Read Tzotzil Levítico 7 Bible Online

Levítico 7 - Tzotzil bible

Levítico 7

¹“Ti c'usi ta xich' svocol ta scoj ti mulile, ja' jun ch'ul matanal ta j'ech'el. Xi s'elan ti bijubtasel yu'un ma' taj une:

²Ti chon bolom ti ta xich' aq'uel ta scoj ti mulile, tsots sc'oplal ta xich' c'ocbel snuc' ti bu ta xich' milel ti chon bolometic ti ta xich' aq'uel yo' ta xich' chiq'uele. Ti xch'ich'el xtoque, ta xich' vijel ta sba xchi'uc ta sjoylej ti altare.

³Scotol xepu'al ti chon bolome, xi s'elan ti tsots sc'oplal ta xich' aq'uele: ti xepu'al ti oy ta snee, ti xepu'altac sbiquile,

⁴ti xchibal sq'uine xchi'uc ti xepu'ale, ti xepu'al sbec'tal ti oy ta spate, ti xepu'al ti oy ta secube, tsots sc'oplal jmoj ta xich' loq'uesbel xchi'uc ti sq'uine.

⁵Mi laj taj une, ta xchic' ta sba altar ti palee, ti ja' jun matanal ta xich' chiq'uel sventa yich'el ta muc' ti Diose, ti ja' laj yich' svocol ta scoj ti colo'ile.

⁶Ja' jech xtoc scotol ti paleetique xu' ta sti'beic ti sbec'tale. Ja' no'ox un, tsots sc'oplal ac'o sti'ic ti bu yavil chapanbile, yu'un c'ot ta jun ch'ul matanal.

⁷“Ti c'usi ta xich' svocol ta scoj ti colo'ile, co'ol sc'oplal xchi'uc ti ta xich' svocol ta scoj ti mulile, co'ol s'elan ti xi s'elan ti bijubtasel yu'un ti xchibale: Ti c'usi ac'bil xae, ja' yu'un ti pale ti c'alal ja' o yacal ta spas yabtel ta xch'ayel ti mulile.

⁸Ja' jech ec ti pale ti buch'u laj smil ti chon bolom ti oy buch'u laj yac' yo' jech ta xich' chiq'uele, xu' ta xich' comel snuculil ti chon bolome.

⁹Ja' jech xtoc scotol ti matanal sat ts'unubaletic ti ta'ajesbil ta hornoe, xchi'uc scotol ti c'usi ch'ilbil ta muc' ta lech-lech taq'uine, xchi'uc ti ch'ilbil ta xalteme, ja' xa yu'un ti pale ti buch'u laj sva'an sba ta yet'esel ti matanale.

¹⁰Ja' jech xtoc scotol ti matanaletic ti sat ts'unubaletique, ti taquin xa ti capbil ta vots'el xchi'uc ti aceitee, ja' yu'un scotolic snitilultac ti Aarone, ti co'ol ta xch'acbe sbaique.

¹¹“Ti bijubtasel yu'un ti c'usi ta xich' svocol ta sventa ti lajesobil o'ntonal ti ta xich' aq'uel ta stojol ti Diose, xi s'elane:

¹²Mi ja' sventa coli'albat ti c'usi ta xich' milele, ac'o yac' xtoc muc'tic panetic ti vots'bil ta aceite ti mu ja'uc ac'bil ti spajubtasobile, ti bacubtasbil jayaquil harina ti vijbil aceite ta sbae ti mu'yuc ac'bil ti spajubtasobile, xchi'uc muc'tiquil pan ti pasbil ta lequil t'ujbil harina ti vots'bil ta aceitee.

¹³Ti c'usi ta xich' svocol ta milel ta sventa ti coli'albate xchi'uc ta sventa ti lajesobil o'ntonale, jmoj ta xich' aq'uel xchi'uc ti muc'tic pan ti ac'bil spajubtasobile.

¹⁴Scotol ti matanale, ta xich' loq'uesel jujuti' yo' ta xich' aq'uel ta stojol ti Diose. Taje, ja' ta xc'ot ta yu'un ti pale ti buch'u laj svij ti ch'ich' yu'un ti chon bolom ti laj yich' svocol ta sventa ti slajesobil o'ntonale.

¹⁵“Sbec'tal ti chon bolom ti laj yich' aq'uel ta sventa ti coli'albate xchi'uc ti lajesobil o'ntonale, tsots sc'oplal ta slajesic no'ox ta yorail ti c'alal ta xich' aq'uele. Mi ja'uc xu' ta xich' q'uejel comel jutebuc ti scomelal ta yoc'omale.

¹⁶Yan ti mi ja' chon bolom ta xac' ta matanal ti c'usi loc' ta ye ta sti' ti ta ono'ox xaq'ue, mi ja' xtoc ti c'usiuc no'ox xloc' x'ayan ta o'ntonale, ta yorail no'ox, ac'o yich' ti'el c'alal mi laj yich' aq'uele. Xu' xtoc ta xich' ti'el ta yoc'omal ti c'u to yepal ta xcom ti scomelale.

¹⁷Yan ti mi tey to oy ta sta ta yoxibal c'ac'al sbec'tal ti chon bolom ti laj yich' aq'uele, ac'o xa yich' chiq'uel scotol.

¹⁸Yu'un mi oy buch'u ta sti' ti beq'uet ta yoxibal xa c'ac'al ti laj yich' svocol ta sventa ti lajesobil o'ntonale, mu'yuc xa tsacbil ich'bil ta muc' ta xc'ot ti jech laj yich' svocole. Bajbil ta xc'ot ti sbec'tale. Jech ti buch'u ta sti'be ti sbec'tal taje, xcuchoj lec ta xcom ti mulil taje.

¹⁹“C'usiuc no'ox mi na'bil ti soquesvanej ti c'ot ta sba ti beq'uete, mu xa me stac' ti'el, ja' xa no'ox ta xich' chiq'uel. “Scotolic ti buch'utic mu'yuc soquesoj sbaic xchi'uc ti c'usiuc no'ox jsoquesvaneje, xu' ta sti'ic ti beq'uete.

²⁰“Ja'uc ti buch'u soquesoj sba xchi'uc jtosuc ti soquesvaneje, ti ta sti'be sbec'tal ti c'usi laj yich' svocol ta sventa ti lajesobil o'ntonal ti c'alal ja' c'ot ta yu'un ti Diose, tenbil ta xloc' ta stojol ti xchi'iltaque.

²¹“Ti buch'u ta spic jtosuc ti c'usi na'bil ta soquesvane, mi ja' ti c'usi xcuchinoj ti yane, mi ja' ti c'usi xcuchinoj ti chon bolome, c'usiuc no'ox yan ti toj chopol sba ta j'ech'ele, jech xtoc un, mi ts'acal to mi utsuc xa slajesbe sbec'tal ti c'usi laj yich' svocol ta sventa ti lajesobil o'ntonal ti c'alal c'ot ta yu'un ti Diose, tenbil ta xloc' ta stojol ti xchi'iltaque.”

²²Ti Diose xi laj yalbe ti Moisés ti c'alal laj sc'opon talele:

²³“Xi xcholet xavalbe ya'i ti israeletique: Tsots sc'oplal mu sti'beic xepu'al ti tot vacaxe, mi ja' ti chije, mi ja' ti tentsune.

²⁴Ti xepu'altac ti chon bolometic ti ta xcham stuque, mi ja' scomelal sti'ben ti jti'oval chonetique, xu' xatunesic ta yan o stunel, ja' no'ox ti mu xu' ta xich' ti'ele.

²⁵“Buch'uuc no'ox ti ta sti'be xepu'al ti chon bolom ti ac'bil ta stojol Dios ti ta xich' chiq'uel ta sventa ti matanale, tenbil ta xloc' ta stojol ti xchi'iltaque.

²⁶“Ti buyuc no'ox ta xanaquiique, tsots sc'oplal mu xati'beic xch'ich'el ti mutetique, ti chon bolometique.

²⁷Ti buch'u ta sti'be xch'ich'el ti c'usiuc no'ox jtosucale, tenbil ta xloc' ta stojol ti xchi'iltaque.”

²⁸Ti Diose xi laj yalbe ti Moisés ti c'alal laj sc'opon talele:

²⁹“Albo ya'i ti israeletique, ti buch'u ta xich' batel ta stojol Dios ti c'usi ta xich' svocol ta sventa ti lajesobil o'ntonale, ac'o yac' ta stojol ti Diose.

³⁰Ac'o yich' batel stuc ta stojol Dios ti matanal ta xac' ti ta xich' chiq'uele, ti xepu'al sti' yo'ntone, xchi'uc sjunlej spechel sti' yo'ntone, yo' jech ta xc'ot ta pasel ti ta xich' aq'uel ta stojol Dios ti c'alal ta xich' ye'ilanele.

³¹Jech ti palee ta xchic' ti xepu' ta sba ti altare. Ja'uc ti xpechlej sti' yo'ntone, ja' spuculal ti Aarón xchi'uc ti xnich'nabtaque.

³²Yan ti sbec'tal ti sbats'i o' ti chon bolom ti laj yich' aq'uel ta sventa ti lajesobil o'ntonale, ja' ta xich' ac'bel ti palee yo' jech ta xc'ot ta yu'un.

³³Sbec'tal ti sbats'i o' taje, ja' ta xc'ot ta yu'un ti pale ti buch'u ta xet'es ti xepu'e xchi'uc ti xch'ich'el ti c'usi laj yich' svocol ta sventa ti lajesobil o'ntonale.

³⁴Yu'un ti c'usi laj yich' svocol ta sventa lajesobil o'ntonal ti laj yac'beicun ti israeletique, laj quich' ti jpech sti' yo'ntone, xchi'uc ti sbec'tal yo' ti c'ot ta jch'ul moton yu'unique. Taje, ja' laj cac'be yich' ti pale Aarón xchi'uc ti xnich'nabtac ti oy ono'ox sc'oplal ta xich'ic cu'un ti matanaletic ti ta xaq'uic ti israeletique.”

³⁵Ja'uc ti matanaletic ti ta xich' chiq'uel ta sventa yich'el ta muc' ti Diose, taje, ja' xa spuculal ti Aarón xchi'uc ti xnich'nabe, ti lic talel c'alal ti t'ujatic yu'un Dios ti c'otic ta yajpaletaque.

³⁶Ti sc'ac'alil taje, ti Diose laj yal mantal ta stojol ti israeletique ti ac'o yac'beic ti spuculal taje, ti com ta sbaic ti ja' yabtel ta spasel ti xlaj ech'uc ti totil me'ile, ti ta xcom o ta alab nich'nabiletique.

³⁷Taj une, ja' bijubtasel ta sventa ti c'usi ta xich' chiq'uele, ti matanal sat ts'unubile, ti c'usi ta xich' milel ta scoj ti mulil colo'ile, ti matanal sventa ti ich' abtelale, ti c'usi ta xich' svocol ta sventa ti lajesobil o'ntonale.

³⁸Yu'un albat yu'un Dios ti Moisés ta vits Sinaie, ti c'alal laj yalbe ya'i ti israeletic ti c'alal oyic ta sbajtical banomil yu'un Sinaí ti ac'o yich' talel ti matanale.