Read Tzotzil Levítico 13 Bible Online

Levítico 13 - Tzotzil bible

Levítico 13

¹Ti Diose xi laj yalbe ti Moisés xchi'uc ti Aarón ti c'alal laj sc'opon talele:

²“C'alal ta xvinaj mi oy buch'u situneb ti sbec'tale, ti oy c'usi ta xt'om talele, ti oy c'usi le'bajtic ta xch'i talel ta snuculile, ti co'ol s'elan syayijemal ti c'a'emale, ac'o yiq'uic batel ta stojol ti pale Aarone. Mi mo'oje, ac'o yiq'uic batel ta stojolal junuc snitilul ti ja' paleetique.

³Jech ti palee, ac'o stuc'ulan lec ti syayijemal ti oy ta snuculile. Mi sacuneb xa stsotsil ti bu yayijeme, xchi'uc mi xch'enbujem yalel ti syayijemal ta sba ti snuculile, ta jbel sc'oplal unbi, ja' xa ti c'a'emale. Va'i un, ti laj xa yojtiquinbe lec xchamel ti buch'ue, ti palee jamal ta xal ti mu xa stac' nopele.

⁴“Mi oy buch'u oy c'usi sac le'banic ta xch'i talel ta snuculile, ti xvinaj to ti lec oye, ti mu'yuc sacuneb ti stsotsile, jech ti palee ta to smala vucub c'ac'al ti mu'yuc to ta xac' loc'uc batele.

⁵C'alal mi laj sta ti yucubal c'ac'al une, yan to velta ta sq'uel c'u s'elan. Mi staoj yav ti syayijemale, ti mu'yuc tanijem batel ta snuculile, yan to velta mu xac' loc'uc batel vucub c'ac'al.

⁶Mi sta ti yucubal c'ac'al une, yan to velta ta xcha'q'uel c'u s'elan. Mi yantic xa xch'ay batel ti syayijemale, mi mu'yuc tanijem batel ta snuculile, jech ti palee jamal ta xal ti lec xa oy ti jchamele. Yu'un ja' jun yayijemal no'ox ti ta snuculile. Ja' yu'un un, ti jchamele, ac'o xchuc' lec ti sc'u'e, j'ech'el lec ta xcom ti jchamele.

⁷“Yan ti mi yantic xa xtanij batel ti syayijemal ta snuculil c'alal laj xa ox yich' q'uelel ti jchamele, ti albat yu'un ti pale ti lec oye, ac'o ba yac' sba ta q'uelel yan velta ta stojol ti palee.

⁸C'alal mi laj sq'uel lec jchamel ti palee, ti laj yil ti yantic x'epaj batel ti syayijemal ta sjunul snuculile, ja' yu'un un, jamal ta xal ti mu xa chi'inbajuc ta scoj ti xchamele, yu'un tsacbil xa ta c'a'emal[3] ti jchamele.

⁹“C'alal oy buch'u yayijem ta c'a'emale, ac'o yiq'uic batel ta stojol ti palee.

¹⁰Jech ti palee ta stuc'ulan lec. Mi ta xvinaj ti sac lo'an ta situbel ti snuculile, ti sacuneb xa xtoc ti stsotsile, ti lec yilel ti sbec'tal ti c'alal situnebe,

¹¹yu'un ta j'ech'el taje, ja' xa sicubel c'a'emal ti staoje. Jech o xal un, ti palee jamal ta xal ti mu xa chi'inbajuc ta scoj xchamel ti buch'ue. Jeche' xa no'ox ti mu xaq'uic loc'uc batele, yu'un mu xa chi'inbajuc ta scoj ti xchamele, yu'un tsacbil xa ta c'a'emal ti jchamele.

¹²“Mi ta xvinaj ti ta anil no'ox volibat sjunul sbec'tal yu'un ti c'a'emale, ti c'ot c'alal ta yoc ta sjol ti bu xa c'alal sta ta q'uelel ti palee,

¹³va'i un, ti palee ta stuc'ulan lec. Ti jech tanijem ta sjunul ti sbec'tale, jech ti palee jamal ta xal ti lec xa oy ti jchamele, ja' ti sac mesan xa ta colel ti c'a'emale.

¹⁴Yan ti mi oy bu c'ot ta pasel junuc c'ac'al ti ta xcha'cuxi talel ti chamel ta sbec'tale, mu xa chi'inbajuc ta scoj ti xchamele.

¹⁵Va'i un, ti palee sna' xa lec ti mi chac-enan xa ta q'uelel ti c'alal ta stuc'ulan leque, ta xal ti xi'bal sba xich' cuchbel ti c'usi staoje. Yu'un ti jech chac-enan xa ta q'uelele, ja' xa jun c'a'emal.

¹⁶“Mi oy bu ta xc'ot ta pasel ti ta smats' batel ti cuxul sac lo'an to ox ta sbec'tale, jech ti jchamele, ac'o batuc ta stojol ti palee

¹⁷yo' jech ta xtuc'ulanat lec. Mi laj yil ti pale ti ta xa smats' ta colel ti xchamele, jamal ta xal ti lec xa oy ti jchamele, ja' ti lecubem xae.

¹⁸“C'alal mi oy buch'u ti col no'ox ti syayijemal tsacbile,

¹⁹ti situneb com ti bu sac luchan ti sjole, ti sac-sactic xchac-enanil ta q'uelele, ac'o bat yac' sba iluc ta stojol pale ti jchamele.

²⁰Mi ta xil ti palee ti ch'enbujem yalel ta sba ti snuculile, mi sacuneb xa ti stsotsile, va'i unbi, jamal ta xal ti mu xa stac' nopel ti buch'u taje, yu'un ti syayijemale, ja' xa tsacbil ta c'a'emal.

²¹Mi ta xil ti mu'yuc sacuneb ti stsotsil ti bu yayijeme, ti mu'yuc ch'enbujem yalel ta sba ti snuculile, ti ta xvinaj ti naca sta ta xch'ay batele, va'i un, mu x'aq'ue loc'uc batel vucub c'ac'al.

²²Yan ti mi yantic xtanij ta snuculil ti jchamele, jech ti palee jamal ta xal ti mu xa stac' nopel ti buch'u taje, yu'un ti syayijemale, ja' xa c'a'emal.

²³Yan ti mi mu'yuc yantic xcuy batele, yav xa no'ox syayijemal unbi. Jech ti palee jamal ta xal ti lecubem xae.

²⁴“C'alal mi oy buch'u c'ot ta stojol ti c'aq'uemale, ti chac-enan xa sac luchanil scuyemal ta q'uelel ti bu c'aq'ueme, mi ja' ti sac loan ta q'uelele,

²⁵jech ti pale une ta stuc'ulan lec. Mi sacuneb xa ti stsotsil ti bu ta xcuy batele, mi yantic xa xac' xch'enal ti scuyemale, ja' joybij ta c'a'emal ti sc'aq'uemale. Ja' yu'un un, ti palee ta xal ti mu xa stac' nopel ti ta scoj ti tsacbil ta c'a'emal ti buch'ue.

²⁶C'alal jech ta stuc'ulan lec ti palee ti bu cuyeme, ti ta xil ti mu'yuc sacuneb jbejuc ti stsotsile, ti mu ja'uc ta xvinaj ti yantic xac' xch'enale, ti c'ajomal no'ox ta sac ch'ay batele, jech o xal ti buch'u taje, vucub c'ac'al sjalil mu x'aq'ue loc'uc batel.

²⁷C'alal sta ti yucubal c'ac'al une, yan to velta ti palee ta stuc'ulan lec mi yantic xa xtanij batel ta sjunul ti sbec'tale. Ja' yu'un un, jamal ta xal ti mu xa stac' nopel ti buch'u taje, yu'un tsacbil xa ta c'a'emal.

²⁸Yan ti mi mu'yuc ta xtanij batel ti syayijemale, ti ja' no'ox yacal ta xch'ay batele, ti ja' no'ox situneb yu'un ti sc'aq'uemale, jech o xal ti palee jamal ta xal ti lec xa ti buch'u c'aq'ueme. Yu'un ja' xa no'ox syayijemal ti c'aq'uemale.

²⁹“C'alal mi oy jun vinic, mi jun ants ti mi staoj yayijemal ta sjole, mi ta yolon yee,

³⁰ja' yu'un un, ti palee ta stuc'ulanbe lec ti syayijemale. Mi ta xvinaj ti yantic xa xac' xch'enale, ti c'on-c'ontic xa jutuc xchac-xic'al ti stsotsile, jech ti palee jamal ta xal ti mu xa stac' nopel ta scoj ti xchamele. Ti xcaltique, yu'un oy xa salil ti sbec'tale, yu'un tsacbil xa ta c'a'emal ti sjole, mi ta yolon ti yee.

³¹Ti palee, c'alal ta stuc'ulan lec ti syayijemal ti oy salile, ti ta xil ti mu yanticuc xch'enbuje, ti mu'yuc ic' ti stsotsile, ja' yu'un un, ti buch'u taje, vucub c'ac'al sjalil mu x'aq'ue loc'uc batel.

³²Ta yucubal c'ac'al un, ti palee ta stuc'ulan ti yayijemale. Mi mu'yuc tanijem ti salile, mi mu'yuc yac'oj ti xch'enale, ti mi mu'yuc c'on xchac-xic'al ti stsotsile,

³³va'i un, ti palee ta xalbe mantal ti buch'u ip ta xa'ie, ti ac'o xch'ul ta loq'uel ti stsotsil sjole. Ja'uc ti bu oy salil ti syayijemale, mu me xch'ul une. Yan to vucub c'ac'al sjalil mu x'aq'ue loc'uc batel.

³⁴C'alal ech' ti vucub c'ac'al une, ta xcha'tuc'ulan lec ti yayijemale. Mi mu'yuc tanijem ti salile, mi mu'yuc yantic xac' ti xch'enale, jech ti palee jamal ta xal ti lec xa ti buch'u ip ta xa'ie. Va'i un, ta xchuc' lec ti sc'u'e, ja' ti lec xa oye.

³⁵Yan ti mi oy bu ta xc'ot ta pasel ti ta xtanij batel ti salil ta snuculil ti c'alal laj xa yich' alel ti lec xa oye,

³⁶va'i unbi, ti palee ta xcha'q'uel ti buch'u ip ta xa'ie. Mi tanijem xa batel sjunul sbec'tal ti salile, xi s'elan ti mu xa tsotsuc sc'oplal ta xich' q'uelel mi c'on-c'ontic sba xchac-xic'al ti stsotsile. Yu'un ti buch'u taje mu xa stac' nopel.

³⁷Yan ti mi ta xil ti mu'yuc ta xtanij batel ti salile, ti ic' xa ti stsotsil ta xpul talele, yu'un col xa ti salile. Ti buch'u taje lec xa oy. Jech ti palee jamal ta xal ti lec xa oy ti buch'u taje.

³⁸“C'alal mi oy jun vinic, mi jun ants ti oy c'usi sac le'bantic ti oy ta snuculile,

³⁹va'i unbi, ti palee ta stuc'ulanbe lec. Yan ti mi ta xil ti sac le'bantic sba yic'al ti snuculile, yu'un na'tic c'usi no'ox ta xch'i talel ta sbec'tal. Ti va'i s'elan taje, lec ono'ox oy.

⁴⁰“Mi oy jun vinic ti ta xtul loq'uel ti stsotsil sjole, ti t'anal ta xcom ta j'ech'ele, yu'un lec ono'ox.

⁴¹Mi ta xtul loq'uel ti stsotsil sjol ta sti'bae, ti t'anal ta xcome, yu'un lec ono'ox.

⁴²Yan ti mi ta xlic yayijuque, ti mi chac-enan xa stsajal ti bu t'an-t'ane, mi ta spat sjol, mi ta sti'ba, ti bu taje, c'a'emal xa ta xlic talel.

⁴³Jech ti palee ta stuc'ulan lec. Mi laj yil ti chac-enan xa stsajal ti bu t'an-t'ane jech c'u cha'al ta xlic ti c'a'emal ta snuculil ti oy ta sbec'tale,

⁴⁴va'i un, ti vinic taje, tsacbil xa ta c'a'emal, ja' ti pixil xa ta yayijemal ti sjole. Jech ti palee jamal ta xal ti ja' jun vinic ti mu xa stac' nopele.

⁴⁵“Va'i un, ti buch'u yayijem xa ta c'a'emale, jatantic xa ta slap loq'uel sc'u'. Mi ja'uc xa ta xpix ti sjole, c'ajomal juteb xa a'bal ti sat smacoj ta pixele, ti xi x'avet ta xale: ‘¡Mu jtac' nopel! ¡Mu jtac' nopel!’

⁴⁶Yu'un ti jech ip yu'un ti syayijemale, tsots sc'oplal mu stac' nopel ti vinique, xbat nacluc stuc ta sti'il ti jteclume.

⁴⁷“C'alal ta xvinaj ti oy c'usi le'bajtic ta c'u'il ti meltsanbil ta tsotse, mi ja' ti ta saquil poq'ue,

⁴⁸mi ja' ti jalbil ta saquil noe, mi ja' ti ta tsotse, mi ja' ti ta nucule, mi ja' ti c'usiuc no'ox ti meltsanbil ta nucule,

⁴⁹mi tsoj-tsojtic sba xyaxal ti c'usi le'bajtic ta sba ti c'usiuc no'oxe, ja' yu'un un, ti c'usi le'bele, c'a'emal cuxinel xa.[4] Ac'o yiq'uic batel yo' jech ta sq'uel ti palee.

⁵⁰Jech ti palee ta stuc'ulan lec ti c'usi le'bajtique. Vucub c'ac'al sjalil ta xich' chabiel ti c'usi le'bel ta sbae.

⁵¹C'alal mi sta ti yucubal c'ac'al une, ta sq'uel ti c'usi le'bele. Ti mi tanij xa batel ta c'u'ile, mi ja' ti ta jolobile, mi ja' ti c'usi meltsanbil ta nucul ti c'usi le'bele, ja' xa yesomal c'a'emal cuxinel. Jech ti c'usitic no'oxe, mu xa stac' tunesel, mi ja'uc xa picbaj.

⁵²Ja' yu'un un, mi oy xa c'usi le'bajtic ta sba jtosuc ti c'usiuc no'oxe, ac'o yich' chiq'uel ta j'ech'el, yu'un ja' xa yesomal c'a'emal cuxinel.

⁵³Yan ti mi ta sq'uel ti palee, ti ta xil ti mu'yuc tanijem batel ti c'usi le'bajtique,

⁵⁴va'i unbi, ta xal mantal ti ac'o yich' chuq'uel ti c'usi le'bajtic yatinojane, xchi'uc vucub c'ac'al sjalil ta sbaj ta q'uejel ti c'usiuc no'oxe.

⁵⁵“Mi laj xa yich' chuq'uel ti c'usi le'bajtic yatinoje, jech ti palee ta xcha'q'uel. Mi ta xil ti mu'yuc xch'ay ti c'usi le'bajtique, yu'un mu xa slequiluc. Jech ti c'usie, ac'o yich' chiq'uel yo' to mu ta xtanij batel ti c'usi le'bajtique, ja' ti c'ot xa ta soquel ti spate xchi'uc ti yute.

⁵⁶C'alal ta xich' q'uelel ti c'usi le'bajtique, ti ta xil xtoc ti pale ti ch'ay xa batel jutuc ti c'usi le'bajtic ti c'alal laj xa yich' chuq'uele, ta set loq'uel ti c'usi le'bel ta sba ti c'u'ile, ti nucule, ti c'usiuc no'ox jalbile.

⁵⁷Mi yan to velta ta xvul ta loq'uel ti c'usi le'bele, ti ta xtanij ta c'u'ile, ti c'usi jalbile, ti c'usiuc no'ox meltsanbil ta nucule, ta xich' chiq'uel ti c'usiuc no'ox ti oy c'usi le'bel ta sbae.

⁵⁸Ja'uc ti ta c'u'ile, ti jolobile, ti c'usiuc no'ox meltsanbil ta nucule, mi ch'ay o batel ti c'usi le'bel ti c'alal laj yich' chuq'uele, ac'o to yich' chuq'uel yan velta xtoc, ja' to jech ta xlecub o.”

⁵⁹Taje, ja' ti bijubtasel yu'un ti c'usi le'bajtic xcux ta xlaj vuluc ta loq'uel ta sba ti c'u'ile, ti meltsanbil ta tsotse, ti meltsanbil ta poq'ue, ti jolobile, ti c'usitic meltsanbil ta nucule, yo' jech xu' ta xich' alel mi stac' tunesel, mi mu stac' tunesel.