Read Tzotzil Levítico 21 Bible Online

Levítico 21 - Tzotzil bible

Levítico 21

¹Ti Diose xi laj yalbe ti Moisese: “C'oponano ti paleetic snitilultac ti Aarone, albo ya'iic ti mu soques sbaic ta spiquel ti animaetic ta sventa ti yuts' yalaltaque.

²Ja' no'ox mi ja' jun yuts' yalal jech c'u cha'al ti sme'e, ti stote, ti squerem nich'one, ti yantsil nich'one, ti xchi'il ta voq'uele,

³ti jun xchi'il ta voq'uel ti tojol tseb to ti xchi'inoj to ta naclej ti mu'yuc to malijeme, mu'yuc c'usi ta alel ma' taje.

⁴Yan ti mi ja' jun yuts' yalal ti ic'bil xae, mu me soques sbaic ta spiquel.

⁵“Ta jbel sc'oplal mi ja'uc xu' ta xch'ul ta loq'uel ti stsotsil sjole. Mi ja'uc ta xch'ul ta loq'uel ti yisime. Mi ja'uc ta sjot'es sba ta syayijesel ti sbec'tale.

⁶Yu'un c'ajomal jbeluc sc'oplal ti xchapanoj sba ta sventa ti Dios yu'unique, ti mu soquesbeic ti sc'oplale. Yu'un ti stuquique, ja' jelubtasej matanaletic ti ta xich' chiq'uele, xchi'uc ti pan ti ta xaq'uic ta stojol ti Dios yu'unique. Ja' yu'un un, ja' yabtelic ti tsots sc'oplal ac'o yac' sbaic ta tunele.

⁷“Ja' jech xtoc mu stac' ta xiq'uic jun ants ti ta sbolomalin sbae, mi ja'uc jun ants ti staoj ilbajinele, mi ja'uc jun ti bajbilal antse. Yu'un t'ujbilic ti ta xac' sbaic ta tunel ta stojol ti Dios yu'unique.

⁸J'ech'el ch'acalicuc o avu'un ta stojol scotol. Yu'un ti stuquique ja' ta sva'an sbaic ta yaq'uel ti pan ta stojol ti Dios avu'une, ti oyuc yutsilal slequilal ta atojole. Yu'un ti vu'une, Ajvalilun, Ch'ul Diosun, vu'un ta xcac' c'otuc ta ch'ul jtunel.

⁹“Mi ta xbat ta yoc ta soques sba yantsil nich'on ti palee, ti ta sbolomalin sba yo' ta xac' sbae, ta scus ta yic'obal ti stote. Tsots sc'oplal ti cuxul ac'o yich' chiq'uele.

¹⁰“Ti banquilal pale yu'un ti paleetic ti laj yich' tsots yabtel ta slapel ti ch'ul c'u'ile, ta sventa ti malbat ti jtunel aceite ta sjole, ja' yu'un un, mu me ja'uc spas ti tey xa no'ox yabinoj xq'uiet ti sjole, mi ja'uc ti xac' ta ilel ta xch'i' ta jatel ti sc'u' ta scoj ti vul o'ntone.

¹¹Tsots sc'oplal ti mu ta xbat ta yoc ta soquesbe sc'oplal ti Axibalna yu'un ti Diose, xchi'uc ti ta soques sba ti ta xloc' batel ta Axibalnae yo' jech ta x'och batel ti bu tuts'ul ti junuc animae, mi ja'uc ta sna ti stote, mi ja'uc ta sna ti sme'e. Yu'un laj yich' malbel ti jtunel aceite yu'un Dios ta sjole. Yu'un vu'un ti Ajvalilune.

¹³“Ta sventa ti yajnile, ac'o sa' junuc tojol tseb.

¹⁴Ta jbel sc'oplal mi ja'uc xic' junuc me'unal ants, mi ja'uc junuc bajbilal ants, mi ja'uc junuc ants ti ilbajinbil xae, mi ja'uc junuc ants ti ta sbolomalin sbae. Yu'un ti yajnile, tsots sc'oplal ti ja'uc junuc ti tojol tsebe, ti ja'uc me jun snitilul sba xchi'uque.

¹⁵Jech ta sc'an ta spas taje yo' jech mu xbat ta yoc ta soquesbel sc'oplal snitilultac ta stojol ti svinquileltaque. C'otem xa ta jtunel cu'un ti vu'un Ajvalilune.”

¹⁶Ti Diose xi laj yalbe ti Moisés ti c'alal laj sc'opon talele:

¹⁷“Albo ya'i ti Aarone, li' ta xlic batel avi tanae, ti mi ma'uc lec ts'acal vinic junuc ti snitilultaque, mu xu' ta sva'an sba ta yaq'uel ti matanal pan ta stojol ti Dios yu'une.

¹⁸Ti jamal lec ta alele, xi s'elan ma' ti mu junuc xu' ta sva'an sba ta spasel ti c'alal jech s'elan oye: ti buch'u ma'sate, ti coxove, ti mu'yuc ts'acal ta q'uelel ti sni'e, mi ja' ti xchiquine,

¹⁹ti c'asem ti yoque, mi ja' ti sc'obe,

²⁰ti vuj-vuj spate, ti t'en-t'en vinique, ti oy xchamel sate, ti tsacbil ta ch'ininule, ti oy c'usi ch'iemic ta snuculile, mi ja' ti soquem ti yichone.

²¹Ti snitilultac ti pale Aarone, mi ja'uc junuc xu' ta xac' ta stojol Dios ti matanal ti ta xich' chiq'uel ti mi oy c'usi soquem yu'une. Ja' yu'un un, mu xu' ta xac' ti matanal pan ta stojol ti Dios yu'une.

²²Ti buch'u taje, xu' ta sve' ti pan taje, ti c'usi ch'acbile, xchi'uc ti c'usi ts'uiltasbil ta j'ech'ele.

²³Ja' no'ox un, mu xu' ta x'och batel ta spat ti bu lich'il ti muc' ta poq'ue, mi ja'uc ti ta xnopaj ta sts'el ti altare yo' jech mu spec'tsanbe sc'oplal ti Axibalna cu'un ta scoj ti ma'uc ts'acal vinique. Yu'un vu'un ti Ajvalilune, ti jech t'ujbil c'otic cu'une.”

²⁴Ti jech taj une, xchapet lic yalilan ti Moisés ta stojol ti Aarone, ta stojol ti xnich'nabe, xchi'uc ta stojol scotol ti israeletique.