Read Tzotzil Levítico 22 Bible Online

Levítico 22 - Tzotzil bible

Levítico 22

¹Ti Diose xi laj yalbe ti Moisés ti c'alal laj sc'opon talele:

²“Albo ya'i ti Aarone xchi'uc ti snitilultaque, sc'an bijicuc xchi'uc ti c'usi ta xch'aquic loq'uel ti ta xac'beicun ti israeletique yo' jech mu soquesbeicun ti jc'oplale. Yu'un vu'un ti Ajvalilune.

³“Albo ya'i ti li' ta xlic batel ti buch'uuc no'ox junucal snitilultac ti soquesoj sba xchi'uc jtosuc ti albil sc'oplal ti mu staq'ue, mu xu' ta sva'an sba ta yaq'uel ti c'usitic ta xaq'uic ta stojol Dios ti israeletique. Tenbil ta xloc' ta jtojol. Yu'un vu'un ti Ajvalilune.

⁴“Mi junuc snitilultac ti Aarón mi ip ta xa'i ta c'a'emale, mi snuptanoj vocol ti xmalmun ti c'usi xjelav ta yichone, mi ja'uc xu' ta sve' ti c'usi c'otem ta yu'un ti Diose ja' to ti mi laj yich' poquel tusele. “Ti buch'u ta spic ti c'usi ta soquesvan ta scoj ti chamem xae, mi ta spic jun vinic ti oy svocol yu'un ti c'usi xjelav yu'une,

⁵mi ta soques sba xchi'uc ti laj spic jun chon ti xquilet ta xanave, mi ja' laj sta ta piquel jun vinic ti ja' xcuchoj ti sbolile, ja' xcuchojbe ta xc'ot ti sbolil eque, ta scoj ti laj sta ta piquel ti c'alal ja' o oy ti sbolile.

⁶Va'i un, c'otuc ta o'ntonal ti ta smalil to c'ac'al ta xlaj ti sbolile. Mu xu' ta slajes ti c'usitic ts'uiltasbil ti mi mu ba'yeluc ta spoc sba ta vo'e.

⁷Yu'un ja' to pocbil tusbil ta xc'ot mi ch'ay xa batel ti c'ac'ale. Mi laj taj une, xu' xa ta slajes stunes ti c'usitic ts'uiltasbile, yu'un ja' yipanoj.

⁸Mu xu' ta sti'be sbec'tal jun chamem chon bolom, mi ja' ti lilinbil ta ti'el yu'un jun te'tical jti'oval chone yo' jech mu soques sba xchi'uc. Yu'un vu'un ti Ajvalilune.

⁹“Albo ya'iic ti c'otuc ta pasel yu'unic ti jc'optaque, ti mu jutebuc cajaluc ta xcom ta sba ti smulic ti mu xc'ot ta pasel yu'unique. Ti jech taj une, mu xchamic. Yu'un vu'un Ajvalilune ti laj jt'ujic loq'uel yo' ta xac' sba ta jtunele.

¹⁰“Mu xu' sve'ic ti c'usi ts'uiltasbil ti mi ma'uc yich'oj yabtel ta paleale. “Mi ja'uc yulo'tac ti palee, mi ja'uc ti yaj'abteltaque ti xu' ta sve'ic ti c'usi ts'uiltasbile.

¹¹“Mi ta sman ta taq'uin jun smosov ti palee, ti mosovile xu' ta stun ta slajes ti c'usi ts'uiltasbile. Ja' jech xtoc ti buch'utic voq'uemic ta sna ti palee xu' ta stun ta slajesic ti ve'liletic yu'une.

¹²“Mi ic'bil yu'un jun vinic yantsil nich'on ti palee ti ma'uc yich'oj yabtel ta paleale, mu xu' ta stun ta slajes ti matanaletic ti ta x'ac'bat ti paleetique.

¹³Yan ti mi ja' me'unal ants xae, mi sutesbil ants, ti ch'abal ti yalab xtoque, ti sut batel ta sna ti stot co'ol jech c'u cha'al ti c'alal tojol tseb to oxe, xu' ta slajes sve'eltac ti stote. Ja'uc ti yane mu xu' ta stun ta slajes ti mi ma'uc ti buch'u yich'oj yabtel ta paleale.

¹⁴“Mi oy buch'u mu yaleluc laj spas ti laj slajes ti c'usi ts'uiltasbile, tsots sc'oplal ta xq'uextabe sutel ti pale ti c'u yepal laj stun laj slajese, xchi'uc ta to xac' jbus ta vo'ch'ac.

¹⁵Ti paleetique ma'uc yabtelic ti tey no'ox sq'uelojic ta soquesel ti israeletic c'usi ts'uiltasbil ta xich' ac'bel ti Diose.

¹⁶Mi ja'uc ta scoj smulic ti cajal ta xcom ta sbaic ti xchopolalic ta stunel slajesel ti c'usi ts'uiltasbile. Ti vu'un Ajvalilune laj xa jt'ujic loq'uel yo' ta xac' sba ta jtunel.”

¹⁷Ti Diose xi laj yalbe ti Moisés ti c'alal laj sc'opon talele:

¹⁸“Xi xcholet xavalbe ya'i ti c'alal xac'opon ti Aarone, ti xnich'nabe, xchi'uc scotol ti israeletic jech c'u cha'al li'e: Mi oy jlomuc ti israeletique, mi ja' ti jyanlumetic ti nacal ta atojolique, ti ta xac' jcotuc chon bolom ti ta xac' ta chiq'uel ta stojol ti Diose, mi ja' ti yaloj ta xaq'ue, mi ja' jun matanal ti loc' ayan ta yo'ntone,

¹⁹tsots sc'oplal ta xac' yuni tot ti chon bolom ti mu'yuc jutebuc xchopolile yo' jech tsacbil ich'bil ta xc'ot. Xu' ta xac' jcotuc tot vacax, mi jcotuc tot chij, mi ja' jcotuc tot tentsun.

²⁰Yan mi ja' jcot chon bolom ti oy xchopolile, mu'yuc tsacbil ich'bil ta xc'ot yu'un.

²¹“Buch'uuc no'ox ti oy c'usi ta xac'be yich' ti Diose, mi ja' junuc ti ta xich' svocol ta sventa ti lajesobil o'ntonale, mi ja' ta sventa ti oy c'usi yaloj ta xaq'ue, mi matanal ti loc' ayan ta yo'ntone, ac'o yac' jcotuc tot vacax. Mi mo'oje, ac'o yac' jcotuc tot chij ti mu'yuc jutebuc ti xchopolile yo' jech tsacbil ich'bil ta xc'ot.

²²Mu ja'uc xavac'beic ti Ajvalil Dios ti chon bolom ti tubem ti sate, ti yayijeme, ti yuni coxovile, ti sal-saltique, ti oy xchinale, mi ja'uc xavaq'uic ti ta xich' chiq'uel ta altar ta sventa smoton ti Diose.

²³Yan mi ja' ti matanal ta xich' aq'uel ta sventa ti loq'uem ayanem ta o'ntonale, xu' jcotuc tot vacax, mi jcotuc tot chij, ac'o mi mu co'oluc snatiquil ti yacane. Yan mi ja' sventail ti oy c'usi albil sc'oplal ti ta xich' aq'uele, mu'yuc tsacbil ta xc'ot.

²⁴Ja' jech xtoc mu xu' xavac'beic ti Ajvalil Dios ti chon bolometic ti yayijem ti sbec' yate, ti majbile, ti setbil loq'uele, ti pitsbil loq'uele. Mu stac' xachanic ti jech ta xapasic ta alumalique.

²⁵Ja' jech xtoc mu xu' xach'ambeic ta yich'bel jech s'elan chon bolometic yu'unic ti jyanlumetic ti ta xich' ac'bel ti Dios avu'unic ti xu' ta xtun ta ve'lile. Yu'un ja' jun chon bolom ti oy xchopolile, mi ja'uc tsacbil ta xc'ot.”

²⁶Ti Diose xi laj yalbe ti Moisés ti c'alal laj sc'opon talele:

²⁷“C'alal ta xvoc' jcotuc ch'in tot vacaxe, mi jcotuc nene' tot chije, mi jcotuc nene' tot tentsune, ac'o comuc xchi'uc sme' vucub c'ac'al sjalil. Mi sta ti xvaxaquibal c'ac'al une, xu' xa xloc' ta o'ntonal ta xich' chiq'uel yo' ta xc'ot ta sventa smoton ti Diose.

²⁸“Mu me xamil ta jun no'ox c'ac'al xchi'uc yolic ti me' vacaxe, mi ja' ti me' chije.

²⁹“C'alal ta xavac' jun matanal sventa ti coliyal ti Diose, ja' me xapas ti lecuc tsacbil ich'bil ta muc' ta xc'ote.

³⁰Ma'uc no'ox taje, yu'un sc'an, ti'an no'ox ta jun c'ac'al. Mi ja'uc xavicta scomelal ta yan c'ac'al. Yu'un vu'un ti Ajvalilune.

³¹“Chanic ta spasel ti jmantaltaque, ti c'otuc ta pasel avu'unique. Yu'un vu'un ti Ajvalilune.

³²“Mu xasoquesbeicun ti jch'ul c'oplale, staojuc yav ta stojol ti israeletique. Yu'un vu'un Ajvalilun ti laj jbisoxuc ta cu'une.

³³Ma'uc no'ox taje, yu'un laj jloq'uesoxuc talel ta Egipto yo' jech ta xic'ot ta Dios avu'unic. Yu'un vu'un ti Ajvalilun avu'unique.”