Read Tzotzil Levítico 23 Bible Online

Levítico 23 - Tzotzil bible

Levítico 23

¹Ti Diose xi laj yalbe ti Moisés ti c'alal laj sc'opon talele:

²“Xi xcholet xavalbe ya'i ti israeletic jech c'u cha'al li'e: Ti tsots sc'oplal yorailtac ti ta xich' pasel ta sventa ti Diose, ja' jech s'elan ti ta xavac'be sbiin ch'ul tsobleje:

³“Vaquib c'ac'al sjalil ti stac' xa'abtejique. Ja'uc ti ta yucubal c'ac'ale, mi ja'uc xa stac' xa'abtejic mi jset'uc. Yu'un ja' jun c'ac'al ti tsots sc'oplal cuxob o'ntonal ta j'ech'ele. Ta xc'ot ta ch'ul tsoblej avu'unic. Ti buyuc no'ox ta xanaquie, ti jech c'ac'al taje, ja' cuxob o'ntonal ta sventa yich'el ta muc' ti Diose.

⁴“Xi s'elan yorailtac ti tsots sc'oplal ta xapasic ti ch'ul tsoblej ta sventa yich'el ta muc' ti Diose, ti tsots sc'oplal ti xi s'elan ta xatsob abaique:

⁵“Ta smalil c'ac'al ta xchanlajunebal sc'ac'alil ti sliqueb ue, ta xich' pasel sna'obil ti q'uin Colel sventa yich'el ta muc' ti Diose.

⁶“Ta yo'lajunebal sc'ac'alil ti ja' ono'ox yuale, ta xich' pasel sq'uinal ti pan ti mu'yuc ac'bil ti spajubtasobile ti ja' yich'el ta muc' ti Diose. Yu'un vucub c'ac'al sjalil, mu'yuc ta xich' ve'el ti pan ti ac'bil ti spajubtasobile.

⁷Ti ta sliqueb sba c'ac'ale, ta xich' pasel jun ch'ul tsoblej. Mi ja'uc jtosuc abtel ta xapasic.

⁸Vucub c'ac'al sjalil, sc'an ti ta xachiq'uic matanal ta stojol ti Diose. Ja'uc ti ta yucubal c'ac'al une, ta xapasic jun ch'ul tsoblej. Tsots sc'oplal mi ja'uc stac' xa'abtejic jutebuc.”

⁹Ti Diose xi laj yalbe ti Moisés ti c'alal laj sc'opon talele:

¹⁰“Xi xcholet xavalbe ya'i ti israeletic jech c'u cha'al li'e: C'alal mi la'ochic ta banomil ti bu ta xcac'boxuque, mi laj xa atsobbeic ti sat atrigoique, tsots sc'oplal ta xavich'ic batel ta stojol pale ti sba jchuc ti ats'unubique.

¹¹Ta yan c'ac'al un, ti ja' xa sc'ac'alil ti cuxob o'ntonale, ti palee ta xich' batel ta stojol Dios ti jun jtunel matanal taje yo' jech ich'bil ta muc' ta xac'otic yu'un ti Diose.

¹²Ti sc'ac'alil ti ta xich' aq'uel ti jchuc ts'unubile, ja' o ta xac' xtoc jcot chij ti yich'oj jun jabile, ti mu'yuc xchopolile, ti ta xich' chiq'uel sventa yich'el ta muc' ti Diose.

¹³Ma'uc no'ox taje, yu'un ta xavich'ic talel o'lol yo'obal kilo ti lequil t'ujbil harina ti vots'bil xchi'uc ti aceitee yo' jech ta xich' ac'bel ti Diose, ti ja' jun chic'bil matanal ti jun yutsil ti smuile. Ta sventa ti malbil matanale, tsots sc'oplal ac'o yich' aq'uel junuc litro vino.

¹⁴Ti c'u sjalil ti sc'ac'alil ti ta xavich'beic batel smoton ti Diose, mu me xave'ic ti pane, ti bacubtasbil trigoe, mi ja'uc ti yox toe. Taje, ta xc'ot ta jbel ti c'usi tsots albil ti na'bil ta xcom ti ta x'ech' ta stojol ti totil me'iletique, xchi'uc ti alab nich'nabiletic ti buyuc no'ox nacaloxuque.

¹⁵“Ti bu lic sc'ac'alil ti ja' o laj avich'ic batel ti jchuc atrigoic ti jtunel matanal c'ote, ti xcaltique, ta yoc'omal ti bu lic ti sc'ac'alil cuxob o'ntonale, ts'acaluc lec vucub xemuna chapic batel.

¹⁶Ti sacubel osil yu'un ti yucubal c'ac'ale, ti ja' xa sc'ac'alil ti cuxob o'ntonale, ta xc'ot ta ts'aquiel ti lajuneb yoxvinic (50) c'ac'ale. Va'i un, ta xavaq'uic ta matanal ta stojol Dios ti ach' sat trigoe.

¹⁷Ma'uc no'ox taje, ti ta anaique, ich'ic batel cha'bejuc pan ti yich'oj nopol chanibuc kilo ti jujubej ti pasbil ta lequil harina ti yich'oj spajubtasobil ti ta'ajesbile, ti ja' jtunel matanal sba sat ts'unubil ti ta xich' aq'uel ta stojol ti Diose.

¹⁸Ti panetic taje, jmoj ta xich' aq'uel batel xchi'uc vuc-cot ch'iom tot chij ti mu'yuc jutebuc ti xchopolile, ti ja' to no'ox yich'oj jun jabile, xchi'uc jcot ch'iom tot vacax, xchi'uc cha'cot tot chij, ti ta xich' chiq'uel ta sventa yich'el ta muc' ti Diose, xchi'uc ti matanal sat ts'unubil xtoque, xchi'uc ti vinoe. Taje, ja' jun chic'bil matanal ti jun yutsil smuil ta xich' ac'bele.

¹⁹“Ta xaq'uic xtoc jcot tot tentsun ti ta xich' svocol ta scoj ti mulile, xchi'uc cha'cot ch'iom tot chij ti yich'oj jun jabil ti ta xich' svocol ta sventa ti lajesobil o'ntonale.

²⁰Va'i un, ti palee ta xac' jelavel ti chon bolometic ti ta xc'ot ta jtunel matanaletic ta stojol ti Diose, jmoj xchi'uc ti pan ti ja' sba sat ts'unubile, xchi'uc ti cha'cot chije, ti ja' bevbil ta yu'untac Dios yo' ta xich' ti palee.

²¹“Ti jech c'ac'al taj une, tsots sc'oplal ta xapasic jun ch'ul tsoblej. Mi jtosuc abtel stac' xapasic. Taje, ja' jun mantal ti na'bil ta xcom ti ta x'ech' ta stojol ti totil me'ile, xchi'uc ti alab nich'nab ti buyuc no'ox nacaloxuque.

²²“C'alal ta xc'ot yorail ta stsobel ti ts'unubile, mu me xabejel-tsob ta j'ech'el ti oy ta avosile. Mi ja'uc xabejel-c'uxc'ulta ta j'ech'el ti bu come. Ch'an uto, ac'o comuc ta sventa ti me'unetique xchi'uc ti jyanlumetique. Yu'un vu'un ti Ajvalil Diosun avu'unique.”

²³Ti Diose xi laj yalbe ti Moisés ti c'alal laj sc'opon talele:

²⁴“Xi xcholet xavalbe ya'i ti israeletic jech c'u cha'al li'e: Ti sba c'ac'al yu'un ti yucubal ue, ta xapasic jun q'uin sventa cuxob o'ntonal, xchi'uc ch'ul tsoblej sventa svulesel ta o'ntonal ti c'alal xtutet no'ox ta xich' oq'uisanel ti oq'uese.

²⁵Va'i un, tsots sc'oplal ta xachiq'uic junuc matanal sventa yich'el ta muc' ti Diose. Mi jtosuc abtel xapasic.”

²⁶Ti Diose xi laj yalbe ti Moisés ti c'alal laj sc'opon talele:

²⁷“Ta slajunebal c'ac'al yu'un ti yucubal ue, ja' sc'ac'alil ti ch'aybil ta xc'ot ti mulile. Tsots sc'oplal ta xapasic jun ch'ul tsoblej, xchi'uc ta xavicta avotic ti jech c'ac'al taje, xchi'uc ta xachiq'uic ti matanal sventa yich'el ta muc' ti Diose.

²⁸Ti jech c'ac'al taje, mu stac' xapasic jtosuc abtel, yu'un ja' o sc'ac'alil ti ch'aybil ta xc'ot ti mulile, ti ta xataic ti ch'aybil ta xc'ot amulic yu'un ti Ajvalil Dios avu'unique.

²⁹Ti buch'u mu xicta yot ti jech c'ac'al taje, buch'uuc no'ox, tenbil ta xloc' ta stojol ti slumale.

³⁰Ti buch'u ta x'abtej ti jech c'ac'al taje, buch'uuc no'ox, ta xc'ot ta pasel cu'un ti ta xch'ay sc'oplal ta slumale.

³¹“Mi jtosuc abtel ta xapasic. Taje, yu'un ta xc'ot ta jbel c'usi tsots albil ti na'bil ta xcom ta stojolic ti totil me'iletique, xchi'uc ti alab nich'nabiletic ti buyuc no'ox nacaloxuque.

³²Yu'un ja' jun sc'ac'alil cuxob o'ntonal avu'unic, ti ta xavicta avotic yu'une. Ta xlic achapic batel ta yatel ta smalil c'ac'al yu'un ti sbalunebal ue, c'alal to ta smalil c'ac'al ta yoc'omal.”

³³Ti Diose xi laj yalbe ti Moisés ti c'alal laj sc'opon talele:

³⁴“Xi xcholet xavalbe ya'i ti israeletic jech c'u cha'al li'e: Ti ta yo'lajunebal (15) c'ac'al ti ja' ono'ox ti yucubal (7) ue, vucub c'ac'al sjalil ta xapasic sq'uinal ta sventa ti Axibal Yanal Te' Na sventa yich'el ta muc' ti Diose.

³⁵Va'i un, ti sliqueb c'ac'ale, ta xapasic jun ch'ul tsoblej. Mi ja'uc jtosuc abtel ta xapasic.

³⁶Ti vucub c'ac'al sjalil taje, ta xachiq'uic matanal sventa yich'el ta muc' ti Diose. Ja'uc ti ta xvaxaquibal c'ac'ale, ta xapasic jun ch'ul tsoblej xchi'uc ta xachiq'uic jun matanal ta stojol ti Diose. Ti c'ac'al taje, ja' jun q'uin. Mi jtosuc abtel stac' xapasic.

³⁷“Yu'un ti jech c'ac'aletic taje, ja' jun c'ac'al ti tsots sc'oplaltac c'otem ta sventa ti Diose, ti jamal ta xavalic ti ja' jun ch'ul tsobleje. Ta xavich'ic talel ta stojol Dios ti chic'bil matanaletique, ti c'usitic yan chic'bil ta xich'e, ti chic'bil matanal sat ts'unubile, ti c'usi ta xich' svocole, xchi'uc ti matanal vinoe, ja' ti c'u s'elan ta xc'ot ti sc'ac'alil jujutose.

³⁸Ja' me yan o xtoc ti c'usitic ta xich' aq'uel ta sventa sc'ac'alil ti cuxob o'ntonal ta yich'el ta muc' ti Diose, ti c'usi ta xich' q'uelanele, ti matanal ti albil sc'oplal ta xich aq'uele, ti xloc' ayan ta o'ntonale, ja' ti c'u s'elan ta xavaq'uique.

³⁹“Ti ta yo'lajunebal (15) sc'ac'alil ti yucubal (7) ue, ti c'alal laj xa ox atsobic ti ats'unubique, ta xapasic yan vucub c'ac'al q'uin sventa yich'el ta muc' ti Diose, ti ta xacux avo'ntonic ti sliquebal sba c'ac'ale, xchi'uc ti c'alal ta sta ti xvaxaquibal c'ac'ale.

⁴⁰Ti sliquebal sba c'ac'ale, ta xavich'ic talel ti lequiquil sat te'e, ti yanal xane, xchi'uc ti te'etic ti limajtic sc'ob ta xaq'ue, ti álomo te' ti ta xch'i ta ti' uc'ume. Yu'un vucub c'ac'al sjalil ta xamuyubajic ta stojol ti Ajvalil ti ja' Dios avu'unique.

⁴¹Ti yucubal u ti ta x'ech' ti jujun jabile, ta xapasic jun q'uin ti vucub c'ac'al sjalil ta sventa yich'el ta muc' ti Diose. Taje, ta xc'ot ta jbel ti c'usi tsots albil ti na'bil ta xcom ta stojol ti totil me'iletique xchi'uc ti alab nich'nabiletique.

⁴²Ti jech sjalil ti vucub c'ac'al taje, acotolic ti bats'i israel lavoq'uique, ta xanaquiic ta yolon ti axibal yanal te' nae,

⁴³yo' jech ta sna'ic scotol ti anitilulique ti lanaquiic cu'un ta yolon axibal yanal te' na ti c'alal laj jloq'uesoxuc talel ta Egiptoe. Yu'un vu'un ti Ajvalil Diosun avu'unique.”

⁴⁴Ti jech taje, ja' jech xcholet laj yal ti Moisés ta stojol ti israeletic ti bu tsots sc'oplal ti c'ac'aletic ti sc'an pasel ta stojol ti Diose.