Read Tzotzil Levítico 16 Bible Online

Levítico 16 - Tzotzil bible

Levítico 16

¹Ti Diose laj sc'opon ti Moisese ti c'alal chamemic xa ox xchibal xnich'nab ti Aarone, ta scoj ti toj ech'em nopajic batel ta stojol ti Diose.

²Va'i xtoc un, ti Diose xi laj yalbe ti Moisese: “Albo ya'i ti achi'il ta voq'uel Aarone ti mu me c'uc no'ox ora ta x'och batel ta Bats'i Cuxul Ch'ul Cuarto ti oy ta spat ti muc' ta poq'ue, mi ja'uc ta sts'el smac sti' ti caxae yo' jech mu xchamic, yu'un ta xcac' jba iluc ta toc ti ta sba smaque.

³Yu'un ti c'alal mu to ta x'och batel ti Aarón ta Axibalnae, tsots sc'oplal ac'o yich' batel jcot tot ch'iom vacax ti ta xich' svocol ta scoj ti mulile, xchi'uc jcot tot chij ti ta xac' ta sventa ti ta xich' chiq'uele.

⁴Tsots sc'oplal ac'o slap ti tunco saquil c'u'il sventa abtelale, ti com-com saquil vexile, ti chuquile, xchi'uc ti saquil ts'ot jolile. Taje, ja' ti ch'ul c'u'il sventa abtelale. Ja' yu'un un, ti c'alal mu to ta slape, tsots sc'oplal ac'o spoc sba ta vo'.

⁵“Ti c'u yepal ti israeletique ta xac'beic cha'cotuc tot tentsun ti Aarone, ti ta xich' svocol ta scoj ti mulile, xchi'uc jcot tot chij ti ta xich' chiq'uele.

⁶Va'i un, ti Aarone ta xlic yac' ti ch'iom tot vacax ti ta xich' svocol ta scoj ti smul stuque yo' jech ta sta ti ch'aybil ta xc'ot ti smul stuque, xchi'uc ti c'u yepal oyic ta na yu'une.

⁷Ts'acal to un, ta stsac talel ti cha'cot tentsune. Ta xac' ta stojol Dios ta ochebal sti' Axibalna ti bu nupel ta bee.

⁸Mi laj taj une, xi s'elan ta xlic sq'uelbe yorail ti cha'cot tentsune: Jun ta xc'ot ta yu'un ti Diose. Jun ta xc'ot ta yu'un ti Azazele.[5]

⁹Ti c'usi jcotucal ti tentsun ti c'ot ta yu'un ti Diose, jech ti Aarone ta xac'be yich' svocol ta scoj ti mulile.

¹⁰Ja'uc ti jcot tentsun ti ja' smacoj c'ot ti xbat ta yu'un ti Azazele, cuxul ta xac' jelavel ta stojol ti Diose yo' jech ta sta ti ch'aybil ta xc'ot ti mulile. Mi laj taj une, cuxul ta scolta batel ta sbajtical banomil ti bu oy ti Azazele.

¹¹“Jech ti Aarone ta xlic yac' ti ch'iom tot vacax ti ta xich' svocol yu'un ti smul stuque yo' jech ta sta ti ch'aybil ta xc'ot ti smul stuque, xchi'uc ti c'u yepal oy ta snae.

¹²Mi laj taj une, ta stsac jun yav ac'al ti nojesbil ta ac'al ti laj yich' tamel ta altar ti oy ta stojol ti Diose, xchi'uc cha'jopuc juch'bil muil pom. Ta xich' batel ta spat ti bu lich'il ti muc' ta poq'ue.

¹³Ta xlic yac' ti pom ta sba ti ac'al ta stojol ti Diose. Ti xch'ailal ti pome xtoquet no'ox ta smac sjunul sba ti bu oy smac sti' xcaxail ti tratee. Ti va'i s'elan taj une, ja' jech mu xcham ti Aarone.

¹⁴Ta stsac jutebuc xch'ich'el ti ch'iom tot vacaxe. Ti ta sni' sc'obe, ta svij batel ta sba smac ti caxa ti oy ta stuq'uil sloq'ueb c'ac'ale. Mi laj taj une, vucub velta ta sni' sc'ob ta xch'itulta batel ti ch'ich' ta yeloval smac sti' ti caxae.

¹⁵Mi laj taj xtoc une, ta smil ti tentsun ti ta xich' svocol ta scoj smulic ti jteclume. Ta xich'be ochel xch'ich'el ta spat ti bu lich'il ti muc' ta poq'ue. Ti ta yut une, ta svij ta sba ta yeloval smac sti' ti caxae jech c'u cha'al laj spas xchi'uc xch'ich'el ti ch'iom tot vacaxe.

¹⁶Ti jech ta spas taj une, ja' jech ta spoc ta stus loq'uel ta Bats'i Cuxul Ch'ul Cuarto scotol xchopolalic, stoyobbailic, smulic ti israeletique. Ja' jech ta spas xtoc ta Axibalna ti bu nupel ta be ti oy ta o'lol yu'unique, ta scoj ti soquem ta xchopolalique.

¹⁷“Ti c'alal oy ta yut Bats'i Cuxul Ch'ul Cuarto ti Aarón yo' jech ta sta talel ti ch'aybil ta xc'ot ti mulile, mu'yuc buch'u xu' junuc ti oy ta Axibalna ti c'alal mu'yuc to ta xloc' talele. Yan ti mi laj xa sta talel ti ch'aybil c'ot ti smul stuque, xchi'uc ti c'u yepal oy ta snae, xchi'uc scotol ti c'u yepal oy ti israeletique,

¹⁸va'i unbi, ta xloc' talel yo' jech ta stus ta poquel ti altar ti oy ta stojol ti Diose. Ta stsac jutebuc xch'ich'el ti ch'iom vacaxe xchi'uc ti tentsune. Ta xjax ta xulubtac ta sjoylej ti altare.

¹⁹Vucub velta ta xch'itulta ta sni' sc'ob ta ch'ich' ta sba ti altare. Ja' jech ta xich' poquel tusel loq'uel yu'un xchopolalic ti israeletique. Ja' jech ta xc'ot ta jtunel yu'un Dios ti altare.

²⁰“C'alal mi tsuts xa yu'un Aarón ta stusel spoquel ti Bats'i Cuxul Ch'ul Cuartoe, xchi'uc ti Axibalna ti bu nupel ta bee, xchi'uc ti altare, ta stac ta iq'uel ti tentsun ti cuxul to ti ja' yu'un ti Azazele.

²¹Va'i un, ta scajan sc'ob ta sjol ti tentsune. Jamal ta xal ti ac'o yich'be batel scotol ti xchopolalique, ti stoyobbailique, xchi'uc smulic ti israeletique. Ti jech taj une, ta scajanbeic batel ti mulil ta sjol ti tentsune. Oy buch'u ta x'abolaj ta yiq'uel batel yo' jech ta scolta comel ta sbajtical banomil.

²²Ja' yu'un un, ti c'alal jech ta xch'ay batel ta sbajtical banomil ti tentsune, xcuchojbe batel scotol ti xchopolalic ta sts'ijlajan banomile.

²³Mi laj taj une, ti Aarone ta x'och batel ta Axibalna ti bu nupel ta bee. Ta sloc' ti saquil c'u'il ti slapoj ochel ti c'alal och batel ta Bats'i Cuxul Ch'ul Cuartoe, tey ta xicta comel.

²⁴Ti bu ono'ox oy ti ta Bats'i Cuxul Ch'ul Cuartoe, ta spoc sba ta vo'. Mi laj taj une, ta xlic slap ti sc'u'e. Ta xloc' talel un yo' jech ta xchic' ti c'usi ta xac' ta sventa ti stuque, xchi'uc ti c'usi tsots sc'oplal ta xaq'uic ta chiq'uel ti jteclume. Ja' to jech ta stabe talel ti ch'aybil ta xc'ot ti smul stuque xchi'uc smul ti jteclume.

²⁵Ti xepu'al ti c'usi laj yich' svocol ta scoj ti mulile, ta xchic' ta altar.

²⁶Ti buch'u laj yic' batel ta scoltael comel ti tentsun ta sventa Azazele, ta xchuc' ti sc'u'e, xchi'uc ta spoc sba ta vo'. Ts'acal to xtoc un, xu' xa x'och batel ti bu lamalic ta nacleje.

²⁷“Ti ch'iom tot vacaxe xchi'uc ti tentsun ti laj yich' svocolic ta scoj ti mulile, ti laj yich' ich'bel batel xch'ich'el xtoc ta Bats'i Cuxul Ch'ul Cuarto yo' jech ta xich' tael ti ch'aybil ta xc'ot yu'un ti muliletique, ta xich' ich'el batel ta loq'uebaltic sti' jteclum. Ja'uc ti sbec'tale, ti snuculile, xchi'uc ti c'usitic tenbil ta xbate, ta xich' chiq'uel.

²⁸Jech ti buch'u ta xchiq'ue, tsots sc'oplal ac'o xchuc' sc'u', ac'o spoc sba ta vo'. Ts'acal to xtoc un, xu' x'och batel ti bu lamalic ta nacleje.

²⁹“Ti jbel ti c'usi tsots sc'oplal albile, xi s'elan com o ta atojolique: Ti ta slajunebal sc'ac'alil yu'un ti yucubal ue, tsots sc'oplal ta xavicta ti avotique, ti ta xaquechan ti avabtelique. Jech ac'o spasic ti israeletique xchi'uc ti jyanlumetic ti nacal ta atojolique.

³⁰Yu'un ti jech c'ac'al taje, ja' o ta xataic ti ch'aybil ta xc'ot ti amulic ti laj ataic ta sba ta sat ti Diose. Pocbil tusbil ta xac'otic yu'un scotol ti amulique.

³¹Yu'un ja' jbel ti c'usi tsots albil ti xi s'elan com o ta atojolique: Yu'un ti jech c'ac'al taje, ja' jun muc' ta c'ac'al avu'unic ti ta xacuxiique, ti ta xavicta avotic ta sventae.

³²Jech ti pale ti buch'u c'ot ta t'ujele, ti ja' ac'bat yich' yabtel ti ta xich'be comel yabtel ti stote, ja' xa ta xabtelan ta spasel ti c'u s'elan ta tael talel ti ch'aybil ta xc'ot ti mulile. Ta slap ti saquil c'u'il sventa ti paleale,

³³yo' jech ta xlic yabtelan spoquel stusel ti Bats'i Cuxul Ch'ul Cuartoe, xchi'uc ti Axibalna ti bu nupel ta bee, ti altare, xchi'uc ta stabe talel ti ch'aybil ta xc'ot smul ti paleetique, xchi'uc smul scotol ti israeletique.

³⁴“Ti jbel ti c'usi tsots albil taje, xi s'elan com o ta atojolique: Jun velta ta jujun jabil, ta xapasic ti c'u s'elan comem sc'oplal ti ta xataic ti ch'aybil ta xc'ot smulic ti israeletic ti bu jelavique.” Ja' jech laj yich' pasel jech c'u cha'al albat mantal ti Moisés yu'un ti Diose.