Read Tzotzil Levítico 14 Bible Online

Levítico 14 - Tzotzil bible

Levítico 14

¹Ti Diose xi laj yalbe ti Moisés ti c'alal laj sc'opon talele:

²“Ti li'e, xi s'elan ti bijubtasel ta sventa spoquel stusel ti buch'u ip ta xa'i ta c'a'emale: Ti jchamele, ta xich' iq'uel batel ta stojol ti palee.

³Va'i un, ta xloc' batel ta sti'il ti bu lamalic ta nacleje yo' jech ta xich' q'uelel. Mi laj yil ti pale ti colem xa syayijemal ti c'a'emal tabile,

⁴ta xalbe mantal ti ac'o ba sa' talel cha'cotuc lequil cuxul mut, jutebuc ch'ut te', tsajal poc', xchi'uc hisopo te', yo' jech ta xich' poquel tusel.

⁵Ta xal mantal xtoc ti ac'o yich' milel jcotuc ti mut ta sba junuc lumal bin ti ch'amal o vo' ti pulbil talel ta sat vo'e.

⁶Mi laj taj une, ta stsac talel ti cuxul mute, ti juteb ch'ut te'e, ti tsajal poq'ue, xchi'uc ti hisopo te'e. Ti jaytos taj une, ta xt'uxubtas o ta xch'ich'el ti chamem mute, ta sba ti vo' ti pulbil talel ta sat vo'e.

⁷Va'i un, ti ch'ich'e, vucub velta ta xich' vijbel ta sba ti buch'u ta xich' poquel tusel yu'un ti c'a'emale. Jamal ta xalbe sc'oplal ti lec xa oye. Yan ti cuxul mute, ta scolta batel.

⁸“Ti buch'u ta xich' poquel tusele, tsots sc'oplal ac'o xchuc' lec ti sc'u'e. Ac'o spoc sba lec, ac'o xch'ul sba lec yo' jech pocbil tusbil ta xc'ot. Ts'acal to un, xu' xa x'och chi'invanuc ta naclej, ac'o mi tey to no'ox ta xcom vucub c'ac'al ta pana.

⁹Ti mi sta ti yucubal c'ac'ale, ta xch'ul ta loq'uel ti stsotsil sjole. Ta xch'ul lec ta loq'uel ti yisime, ti smotsobe, xchi'uc ti yan stsotsiltaque. Ta xchuc' sc'u'. Ta spoc sba lec xtoc. Va'i unbi, pocbil tusbil ta xc'ot.

¹⁰Ta xvaxaquibal c'ac'al un, ta xich' talel cha'cotuc chij ti mu'yuc jutebuc xchopolile, xchi'uc jcotuc ch'in me' chij ti mu'yuc jutebuc xchopolil ti ja' yich'oj jun jabile. Ta xich' talel xtoc o'lol yucubal kilo lequil t'ujbil harina ti vots'bil ta aceitee, xchi'uc jch'ac ta oxch'ac ti jun litro aceitee.

¹¹Ti pale ti ja' ta sliques ti poquel tusele, ta xic' batel ti buch'u ta xich' poquel tusele, xchi'uc ti c'usitic oy yu'un ta stojol Dios ti ta ochebal sti' ti Axibalna ti bu nupel ta bee.

¹²Mi laj taj une, ta xlic yac' jcotuc ti chije, ti ta xich' svocol ta scoj ti mulil colo'ile jmoj xchi'uc ti jch'ac ta oxch'ac ti jun litro aceitee, ti sye'ilan xa ta stojol Dios sventa ti buch'u ta xich' poquel tusele.

¹³Tsots sc'oplal ti ac'o smil ti ch'iom chij ta yavil ti bu ono'ox ta xich' c'ocbel snuc' ti chon bolometic ti ta xich' svocol ta scoj ti mulil colo'ile, xchi'uc ti ta xich' chiq'uele. Ti c'usi ta xich' svocol ta scoj ti colo'ile, xchi'uc ti c'usi ta xich' svocol ta scoj ti mulile, ja' xa c'ot ta spuculal ti palee, ja' ti c'ot ta ch'ul matanal ta j'ech'ele.

¹⁴“Ts'acal to un, ti palee ta stsacbe jutebuc xch'ich'el ti c'usi laj yich' svocol ta scoj ti colo'ile. Ta xjaxbe ti buch'u ta xich' poquel tusele, ta yolon svelvelul ti sbats'i chiquine, ta sme' ti sbats'i c'obe, ta sme' ti sbats'i acane.

¹⁵Mi laj taj une, ta stsac ti aceitee, ta sq'ueb ta yut xpach'omal sts'et c'ob.

¹⁶Va'i xtoc un, ta sts'aj ta aceite ti sni' sbats'i c'ob ti oy ta xpach'omal sts'et c'obe. Ti ta sni' sc'ob taje, vucub velta ta xch'itulta batel ti aceite ta stojol ti Diose.

¹⁷Ti c'u yepal com scomelal ti aceite ta sc'ob ti palee, ta xcha'laman ta jaxbel ti buch'u ta xich' poquel tusele, ti bu laj yich' jaxbel ti ch'ich' ta yolon svelvelul ti sbats'i chiquine, ta sni' ti sbats'i c'obe, ta sni' ti sbats'i acane, ti laj yich' svocol yu'un ti mulil colo'ile.

¹⁸Ja'uc ti c'u yepal com scomelal ti aceitee, ta xjaxbe ta sjol ti buch'u ta xich' poquel tusele. Jech ti pale une ta stabe talel ti ch'aybil ta xc'ot smul ta stojol ti Dios ti buch'u taje.

¹⁹Mi laj taj une, jech ti pale une ta xlic yac' ti c'usi ta xich' svocol ta scoj ti mulile, ti ja' jech ta xich' poquel tusel ti buch'u tsacbil ta c'a'emale. Mi laj taj une, ta smil ti chon bolom ti ta xich' chiq'uele.

²⁰Ta xich' aq'uel ta sba altar jmoj xchi'uc ti matanal sat ts'unubale. Ti jech taj une, ti palee ta stabe talel ti ch'aybil ta xc'ot smul ti buch'ue. Ja' jech pocbil tusbil ta xc'ot.

²¹“Mi toj me'un ti buch'u ip to ox ta xa'ie, ti mu cha'bel ta sta ti jech yepal taje, xu' ta xich' talel jcotuc tot chij ti ta xich' svocol ta scoj ti colo'ile. Ja' jtunel matanal ta xac' yo' jech ta xich' tael ti ch'aybil ta xc'ot ti smule. Ta xich' talel xtoc ti x'ech' jutuc ta chib kilo lec t'ujbil harina ti vots'bil ta aceitee, ti ta xc'ot ta matanal sat ts'unubile, xchi'uc jch'ac ta oxch'ac ti ta jun litro aceitee.

²²Ma'uc no'ox taje, ta xich' talel cha'cot tórtola, mi mo'oje, cha'cot ch'iom paloma, ja' ti c'u s'elan xu' yu'une. Ti june, ja' ta xich' svocol ta scoj ti mulile. Ja'uc ti june, ta xich' aq'uel ta chiq'uel.

²³Ta xvaxaquibal c'ac'al un, ta xich' batel ta stojol ti pale scotol taje, ti ja' ta xc'ot ta sventa spoquel stusel ti ta xac' ta stojol ti Dios ta ochebal sti' ti Axibalna ti bu nupel ta bee.

²⁴Va'i un, ti palee ta stsac ti chij ti ta xich' svocol ta scoj ti colo'ile, xchi'uc ti jch'ac ta oxch'ac ti ta jun litro aceitee. Ta xac' ta stojol ti Dios ti ta xc'ot ta ch'ul matanale.

²⁵Ta sc'ocbe snuc' ti chij ti ta xich' svocol ta scoj ti colo'ile. Ta stsacbe jutebuc xch'ich'el ti chije. Ta xjaxbe ti buch'u ta xich' poquel tusele, ta yolon svelvelul ti sbats'i chiquine, ta sme' sni' ti sbats'i c'obe, ta sme' sni' ti sbats'i acane.

²⁶Ts'acal to un, ta scocan jutebuc aceite ta spul-pulil xpach'omal sts'et c'ob.

²⁷Va'i un, ta sni' ti sbats'i c'obe, ti aceite ti ch'amal ta jun sc'obe, vucub velta ta svij batel ta stojol ti Diose.

²⁸Ja' jech xtoc ta xjaxbe jutebuc aceite ti buch'u ta xich' poquel tusele, ta yolon svelvelul ti sbats'i chiquine, ta sme' sni' ti sbats'i c'obe, ta sme' sni' ti sbats'i acane, ti bu ono'ox oy laj yich' jaxbel xch'ich'el ti c'usi laj yich' svocol ta scoj ti colo'ile.

²⁹Jech ti palee ta xjaxbe scomelal ti aceite ta sjol ti buch'u ta xich' poquel tusele yo' jech ta stabe talel ti ch'aybil ta xc'ot ta stojol Dios ti smule.

³⁰Ts'acal to un, ti palee ta xac' jcotuc ti tórtolae, mi ja' jcotuc ti ch'iom palomae, ja' ti c'u yepal xu' yu'un ta yaq'uel ti buch'u ta xich' poquel tusele.

³¹Ti jcot mute, ta xich' svocol ta scoj ti mulile. Ti jcote, ta xich' chiq'uel xchi'uc ti matanal sat ts'unubile. Jech ti palee ta stabe talel ti ch'aybil ta xc'ot smul ta stojol Dios ti buch'u ta xich' poquel tusele.”

³²Taje, ja' bijubtasel yu'un ti buch'u ip ta xa'i yu'un ti syayijemal ti c'a'emale, ti buch'u mu xa cha'bel tabaj ta xa'i ti ta xac' ti epal matanal ta sventa ti buch'u ta xich' poquel tusele.

³³Ti Diose xi laj yalbe ti Moisese xchi'uc ti Aarón ti c'alal laj sc'opon talele:

³⁴“C'alal mi oyoxuc xa ta banomil Canaán ti ta xcac' avu'ninique, mi oy bu ta xac' cuxinuc junuc anaic ti ta ateclumalique,

³⁵va'i un, ti yajval nae, xi ac'o yalbe ti pale ti c'alal ta xbat sc'opone: ‘Ti xaval yilele, ta xcuxin ya'i ti jnae.’

³⁶“Jech ti palee, ti c'alal mu to ta x'och batel ta nae, ta xal mantal ti ac'o yich' ch'ubaele yo' jech mu soc scotol ti c'usi oy ta yute. Ts'acal to un, ta x'och batel ta sq'uelel ti c'usi ta soquesvane.

³⁷“Ti c'alal jech ta stuc'ulan lec ti c'usi ta soquesvane, ti ta xil ti pale ti natic xa le'bajtic ochel ta pac'obal na ti c'usi ta soquesvane, ti yoxic xa stsajal le'bajtic ti stic'oj xa sba ochel ta spac'obalile,

³⁸va'i un, ta xloc' batel ti ta nae. Ta xal mantal ti ac'o yich' maquel vucubuc c'ac'ale.

³⁹Ta yucubal c'ac'al un, xbat stuc'ulan lec yan velta ti palee. Mi ta xil ti tanij xa batel ta spac'obalil na ti c'usi le'bajtique,

⁴⁰ta xal mantal ti ac'o sloq'uesic ti tonetic ti oy c'usi le'bajtic teye, ti ac'o ba sjipic ta ch'ayob c'a'eptic ta loq'uebaltic xa ta sti'il ti jteclume.

⁴¹Ta xal mantal xtoc ti ac'o yich' juxel lec loq'uel sbejel ti yut nae. Ti spucuquil ti c'u yepal ti laj yich' juxel loq'uele, ac'o ba sjipic ta yav c'a'eptic ta loq'uebal xa ti sti'il ti jteclume.

⁴²Ti ton ti bu laj yich' jipel loq'uele, ta xich' tic'bel yan xq'uexol xchi'uc yan ach' ach'el yo' jech ta xich' paq'uel ti nae.

⁴³“Mi yan to velta ta xvul ta loq'uel ti oy c'usi le'bajtic ti ta na ti c'alal laj xa ox yich' loq'uesel ti tone, xchi'uc ti c'alal laj xa ox yich' juxel lec ti spac'obalile, xchi'uc ti laj xa ox yich' paq'uel ta ach' ti yach'elale,

⁴⁴va'i ec un, ti palee ta x'och batel yan velta ta stuc'ulanel. Mi ta xil ti tanij xa batel ta na ti c'usi le'bajtique, ja' xa jun xcux ti pucuj ta j'ech'ele, ti mu xa stac' nainel ti nae.

⁴⁵Ja' yu'un un, tsots sc'oplal ac'o yich' lomesel ta j'ech'el ti nae. Scotol ti slilijemale, ac'o ba yich' jipel ta ch'ayob c'a'eptic ta loq'ueltic xa ta sti'il ti jteclume.

⁴⁶Buch'uuc no'ox ti ta x'och batel ti ta na ti c'alal yaloj mantal stuc ti pale ti c'u sjalil bajluque, ta smalil to c'ac'al ta xlaj yip ti staoj svocol ta soquesel sba xchi'uque.

⁴⁷Buch'uuc no'ox, mi ta xve'e, mi ta xvay ta na taje, tsots sc'oplal ac'o xchuc' lec ti sc'u'e yo' jech mu teyuc no'ox xcuchoj ti xchopolile.

⁴⁸“Ti c'alal ta x'och batel ta sq'uelel ti na ti palee, mi ta xil ti mu'yuc tanijem batel ti c'usi le'bajtic ti c'alal laj yich' paq'uel ta ach'e, jamal ta xal ti lec xa ti nae, ti tub xa sc'oplal ti c'usi le'bajtique.

⁴⁹Yo' jech ta xich' poquel tusel ti nae, ta xich' tsaquel talel cha'cotuc mut, jutebuc ch'ut te', tsajal poc', xchi'uc hisopo te'.

⁵⁰Ta smil jcotuc ti mut ta sba jun lumal bin ti oy ya'lel ti ja' pulbil talel ta sat vo'e.

⁵¹Mi laj taj une, ta stsac ti juteb ch'ut te'e, ti hisopoe, ti tsajal poq'ue, ti cuxul mute. Ta xt'uxubtas ta xch'ich'el mut ti laj yich' svocol ta milele, xchi'uc ta vo' ti pulbil talel ta sat vo'e. Vucub velta ta svij ti ta nae.

⁵²Ja' jech ta xich' poquel tusel ti na ta sventa xch'ich'el ti mute, xchi'uc ti vo' ti pulbil talel ta sat vo'e, xchi'uc ti mut ti cuxul toe, ti juteb ch'ut te'e, xchi'uc ti tsajal poq'ue.

⁵³Ts'acal to un, ta scolta batel ti cuxul mut ta loq'uebaltic ta sti'il ti jteclume. Ja' jech sc'an ti c'u s'elan ta xich' poquel tusel ti nae.”

⁵⁴Taje, ja' bijubtasel yu'un ti c'usiuc no'ox le'bajtique, ti oy stan pucanile, ti oy salile,

⁵⁵ti c'usi le'bajtic ta xcuxin ta c'u'ile, ti c'usi le'bajtic ta nae,

⁵⁶ti c'usi ta situbuque, ti ta xt'om talele, ti le'bajtique.

⁵⁷Ja' bijubtasel yo' jech ta xtojob ta st'unel ta sq'uelel ti c'usi leque xchi'uc ti c'usi chopole. Li' c'ot ta tsutsel bijubtasel yu'un ta sventa ti c'usi le'bajtic ti ja' sc'oplal ti c'a'emale.