Read Tzotzil Levítico 2 Bible Online

Levítico 2 - Tzotzil bible

Levítico 2

¹“C'alal oy buch'u ta xich' talel ta smoton Dios ti ja' sat ts'unubile, ac'o yich' talel ti harina ti bu lec t'ujbile. Ac'o yac'be aceite xchi'uc pom ta sba.

²Ts'acal to un, ac'o yich' talel ta stojol xnich'nab ti Aarón ti ja' paleetique. Ac'o stsac jopuc harina xchi'uc aceite junuc yu'unic jmoj xchi'uc ti pome. Ac'o xchic' ta sba ti altare, ti ja' jun matanal ti bejel ta o'ntonale, ti ta xc'ot ti jun yutsil smuil ti matanal ta xich' ac'bel ti Diose.

³Scomelal smoton ti Diose, ti ja' c'ot ta yu'un Dios ti laj yich' chiq'uel ta sventa yich'el ta muc' ti Diose, ja' xa ta xich' ti Aarón xchi'uc ti xnich'nabe.

⁴“C'alal ta xavac' ta matanal sat ts'unubil ti ta'ajesbil ta hornoe, pasbiluc me avu'un ta muc'tic pan ti lequil t'ujbil harina ti vots'bil ta aceitee, ti mu'yucuc yich'oj ti spajubtasobile, mi ja' ti jayaquil harina bacubtasbile, ti mu'yucuc yich'oj ti spajubtasobile, ti c'ajomaluc no'ox vijbil ti aceite ta sbae.

⁵“Mi ja' sat ts'unubil ti matanal ta xavac' ti ja' bacubtasbil ta xalteme, tsots sc'oplal ja' ta xavac' ti lequil t'ujbil harinae, ti vots'biluc ta aceitee, ti mu'yucuc yich'oj ti spajubtasobile.

⁶Va'i un, ta xabic'tal xet'olan, xchi'uc xtoc vijbo aceite, yu'un ja' jun matanal ti sat ts'unubiletique.

⁷“Mi ta xavac' ta matanal ti sat ts'unubile, ti ja' ta'ajesbil ta lech-lech taq'uine, tsots sc'oplal ti ja'uc me pasbiluc ta lequil harina xchi'uc aceitee.

⁸Mi laj xa achapan ti matanal ti va'i s'elan ta xich' taje, ich'o batel ta stojol ti Diose, ti ta xavac'be ta yoc ta sc'ob ti palee. Ti stuc eque ta xich' batel c'alal to altar.

⁹Ti bu taje, ti palee ta stsac juteb ti matanale yo' jech ta xchic' ta sba ti altare, ti ja' jun chic'bil matanal ti bejel ta xc'ot ta o'ntonale, ti jun yutsil smuil ta xich' ac'bel ti Diose.

¹⁰Scomelal ti matanale, ti ja' c'ot ta yu'un Dios ti ta xich' chiq'uel ta sventa yich'el ta muc' ti Diose, ja' xa ta xich' ti Aarón xchi'uc ti xnich'nabe.

¹¹“Mu xavac'beic spajubtasobil mi junuc matanal ti ja' sat ts'unubil ti ta xavac'beic ti Diose. Ti yan xtoque, j'ech'eluc mi ja'uc c'usi jtosuc spajubtasobil, mi ja'uc ajapom xu' ta xich' chiq'uel ti ta xich' aq'uel ta sventa smoton ti Diose.

¹²Pisil une, xu' xavaq'uic ta smoton Dios ti yich'oj ti spajubtasobile, ti ajapome jech c'u cha'al sc'oplal ti sba sat ts'unubile, ja' no'ox un, mu spas ta xich' chiq'uel ta sba ti altar ti jun yutsil smuile.

¹³“Scotol matanal ti ja' sat ts'unubile, tsots sc'oplal ac'bo yats'mil. Ma'ucuc me ti asat no'ox aq'ueloj ti mu'yuc yats'mil ti sat ts'unubil ta xavac' ta stojol Dios ti c'alal ja' svinajeb sc'oplal ti tratee.[1] Scotol ti matanaletic avu'une, tsots sc'oplal ti oyuc yats'mile.

¹⁴“Mi ja' ta xavac' ta matanal ta stojol Dios ti sba sat ats'unube, ta sc'an ti staoj xa lec syijil ti sjole, ti bacubtasbil ta c'oq'ue, ti ja' jun sba sat ach' ts'unubil ti chevbil ta voch'ele.

¹⁵“Ta sba ti matanale, ac'bo aceite xchi'uc pom, yu'un ja' jun matanal ti sat ts'unubil no'oxe.

¹⁶Ja' yu'un un, ti palee ta xchic' jutebuc ti matanal sat ts'unubil ti chevbile xchi'uc ti aceitee jmoj scotol xchi'uc ti pome. Taje, ja' jun chic'bil matanal sventa svulesobil ta o'ntonal ta yich'el ta muc' ti Diose.