Read Tzotzil Levítico 27 Bible Online

Levítico 27 - Tzotzil bible

Levítico 27

¹Ti Diose xi laj yalbe ti Moisés ti c'alal laj sc'opon talele:

²“Xi xcholet xavalbe ya'i ti israeletic jech c'u cha'al li'e: C'alal mi oy buch'u ta sman loq'uel ti c'usi loc' ayan ta yo'nton ti laj yac'be ti Diose, tsots sc'oplal ta stoj ti c'u yepal ta xtojolin o ti c'otem ta yu'un ti Diose:

³Mi ja' jun vinic ti yich'oj jtob (20) jabile, mi c'alal to oxvinic (60) jabile, ta xac'anbe stojol lajuneb yoxvinic (50) ta sep plata taq'uin, ja' ti c'u s'elan liquem yu'unic ti ta ch'ulnae.

⁴Yan ti mi ja' sc'oplal jun antse, ta xac'anbe stojol lajuneb xcha'vinic (30) ta sep plata taq'uin.

⁵Ja'uc ti buch'u yich'oj vo'ob (5) jabile, c'alal to jtob (20) jabile, ta xac'anbe stojol jtob (20) ta sep plata taq'uin, ja' lajunsep (10) plata taq'uin ta xac'anbe stojol mi ja' jun antse.

⁶Yan mi ja' ololetic ti yich'ojic jun ue, c'alal to mi vo'ob (5) jabile, ja' vo'sep (5) plata taq'uin ta xac'anbe ti stojole, ja' oxsep (3) plata taq'uin ta xac'anbe stojol ti mi ja' tsebe.

⁷Yan ti buch'u x'ech' xa ta oxvinic (60) jabil yich'oje, vo'lajunsep (15) plata taq'uin ta xac'anbe stojol ti mi ja' vinique. Ja' lajunsep (10) plata taq'uin ti mi ja' jun antse.

⁸Yan ti mi ja' jun me'un mu'nat ta j'ech'el ti mu xtoj yu'un ti c'u yepal albil sc'oplale, taje, ja' ta xcom ta sventa ti palee yo' jech xu' ta xnopbat ta ach' ti c'u yepal xtoj yu'un ti yaloje.

⁹“Sc'oplal ti chon bolometic ti xu' ta xich' ac'bel ti Diose, ja' ta xc'ot o ta yu'un ta j'ech'el scotol ti chon bolometic ti laj xa yich' ac'bele.

¹⁰Va'i un, mi ja'uc xa stac' jelel xchi'uc ta jcot xa yan xchon sbolom, ac'o mi xjelav to yutsil, mi mu sta. Mi oy bu ta xc'ot ta pasel ti ta xich' jelel ta jcot xa chon bolome, jech ti sjelole xchi'uc ti albil xa sc'oplal ta xich' aq'uele, ta xc'ot xa ta yu'untac ti Diose.

¹¹“Yan ti mi ja' jun chon bolom ti ma'uc sventa ta xich' aq'uel ta stojol ti Diose, ta xich' iq'uel batel ta stojol ti palee

¹²yo' jech xu' ta snop c'u yepal ti stojol ta xich'e, xchi'uc ti c'u s'elan yutsil ti chon bolome. Ti c'u s'elan c'ot ta nopel yu'un ti pale ti stojole, ja' jech ich'bil ta muc' ta xc'ot.

¹³Yan ti mi mu to xloc' ta yo'nton ti ta xac' ti xchon sbolome, tsots sc'oplal ta xac' comel jch'ac ta vo'ch'ac ti c'u yepal albil sc'oplal ti ta xich' tojele.

¹⁴“Mi oy buch'u ta xac' ta tunel yu'un Dios ti snae, ti c'u s'elan ti nae, xchi'uc ti c'u s'elan ti yutsile, ja' ta snop ti pale ti c'u yepal ta xtojolin oe. Ti c'u s'elan loc' ta chapel yu'un ti palee, ich'bil ta muc' ta xc'ot.

¹⁵Yan ti mi oy bu ta xc'ot ta pasel ti ta xich' ya'i sutel sna ti buch'u laj yac' ta tunel yu'un ti Diose, tsots sc'oplal ta xac' comel jch'ac ta vo'ch'ac ti c'u yepal laj yich' nopel stojol ti nae. Ta xcom ta yu'un ti nae.

¹⁶“Mi oy buch'u ta xac' ta stunesel yu'un Dios o'lol jsepuc ti yosile, ti stojol ti banomile, ja' ta xich' t'unel ta nopel ti c'u yepal xloc' ayan yu'un ti banomile, ti xtoj o yu'un lajuneb yoxvinic (50) ta sep plata taq'uin ta jujun buluchvinic (220) ta almul ti jchop o ta trigoe.

¹⁷Mi ja' o ta xich' aq'uel ta tunesel ti banomil ti ja' xa sjabilal ti pojel colele, mi ja'uc ta stsul jutebuc ti c'u s'elan albil ono'ox ti stojole.

¹⁸Yan mi ta xac' ta tunesel c'alal mi ech' xa ox sjabilal ti pojel colele, ti palee ta xchap ti c'u yepal ti stojol ta xich' aq'uele, ti ta stsules yalel stojol ti c'u to sjalil sc'an xc'ot sjabilal ti pojel colele.

¹⁹“Mi ta sc'an ta xcha'ich' ya'i sutel ti buch'u laj yac' ta tunesel ti sbanomile, tsots sc'oplal ta xac' comel jch'ac ta vo'ch'ac ti c'u yepal ti stojol albile. Ta xc'ot ta yu'un ti banomile.

²⁰Yan ti mi mu'yuc laj xcha'c'an sutele, va'i un, ti banomile, ti mi ta xich' chonel ta yane, mu'yuc xa c'usi xut ta xcha'ich' sutel.

²¹Mi mu'yuc yajval ti banomil ti c'alal ta xc'ot sjabilal ti pojel colele, ta xc'ot o xa ta yosil sbanomil ti Diose yo' jech ta xtun yu'un. Ta xc'ot ta yu'un ti palee.

²²“Mi oy buch'u ta xac' ta tunesel yu'un Dios ti smanbil banomile, ti ma'uc xrexto ti yuts' yalaltaque,

²³va'i un, ti palee ta st'un ta nopel stojol c'alal mi c'ot sjabilal ti pojel colele. Jech ti buch'u taje, ja' o sc'ac'alil ta stoj ti c'u yepal albil stojol ti banomile. Va'i un, ti stojole, ta xac'be stunes ti Diose.

²⁴C'alal ta xc'ot sjabilal ti pojel colele, ta xcha'ich' sutel ti buch'u laj yac' ti banomile, ti xcaltique, ja' xa ti bats'i yajval stuc ti banomile.

²⁵“Scotol ti c'u s'elan ta xc'ot ta nopel ta t'unel avu'une, ja' me c'otuc ta sme' avu'un ti sicloe ti yich'oj jtob (20) gerase, ti ja' ta stunesic ta ch'ulnae.

²⁶“Ja'uc ti sba yoltac ti chon bolometique, ti ja' yu'un ti Dios ta sventa ti jech ba olole, ¡buch'u xa la ta xal ti ma'uc yu'un ti Diose! Manchuc mi ja' jcot nene' tot vacax, mi ja' jcot nene' tot chij, ja' xa yu'un ti Diose.

²⁷Yan mi ma'uc aq'uel ta matanal ti chon bolome, xu' ta xich' xq'uextael, ja' ti c'u s'elan ta xich' nopel ta xich' tojel loq'uele. Ta to xac' comel jch'ac ta vo'ch'ac ti c'u yepal albil ti stojole. Yan mi mu'yuc xa ta xich' pojel loq'uele, ta xich' chonel ta yan ti jech ono'ox stojol jech c'u cha'al nopbile.

²⁸“Mi oy buch'u ta xac'be stunes Dios ti c'usi oy yu'une, mi ja' sc'oplal junuc vinique, mi ja' junuc xchon sbolom, mi ja' jun rexto osil ti ac'bil yu'un ti yuts' yalaltaque, ta j'ech'el ti c'usi bevbil xae, mi ja'uc xa stac' chonel, mi ja'uc xa xu' ta xich' cha'ich'el sutel. Yu'un scotol ti c'usitic oy sc'oplal c'ot ta tunele, ts'uiltasbil c'ot ta j'ech'el ti ja' xa ta xtun yu'un ti Diose.

²⁹Mi ja'uc xa xu' ta xpojat loq'uel ti buch'u xi s'elan oy sc'oplale, yu'un ta xich' milel ono'ox.

³⁰“Ti jun ta lajunch'ac ti c'usitic ta xch'i ta banomile, jech c'u cha'al sc'oplal ti sat ts'unubile, jech c'u cha'al sc'oplal ti sat te'etique, ja' yu'un ti Diose. Albil sc'oplal ti ja' ta xc'ot ta yu'une.

³¹Mi oy buch'u ta xcha'ich' ya'i sutel ti jujun lajlajunebe, ac'o stoj ti c'u yepal ti stojole, xchi'uc ta to xac' comel jch'ac ta vo'ch'ac ti c'u yepal ti stojole.

³²“Ti jujun ta lajuncot ti vacaxe, mi ja' ti chije, ta xc'ot ta yu'un Dios ti jun ta lajuncote.

³³Va'i un, mi ja'uc ta xich' t'ujel ti slequilale, ti xchopolale, mi ja'uc xu' ta xich' jelel jcotuc ta yan. Yan mi oy bu ta xc'ot ta pasel ti ta xich' jelele, jech ti chon bolom ti oy sc'oplal ta ba'yele xchi'uc ti chon bolom ti ta xc'ot ta sjelole, c'ot ta yu'un ti Diose. Va'i un, mi ja'uc xa xu' ta xich' cha'iq'uel sutel.”

³⁴Taje, ja' smantaltac ti Dios ti laj yac'be ti Moisés ti c'alal oy ta vits Sinaí ta sventa ti israeletique.