Read Tzotzil Levítico 20 Bible Online

Levítico 20 - Tzotzil bible

Levítico 20

¹Ti Diose xi laj yalbe ya'i ti Moisés ti c'alal laj sc'opon talele:

²“Xi xcholet xavalbe ya'i ti israeletic jech c'u cha'al li'e: “Buch'uuc no'ox, israeletic, mi jyanlumetic ti capalic ta naclej xchi'uc ti israeletic ti ta xac' ta stojol dios Moloc ti xnich'nabique, tsots sc'oplal ac'o yich'ic milel ta ton yu'un ti xchi'iltac ti nacalic ta lume.

³Ta jcontrain ti vinic taje. Ta jten loq'uel ti jech oy ta jteclum ta scoj ti ta soquesbun ti Axibalnae, xchi'uc ti ta soquesbun ti jc'oplal ti c'alal ta xac' junuc xnich'on ta stojol ti dios Moloque.

⁴Mi sat no'ox sq'uelic ti jteclum ti va'i s'elan ta spas taje, ti mu xaq'uic ta milel ti vinic taje,

⁵vu'un ta xlic jcontrain xchi'uc ti c'u yepal oy ta snae. Ta jten loq'uel ti jech oy ta jteclum jmoj xchi'uc scotol ti buch'utic yan sjol yo'ntonic ta jtojol ti ta sbic'tajesel sbaic ta sts'ac-patiel ti dios Moloque.

⁶Mi oy buch'u ta sjac' sba ta stojol ti lajebal ch'ulelale, ti jt'unvanejetic ti yan sjol yo'nton ta jtojol ti jech ta sts'acliique, ta jcontrain ti buch'u jech ta spas taje. Ta jten loq'uel ti jech oy ta slumale.

⁷“Ta j'ech'eluc, ac'o abaic ta tunel ta jtojol. Oyuc ach'ulelic ta j'ech'el. Yu'un vu'un ti Ajvalil Diosun avu'unique.

⁸Chanic ta spasel ti oy c'usi jbel tsots albil sc'oplale. C'otuc ta pasel avu'unic. Yu'un vu'un Ajvalilun ti laj jt'ujoxuque yo' jech ta xatunic cu'un.

⁹“Buch'uuc no'ox ta sbis ta cotol chaval ti stote, mi ja' ti sme'e, oy sc'oplal ti ac'o yich' milele. Yu'un ti jech laj sbis ta cotol chaval ti stote, mi ja' ti sme'e, scoj stuc ti jech ta xchame.

¹⁰“Mi oy buch'u ta xmulivaj xchi'uc ti yajnil xchi'ile, ta xich' milel ti jmulivajel vinique xchi'uc ti jmulivajel antse.

¹¹“Mi oy buch'u ta sluts'be ta vayel yajnil ti stote, ta scus ta yic'obal ti stote. Ja' yu'un un, ta xich' milel ti vinique xchi'uc ti antse. Ja' scoj stuquic ti jech ta xchamique.

¹²“Mi oy buch'u ta sluts' ta vayel ti yalibe, ta xich'ic milel ti xchibalique. Ja' ta scoj stuquic ti jech ta xchamique. Yu'un ti jech taje, ja' jsoquesvanej.

¹³“Mi oy buch'u ta sluts' sbaic ta vayel ti co'ol sba viniquetic ti co'ol xa s'elan ants ta sluts' ta vayel ta xa'ie, ac'o yich'ic milel ti xchibalique. Ja' ta scoj stuquic ti jech ta xchamique. Yu'un ti jech taje, toj jsoquesvanej ta j'ech'el.

¹⁴“Mi oy buch'u ta xic'be xchi'uc sme' ti ants yic'oje, toj ech'em chopol ti jech ta spasique. Ti jech mu'yuc stuq'uil ti c'usi ta spasique, ti stuque xchi'uc xchibal ti antsetique, cuxul, ac'o yich'ic chiq'uel ta c'oc'. Yu'un ja' to jech mu x'epaj ti c'usi chopol ta xc'ot ta atojolique.

¹⁵“Mi oy buch'u ta sta ta chi'inel junuc chon bolom, jbel sc'oplal ta xich' milel. Ja' jech xtoc, ac'o yich' milel ti chon bolome.

¹⁶“Mi oy jun ants ti ta sta ta chi'inel junuc chon bolome, jech ti antse xchi'uc ti chon bolome, ta xich'ic milel. Ti jech ta xchamique, ja' ta scoj stuquic.

¹⁷“Mi oy buch'u ta xlic yajnilin ti xchi'il ta voq'uele, mi ja' ta sventa ti stote, mi ja' ta sventa ti sme'e, ti jech ta sta sbaic ta chi'inele, ta sba ta sat ti steclumale, xchibalic ta xich'ic milel. Yu'un ti jech ta sta sbaic ta chi'inel xchi'uc ti xchi'il ta voq'uele, q'uexlal sba ta j'ech'el. Yu'un ti buch'u jech ta spase, cajal ta xc'ot ta sba ti mulil colo'ile.

¹⁸“Mi oy buch'u ta sta ta chi'inel jun ants ti c'alal yorail ta xil ti xchamele, ti laj yilbe ti xq'uexlalil ti jech laj xchi'ine, xchibalic, ac'o yich'ic jipel loq'uel yu'un ti steclumale, yu'un sna'ic lec ti laj soques sbaique.

¹⁹“Mu xata ta chi'inel ti xchi'il ta voq'uel ti ame'e, mi ja'uc ti xchi'il ta voq'uel ti atote, yu'un avuts' avalal abaic. Mi oy bu c'ot ta pasel une, xchibalic une, cajal ta xc'ot ta sba ti c'usi chopol ta spasique.

²⁰“Mi oy buch'u ta sluts' ta vayel ti yajnil sjuntote, ta scus ta yic'obal ti sjuntote. Ta scoj ti cajal ta xc'ot ta sba ti smulique, xi s'elan ta xc'ot ta stojolique: mu'yuc yalab xnich'nab xcham xlajic.

²¹“Mi oy buch'u ta spojbe yajnil ti xchi'il ta voq'uele, ta scus ta yic'obal ti xchi'il ta voq'uele. Ti va'i s'elan taje, toj chopol ta j'ech'el. Ch'abal yalab xnich'nabic xcham xlajic ti xchibalique.

²²“Chanic ta spasel ti oy c'usi jbel tsots albil sc'oplale, xchi'uc ti c'usi nopbil cu'une. C'otuc ta pasel avu'unic scotol. Ti mi jech ta xapasique, mu xajipoxuc loq'uel ti lum ti bu ta xquic'oxuc batel ta nacleje.

²³Mu ja'uc xachanbeic ta spasel ti c'u s'elan ta spasic ti jnaclejetic ti ta xavilic ta aba ta asatic ti ta jip loq'uele. Yu'un ti stuquique, mu lecuc scotol ti c'usi laj spasique. Mu ts'icbaj xca'i yu'un.

²⁴Ta xcac' que jti' ti vo'oxuc ta xac'otic ta yajval ti slumalique. Yu'un ta jva'an jba jtuc ti ta xcac'boxuc ti jteclum taje, ti bu co'ol s'elan vo' ta xbein ti chu' vacaxe, ti ajapome. “Yu'un vu'un ti Ajvalil Diosun avu'unique, ti ch'acbiloxuc cu'un xchi'uc ti yan lumetique.

²⁵Ja' yu'un ti vo'oxuc xtoc une, tsots sc'oplal xatojobic ta yojtiquinel ti bu lequiquil chon bolometique xchi'uc ti bu ma'uc ti bu lequiquil chon bolometique, ti lequiquil mutetique xchi'uc ti ma'uc lequiquil mutetique. Mu xasoques abaic ta scoj ti chon bolometique, ti mutetique, xchi'uc ti chon ti xquilet ta xanav ti laj calboxuc sc'oplal ti ma'uc lequiquil chon bolometique.

²⁶Oyuc alequilalic avutsilalic ta jtojol. Yu'un vu'un ti Ajvalilune, Ch'ul Diosun, ch'acbiloxuc cu'un xchi'uc ti yan lume yo' jech ta xac'otic ta cu'un.

²⁷“Mi oy jun vinic, mi jun ants ti uninbil yu'un ti yan snopbenale, mi ja' ti ta xchanic ti t'unvaneje, ta xich'ic milel ta ton. Ja' ta scoj stuquic ti jech ta xchamique.”