic ta scotol ti c'usitic tsots albil yu'un ti Dios ti la'ac'batic yu'un ti Moisese.”

¹²Ti Moisese xi laj yalbe ti Aarone xchi'uc ti chib xnich'nab Aarón ti come, ja' ti Eleazare xchi'uc ti Itamare: —Tamic lajesic scomelal ti matanal sat ts'unubil ti laj yich' chiq'uel ta stojol ti Diose. Ti mu'yucuc spajubtasbile, ve'anic ta sts'el ti altare, yu'un c'ot ta ch'ul matanal ta j'ech'el.

¹³Ve'anic tey ti bu tuc'ulanbil leque, yu'un ja' c'ot ta apuculalic xchi'uc ti anich'nab ti matanal ti laj yich' chiq'uel sventa yich'el ta muc' ti Diose. Ti va'i s'elan taje, yu'un ja' jech albilun talel.

¹⁴Ti xpechelul sti' yo'ntone xchi'uc ti sbec'tal yo' ti jmoj laj yich' ye'ilanel ti matanale, tsots sc'oplal tey ta xati'ic xchi'uc avalab anich'nab ti bu tuc'ulanbil leque. Yu'un taje, ja' c'ot ta apuculalic ti matanal laj yaq'uic ti israeletic ta sventa ti slajesobil o'ntonale.

¹⁵Ti sbec'tal yo'e xchi'uc ti xpech-pechul sti' yo'ntone, co'ol ta xich' ye'ilanel jelavel ta lequil matanal ta stojol ti Diose. Tey ta xtal ec ti xepu'etic ti ta xich' chiq'uele. Ti bu ta xc'ot ta avu'unic xchi'uc ti anich'nabe, ja' ti sbec'tal yo'e xchi'uc ti xpech-pechul sti' yo'ntonic jech c'u cha'al yaloj ono'ox mantal ti Diose.

¹⁶Va'i un, ti Moisese laj sjac'be sc'oplal ti jcot tot tentsun ti ta xich' svocol ta scoj ti mulile. C'u la chaval un, chic'bil xa c'ot sta. Jech o xal un, soc sjol ta stojol ti Eleazare xchi'uc ti Itamare, ti c'ajomal xa chib xnich'on ti Aarón comique, ti xi laj yalbe xtoque:

¹⁷—¿C'u cha'al mu teyuc no'ox laj ati'ic ti c'usi laj yich' svocol ta scoj mulil ti bu tuc'ulanbil leque? Yu'un ja' jun matanal ti tsots sc'oplal ta j'ech'ele ti laj yac'boxuc ti Diose yo' jech ta xatabeic ti ch'aybil ta xc'ot smul scotolic ti israeletic ta stojol ti Diose.

¹⁸Ti jech mu'yuc laj yich' ich'el ochel ta yut Axibalna ti xch'ich'ele, tey no'ox laj ati'ic jechuc ti c'usi laj yich' milel bu tuc'ulanbil leque jech c'u cha'al calojboxuc ava'iic ti mantale.

¹⁹Ti Aarone xi laj staq'ue: —A'yio ava'i, yu'un avie, ti stuquique laj xa yaq'uic ta stojol Dios ti c'usi ta xich' svocol ta scoj ti smulique, xchi'uc ti c'usitic ta xich' chiq'uele, va'i to la s'elan ta xc'ot ta jtojol ec un. Ti lajuc jti' ti c'usitic laj yich' svocol ta scoj ti mulile, ¿mi lec van ta xa'i ti Diose?

²⁰C'alal jech laj ya'i ti Moisés ti va'i s'elan taje, mu'yuc xa c'usi xal yo'nton yu'un.